Almatyda mektep direktorlary ata-analarǵa esep berdi: 22 qazan 2015

Kúni keshe ǵana Almaty qalasy ákimi qyzmetine taǵaiyndalǵan Baýyrjan Baibek Almaty qalasy boiynsha bilim berý mekemeleriniń qala turǵyndary aldynda ashyqtyǵyn qamtamasyz etip, sybailas jemqorlyqqa jol bermeýi úshin ár toqsan saiyn mektep direktorlary ata-analar aldynda esep berý týrasynda buiryq shyǵardy. Ákimniń bul bastamasy bizdi qatty qyzyqtyrǵan soń, Áýezov aýdandyq bilim bóliminiń basshysy Gúlnár Hodjabergenovamen birlesip, aýdandaǵy úsh mekteptiń ata-analarmen esepti kezdesýine qatysyp qaittyq. Esepti kezdesýge qatysqanymyzda memlekettiń bir ǵana mektepke jyl boiyna millondaǵan qarjy bólip, balalardyń alańsyz bilim alýyna jaǵdai jasap otyrǵanyna kózimiz jetti. Osylaisha qala basshysy Baýyrjan Baibektiń ustazdar qaýymyn jemqorlyqqa boi aldyrmaýy úshin qolǵa alǵan bul sharasy almatylyqtar tarapynan qoldaý tapqanyna kýá boldyq. Árine ákimniń bul bastamasyn árkim san-saqqa júgirtýi múmkin. Biraq ashyq qoǵam qurýda aldyńǵy lekte turatyn ustazdar qaýymnyń júzi jarqyn bolýy úshin mundai is-sharanyń Almatyda qolǵa alynǵanyn oryndy dep esepteimiz.

№139 mekteptiń esebi

Almatyda bastaý alǵan mektep direktorlarynyń esepti kezdesýi kún uiasyna batyp, qas qaraiǵanda bastaldy. Kúndiz jumystan qoly bosamaityn ata-analarǵa yńǵaily bolýy úshin kezdesýdi bilim oshaqtary keshki mezgilde uiymdastyrypty. O basta kesh batyp, qarańǵylyq qoiýlana túskende mundai jinalysqa ata-analar az keletin shyǵar dep oilaǵan edik. Degenmen Áýezov aýdanyndaǵy A.Baitursynov atyndaǵy №139 mektep gimnaziianyń májilis zalyna kelip kirgenimizde 300-ge tarta adam erkin siiatyn zalda ine shanshar oryn bolmaǵanda oiymyzdyń qate ekenine kóz jetkizgendei boldyq. Qalyń kópshiliktiń arasynda jas ata-analar men nemeresiniń sońynan erip kelgen egde tartqan kisilerdiń bar ekenin baiqadyq. Bári mektep direktorynyń esebin tyńdaýǵa qumartyp kelgeni baiqalyp tur. El aiaǵy tolyq jinalǵan №139 mektep gimnaziiasynyń direktory Erik Qýatbekov sóz bastady:

– Qurmetti ata-analar, Almaty qalasynyń ákimi Baýyrjan Baibek myrzanyń nusqaýy boiynsha budan bylai qalamyzdaǵy mektep direktorlary ár toqsan saiyn memleket tarapynan mektepke bólingen qarajattardyń qaida jumsalyp jatqany jaiynda esep berip turatynyn ózderińiz de bilesizder. Óz basym bul is-shara mektep pen ata-analar arasyn jaqyndatyp, bilim berý mekemeleriniń ashyqtyǵyn qamtamasyz etedi dep esepteimin. Sondyqtan bizdiń mektep ujymy ákimniń bul bastamasyna jyly qabyldap, qoldaý bildirdi, – dep mektep basshysy kókeige túigen oiyn ortaǵa saldy. Áńgime basynda mekteptiń tarihy men jetken jetistigine qysqasha toqtalyp, jinalǵan qaýymǵa qysqasha málimet berip ótti.

