Astanada «Transtelekom» provaiderindegi internet aqaýlary jalǵasyp jatyr, dep habarlaidy Dalanews.kz
Qala turǵyny KazTAG redaktsiiasyna jeli jumysynyń nasharlyǵyn aityp shaǵymdanǵan.
«Uzaq ýaqyttan beri internet joq. Eń qyzyǵy – Telegram jumys isteidi, al qalǵany, sonyń ishinde veb-servister men saittar ashylmaidy. Operatorǵa habarlasý múmkin emes: avtojaýapbergish qosylady ne birden qoia salady, ne kezegiń jetkende bailanys úziledi. Men 14-shi bolyp kúttim, kezek maǵan kelgende «Transtelekom» tutqany qaitadan qoia saldy. Bul endi shekten asqan nárse! «191»-ge habarlasqanda da olar birden bailanys problemasy bar ekenin aitady. Qashanǵy osylai bolady?» – dedi turǵyn.
Buǵan deiin de Astanada «Transtelekom» internetindegi aqaýlar birneshe kún qatarynan jalǵasqan bolatyn. Ol kezde KazTAG provaiderdiń halyqty shatastyryp otyrǵanyn jazǵan. Keiin kompaniia abonentterde internet máseleleri bar ekenin rastaǵan edi.
Eske salaiyq, 31 mamyr 2023 jyly májilis depýtaty Ermurat Bapi Dariǵa Nazarbaeva men Qairat Sháripbaevtyń balalaryna qatysty aitqan sózi kezinde «Transtelekomnyń» Nuráli Álievke asa arzan baǵaǵa berilgenin málimdegen bolatyn. Onyń aitýynsha, quny 210 mlrd teńge turatyn, jyldyq kirisi 80–90 mlrd teńge kompaniia nebary 18,45 mlrd teńgege satylǵan.
Nuráli Áliev kompaniiadan birneshe jyl boiy júzdegen millionnan milliardtaǵan teńgege deiin dividend alyp kelgeni de aitylǵan.
2023 jyly Básekelestikti qorǵaý agenttigi «Transtelekomnyń» sol kezde Nuráli Álievtiń baqylaýynda bolǵan kezderi básekelestermen kelisimsharttardy buzýǵa shaqyrǵanyn habarlaǵan edi. Bul zańbuzýshylyq retinde baǵalanǵan.
2025 jyldyń 12 aqpanynda Nuráli Áliev «Transtelekom» basqarma tóraǵasy laýazymynan kompaniianyń satylýyna bailanysty ketkeni aityldy.
