Eks-ministr Qýandyq Bishimbaevtyń ata-anasy reseilik bloger Natalia Greiske suhbat berdi, - dep habarlaidy Dalanews.kz.
Bishimbaevtyń anasy Álmira Bishimbaeva ulyn "ana retinde qolynan kelgenshe qorǵap júrgenin" aityp, kózine jas aldy.
"Árine, bul óte aýyr tragediia. Saltanatty ata-anasyn túsinemin. Úiimizde úlken tragediia. Áleýmettik jelide negativ material kóp. Biraq jaqsy adamdar da kóp. Jaǵalaýda júrgen kezimde shamamen 40 jastaǵy áiel kelip, "apai, siz Qýandyq Bishimbaevtyń anasysyz ǵoi? Bekem bolyńyz, biz sizdi túsinemiz, sizdi qoldaimyz" dedi.
Mundai jaǵdai kez kelgen adamnyń basynan ótýi múmkin. Biraq mundai nárseni eshkimge tilemeimin. Ulymdy óte qatty jaqsy kóremin, ulymyzben maqtanamyz. Biraq osyndai jaǵdai bolyp qaldy. Nege bulai bolǵanyn ákesi ekeýimiz de túsine almadyq. Ol qatal adam bolǵan emes. Bala kúninen ózine jaýapkershilikti ala biletin adam bolǵan. Únemi bizge qamqor bolatyn. Úsh jyl buryn ákesi qatty aýyryp qalǵan kezde dáriger taýyp, emdetti. Únemi bizge alańdap júredi", - deidi Álmira Bishimbaeva.
Sonymen qatar, Ýálihan Bishimbaev ta ulynyń isine qatysty pikir bildirdi.
"Iá, ol kináli, ol jazalanýy kerek. Biz úshin bul úlken tragediia. Sebebi Saltanat ta bizdiń otbasymyzdyń múshesi. Óz qyzymyzdai qaraitynbyz. Olar baqytty bolǵysy keldi, bir-birin jaqsy kóretin. Qýandyqpen arasynda sózge kelispei qalatynbyz, biraq eshqashan qol kótergen emespin. Bul bizdiń otbasymyzǵa jat dúnie", - deidi Ýálihan Bishimbaev.
Álmira Bishimbaev uly Saltanatty óltirý oiy bolmaǵanyn aitady.
"Eń birinshiden, Qýandyqta Saltanatty ádeii óltirýge sebep bolǵan joq. Ol Saltanatty jaqsy kóretin. Ol óte meiirimdi, qamqor adam. Ádeii qaskóilikpen óltirýi múmkin degenmen ana retinde kelispeimin", - deidi Álmira Bishimbaeva.
Sonymen qatar, Álmira Bishimbaeva sotta sóz bolǵan "ataraks" preparaty týraly aitty.
"Ol dárini Saltanat úshin aldy. Sebebi onyń kóńil-kúii turaqsyz bolatyn", - deidi Álmira Bishimbaeva.
"Bastapqyda ekeýi qosylǵan kezde árine qýandyq. Sebebi ulymyz baqyttan basy ainalyp júrdi. Ol jaqsy kóretini baiqaldy. Biraq ýaqyt óte kele ol qateleskenin bildik. Qazaqta "jaqsy áiel kúieýin tórge súireidi, jaman áiel jaqsy erkektiń basyn kórge súireidi" degen túsinik bar. Olar bir-birin jaqsy kórgenimen bir-birin jaqsy tanymai jatyp úilendi", - deidi Ýálihan Bishimbaev.
Álmira Bishimbaeva uly Saltanatqa úilener aldynda qandai bolǵanyn áńgimeledi.
"Qýandyq Saltanatpen tanysqanǵa deiin sportpen kóp ainalysatyn, balalaryna kóp ýaqyt bóletin. Uly Mansur Nazarbaev ýniversitetine grantqa tústi", - deidi Bishimbaeva.
Sondai-aq suhbatta Álmira Bishimbaeva Saltanattyń aǵasy Aitbek Amangeldimen bolǵan janjal týraly aitty.
"Oqiǵa 20 naýryzda bolǵan. Biz ol kezde Shymkentte edik. Túngi ekide Aitbek maǵan habarlasyp, maǵan bylapyt sózder aityp, "nemereńdi ustap otyrmyn, Saltanat qaida?" deidi. Men qorqyp, nemeremdi jiberýin suradym. Raniianyń (Bishimbaevtyń qyzy) aitýynsha, Aitbek olardy qatty qorqytyp tastaǵan. Qýandyqqa habarlastym, ol bári durys ekenin jáne balalardy bólmege kirgizgenin aitty. Al Aitbek úidiń astań-kesteńin shyǵaryp, qolyna as úidegi pyshaqty alyp, Qýandyqqa shabýyldaǵan", - deidi Álmira Bishimbaeva.
Eske salaiyq, buǵan deiin Álmira Bishimbaeva sotta sóz sóilegen bolatyn.
Ol Saltanat Núkenovanyń ólimine qatysty máskeýlik sarapshynyń saraptama nátijesiniń sheshimin is materialdaryna qosýdy qoldaýdy surady.
"Men, árine, zańger emespin. Biraq eger bizdiń máskeýlik saraptamanyń nátijesin qabyldamasańyzdar, meniń ulymnyń konstitýtsiialyq quqyǵy buzylady dep oilaimyn. Sondyqtan sot, alqabiler, prokýrorlar men jábirlenýshi taraptan meni ana retinde túsinýdi suraimyn. Muny shyn júregimmen aityp otyrmyn", - deidi Bishimbaevtyń anasy.
Bishimbaevtyń anasynyń atyna tirkelgen 6 kompaniia bar bolyp shyqty.
Al ákesi Ýálihan Bishimbaev – belgili ustaz. Birneshe jyl ártúrli joǵary oqý ornynda rektor bolǵan. 2006 jáne 2007 jyldary "Joǵary oqý oryndarynyń úzdik rektory" atanǵan. Ǵylym jáne tehnika salasyndaǵy Qazaqstan Respýblikasy Memlekettik syilyǵynyń laýreaty. 1994-1996 jyldary – Qyzylorda oblystyq máslihatynyń, 2003-2012 jyldary – Ońtústik Qazaqstan oblystyq máslihatynyń, 2012-2016 jyldary parlament májilisiniń depýtaty bolǵan.
Ýálihan Bishimbaev atynda eshqandai biznes tirkelmegen. Bul áýlettiń kásibin eks-ministrdiń anasy Álmira Nurlybekova basqarady. Onyń atynda resmi 6 kompaniia bar.