– Árbir ata-ana balasy bilim alatyn bilim oshaǵyna memleket tarapynan qanshalyqty qarjy bólinetinin bilip otyrýy mańyzdy. Júzdegen myń salyq tóleýshilerdiń esebinen quralatyn bul qarjynyń tiimdi baǵytta jumsalýy bárimiz úshin mańyzdy másele. Endi qarjylyq esebimizge kóshsek. 2015 jyly A.Baitursynov atyndaǵy №139 mektep gimnaziiasyna 187 676 000 teńge bólindi. Sonyń ishinde jergilikti biýdjet esebinen bólingen qarjy – 170 097 000 teńgeni qurasa, respýblikalyq biýdjetten 17 579 000 teńge bólindi. Endi osy qarajattardyń qalai jumsalynyp jatqanyn aityp bersem. Osy rette myna bir máseleni aita ketsem. Qazir qaladaǵy birli-jarym mektepte arnaiy shottary bar. Bul esep shotqa aýqatty ata-analar qarjy aýdaryp, demeýshilik jasap turady. Al bizdiń mektepte mundai esep shottar joq. Ata-analar tarapynan aqsha jinalmaitynyn ózderińiz de jaqsy bilesizder. Ústimizdegi jyldyń 9 aiynda mektebimizdiń kirisi 151 381 000 teńgeni qurasa, dál osy kezeńdegi shyǵys ta 151 381 000 teńgeni quraǵan. Endi memleket tarapynan bólingen qarjynyń qalai jumsalǵanyna toqtalsam. Qyzmetkerler men jumysshylardyń eńbekaqysyna 120 498 000 teńge qarastyrylǵan. Qosymsha aqshalai tólemder – 1 950 000 teńgeni (qala ákiminiń syilyǵy 3 jas mamanǵa 150 000 teńgeden berilip, 5 muǵalim 300 000 teńgeden aldy) qurady. Ótemaqylyq tólemder 5 600 000 teńge bolsa, áleýmettik salyqqa 5 062 000 teńge tólendi. Al áleýmettik aýdarymdarǵa 4 455 000 teńge bólindi. Kommýnaldyq tólemderge 4 314 000 teńge bólinip, onyń 2 734 000 teńgesi mektepte jylytý júiesine jumsalsa, sýyq sýmen qamtý men káriz qubyrlary qyzmetine 530 000 teńge tólengen. Sol siiaqty elektr qýatyna 1 050 000 teńge, bailanys qyzmetine (telefon, internet) 207 000 teńge bólinip otyr. Barlyq normalarǵa sáikes, gimnaziiadaǵy synyp sandaryn eskere otyryp josparlanǵan kerekti sharýashylyq zattar tómendegidei tizim boiynsha 2 467 000 teńgege satyp aldyq. Keńse taýarlaryna – 200 000 teńge, kórnekilik quraldar men sporttyq taýarlarǵa – 200 000 teńge, baspasózge 100 000 teńge, aýyz sýy men plastikalyq stakandarǵa jospar boiynshai 9 aiǵa 415 000 teńge jumsaldy. Aǵymdaǵy jóndeý jumystaryna 3 255 000 teńge bólinip, memlekettik satyp alýdyń baǵa usynystary tásilimen 24.04.2015j. № 766800 qorytyndysyna sáikes «Kazenergo Sompany» seriktestigi utyp alyp, aǵymdaǵy jóndeý jumystaryn kórsetilgen tehnikalyq synaptamaǵa sáikes júrgizdi. Mekemeniń keshendi kúzet qyzmetine 2 032 560 teńge jumsaldy. 1-4 synyp oqýshylaryn tegin ystyq tamaqpen qamtamasyz etý maqsatynda 14 175 000 teńge jumsaldy. Tamaqtandyrý oqýshylardyń sanyna jáne kelisilip bekitilgen «As máziri» negizinde júzege asyryldy. Ai saiyn mekemeniń keshendi kúzet, órtke qarsy dabyl, beinebaqylaý qadaǵalaý qyzmetteri úshin «Bona» JShS-ne 1 332 000 teńge, qoqys shyǵarýǵa 108 000 teńge, mektep ǵimaratyn dezinfektsiialaýǵa 90 000 teńge, mekeme qyzmetkerlerin kezekti meditsinalyq kórsetýden ótkizýge 180 000 teńge bólindi. Mekemedegi ofistik tehnikalardy aǵymdaǵy jóndeý jumystaryna 180 000 teńge bólinip, jospar boiynsha jóndeý jumystary júrgizildi. Sonymen qatar, basqa aýdarýlarǵa banktik qyzmetter úshin 270 000 teńge tólenip turady. Oqýshylardy UBT-ǵa jetkizý, «Jas túlek» mektep bitirýshiler festivaline aparyp-alyp kelý úshin transporttyq qyzmetke – 130 000 teńge bólinip, paidalaný ýaqytyn eskere otyryp tólendi. Gimnaziiada arnaiy meditsinalyq bólme jumys jasaidy jáne barlyq kerek-jabdyqtarmen qamtamasyz etilgen. Balalarǵa alǵashqy kómek kórsetý maqsatynda biýdjet qarajatynan 65 000 teńgege dári-dármekter satylyp alynǵan. Jalpyǵa mindetti orta bilim qorynan qarajatty qoldaný, jaǵdaiy tómen otbasynan shyqqan oqýshylarǵa materialdyq kómek kórsetý negizinde ata-analardyń ótinishi boiynsha 33 az qamtylǵan balaǵa 1 200 000 teńge kóleminde materialdyq kómek retinde berildi, – dep Erik Nurǵumaruly memleket tarapynan bólingen qarjynyń qaida jumsalǵanyn jipke tizgendei baiandap berdi.

