Jýrnalist Mihail Kozachkovtyń málim etkenindei, Almatydaǵy IIM akademiiasynyń territoriiasyn yqpaldy sheneýnik menshiktep alǵan, dep habarlaidy Dalanews.kz.
“Ótken aptada Almatynyń taý bókterindegi máselelerge arnalǵan “Antikor” otyrysy ótti. Taýdyń tóbesine shyǵyp ketken kottedj úilerdiń kesirinen tótenshe jaǵdai oryn alyp, munyń sońy adam ólimine ákeldi. Quqyq qorǵaý organdary ákimdiktiń bir jaǵyna shyǵysyp, tártip ornatýǵa kómektesýde”, - deidi jýrnalist.
Aitýynsha, taýdyń etegindegi jerdi ońdy-soldy satý máselesi sheneýnikter men sýdialardyń kásip kózine ainalǵan. Memqyzmetshilerdiń is-áreketinen zań buzýshylyqtar anyqtalsa da, olardyń kópshiligi jazadan jaltaryp ketken.
“Osy tusta Ishki ister ministrliginiń jerimen bailanysty tańǵalarlyq jaitqa toqtalǵym keledi. Ermensai yqshamaýdanynda IIM-ne qarasty oqý-jattyǵý poligony ornalasqan. Al onyń ainalasynda quny júz myńdaǵan dollar turatyn sándi turǵyn úi keshenderi men záýlim úiler bar. Bulardyń derligi buryn akademiiaǵa tiesili aýmaqta ornalasqan”, - deidi ol.
Onyń sózinshe, munda birqatar yqpaldy sheneýnikke tiesili ǵimarattar boi kótergen.
“Máselen, munda Májilis depýtaty, Qazaqstandaǵy ázirbaijandary qaýymdastyǵynyń jetekshisi Ábilfas Hamedov qonystanǵan. Ol bul araǵa qalai tap boldy? 2004 jyly ol Almaty oblysy Qarasai aýdanyndaǵy 75 sharshy metr bos ǵimaratty aýktsion arqyly satyp alǵan”, - deidi jýrnalist.
Zań boiynsha eger adamnyń menshiginde ǵimarat bolsa, arnaiy qyzmet úshin jer alýǵa da quqyǵy bar.
“Hamedov osy múmkindikti múlt jibermei, ákimdikke ǵimaratty sýmen qamtamasyz etý úshin sorǵy jáne hlorlaý stansasyn ornatqysy keletinin aityp, jer berýdi suraǵan. Qarasai aýdany ákiminiń qaýlysymen oǵan 53 gektar jer bólingen. Keiin elektr transformatoryn ornatýdy surap taǵy 33 gektar jer suraǵan, ol ótinishi de oryndalǵan”, - deidi Kozachkov.
Áriptesimizdiń aitýynsha, osy tusta aýdan ákimi tarapynan zańǵa qaishy áreketke jol berilgen. Ákimdik akademiiaǵa tiesili jerdi esh suraýsyz berip jibergen.
“Keiin 2007 jyly qylmystyq is qozǵalyp, tergeý júrip jatqanda ákim Bolatbek Qutpanov qaitys bolady. Tergeý aiasynda sheneýniktiń jer ýchaskelerin berý arqyly óz ókilettigin asyra paidalanǵany anyqtaldy - Almatydan 20 shaqyrym radiýsta bul ispen aýdan ákimi emes, Almaty oblysynyń ákimi ǵana ainalysa alady.
Tergeý barysynda Hamedovtyń jerdi qalai iemdengeni belgili bolady, alaida oblystaǵy aýdanaralyq bólinis isti tuiyqqa tireidi. Qarasai aýdanynyń bir bóligi Almaty qalasyna ótip, artynsha genplan ózgerip, Ishki ister ministrleri men akademiia basshyǵynda aýys-túiis bolady”, - deidi ol.
Osy jyldar aralyǵynda Hamedovtar áýleti aýdandaǵy sý men elektr qýatyn óndiretin iri monopoliske ainalǵan.
“Olardyń ieliginde "Orhan" JShS-sy ondaǵan myń tutynýshylar úshin jalǵyz tasymaldaýshy. Sý men káriz tarifi qaladaǵydan eki ese joǵary, elektr energiiasy da áldeqaida qymbat. Jergilikti turǵyndar ákimdikke aryz jazyp, memlekettik organdar aiyppul salýda, Almaty ákimi Erbolat Dosaev taiaýda aýqatty kásipkerlerge qatysty qylmystyq istiń qozǵalǵanyn habarlady. Biraq budan nátije bolmai tur.
Aqyr sońy depýtattyń isimen Ishki ister ministrliginiń akademiiasy ainalysýǵa májbúr boldy. Oqý orny buǵan deiingi Qarasai ákimdigi shyǵarǵan qaýlylardyń kúshin joiý týraly sotqa shaǵym túsirdi”, - deidi Kozachkov.
Nátijesinde, Sýdia Rollan Dúisenbiev akademiianyń aryz-shaǵymy oryndy, mekemeniń jeri zańsyz alynǵan degen qorytyndyǵa kelgen.
“Keiin isti Joǵarǵy Sot tekserip, prokýratýranyń ustanymy aiaqasty ózgergen. Is jańa sot talqylaýyna jiberilipti. Almaty oblystyq soty barlyq mán-jaidy qaita zerttei kele, akademiianyń ótinishin keri qaitarǵan”, - deidi ol.
Aitýynsha, sot negizgi dáleldiń biri retinde merzimniń ótip ketkenin arqaý etken. Osy tusta jýrnalist keibir talaptar úshin ol júzege assa, basqalary úshin múldem elenbeitinin aityp shúilikti.
“Bul protseste kimdiki durys, kimdiki burys ekenin taǵy da Joǵarǵy Sot anyqtaýy kerek. 75 sharshy metr qiraǵan ǵimarat pen 86 gektar jerdi satyp alǵan deptýta pen sonyń saldarynan oqý-jattyǵý alańynan aiyrylǵan akademiianyń arasynda daý-damai kimniń paidasyna sheshilerin ýaqyt kórsetedi", deidi áriptesimiz.