Mektep direktorynyń baiandamasyna qulaq túrgenimizde A.Baitursynov atyndaǵy №139 mektep gimnaziiasynda qazir uzyn sany 120 adam eńbek etetinin bildik. Olardyń 85-i pedagog mamandar bolsa, qalǵany 35-i kishi qyzmetkerler eken. Óz kezeginde ata-analar mektep direktorynyń baiandamasyna rizashylyqtaryn bildirip, alǵastaryn aitty. Esepti kezdesýde ata-analar qurylǵanyna 25 jyl tolyp otyrǵan mektepke kúrdeli jóndeý jumystary qashan júrgiziletinin surady. Óz kezeginde mektep direktory Erik Qýatbekov bul máseleni ózi de kóterip júrgenin alǵa tartty. Ol Almaty bilim basqarmasynyń mektepke kúrdeli jóndeý jumysyn júrgizýdi qajet dep taýyp, kezekke qoiǵanyn málim etti. Osylaisha ata-analar men mektep basshylyǵy alǵashqy kezdesýde jyly júzben tarqasty.

№86 mekteptiń esebi

Araǵa bir kún salyp Áýezov aýdanynda ornalasqan Ǵ.Músirepov atyndaǵy №139 mektep gimnaziiasynyń tabaldyryǵyn attadyq. Bizdi mektep direktory Qaldyqyz Musaeva jyly júzben qarsy aldy. Mejeli ýaqyttan sál erterek barǵanymyzdyń arqasynda mekteptiń ótken-ketken tarihymen azdap tanysýǵa múmkindik aldyq. Taiaýda ǵana kúrdeli jóndeý jumysynan ótken mekteptiń ishi kózdiń jaýyn alady. Arnaiy zaldarǵa qoiylǵan kórnekilik quraldar da adamdy tartyp, mektep jaiynda mol maǵlumat berip tur. Ozat oqýshylardyń taqtasyna kóz salǵanymyzda bilim oshaǵynda bilimge qushtar jas jetkinshekterdiń kóp ekenin baiqaǵandai boldyq. Mektep direktory taiaýda ǵana Áýezov aýdany bilim bóliminiń basshysy qyzmetine taǵaiyndalǵan tájiribeli pedagog, bilikti uiymdastyrýshy Gúlnár Hodjabergenovany mektep ishinde uiymdastyrylǵan syrbaz jazýshy Ǵabit Músirepovtiń murajai keshenine bastady. Muraijaǵa bas suqqanymyzda jazýshynyń ár jyldary jaryq kórgen kitaptar men qoljabalary kózimizge shalyndy. Bir buryshta Ǵábeńniń qyry synbaǵan kastiým shalbary kózimizge ottai basyldy. Óz kezeginde Qaldyqyz Aitjanqyzy murajaidyń jádigerlerin jinaqtaý barysynda Ǵ.Músirepovtiń urpaqtary kóp kómek kórsetkenin alǵa tartty. Budan keiin mekteptiń ashanasyn, arnaiy synyptaryn aralap tamashaladyq. Kúrdeli jóndeý jumysynyń arqasynda bilim ordasy ajarlanyp, jas jetkinshekterdiń alańsyz bilim alýyna múmkindik týyp turǵanyn alǵa tartty.

Keń zalǵa kelip kirgenimizde №86 mektep-gimnaziianyń ata-analary mektep direktorynyń qarjylyq esebin tyńdaýǵa qyzyǵýshylyq tanytqanyn baiqaǵandai boldyq. Úsh júzdei adam erkin siiatyn zaldyń ishi lyq toly. Bári mektep direktorynyń esebin tyńdaýǵa asyq. Minbege kóterilip, jiyn tizginin qolǵa alǵan Qaldyqyz Musaeva jinalǵan qaýymǵa mekteptiń tarihy men jetken jetistigi jaiynda daiyndalǵan beinefilmin ata-analardyń nazaryna usyndy.

– Taiaýda ǵana Almaty qalasy ákimi bolyp taǵaiyndalǵan Baýyrjan Baibek myrza jemqorlyq dertiniń túbirine balta shabý maqsatynda bilim berý mekemeleri basshylarynyń memleket tarapynan bólingen qarjysyn qalai jumsap jatqany jaiynda esep berý týrasynda arnaiy buiryǵy shyqty. Ákimniń tyń bastamasyna bizdiń №86 mektep-gimnaziiasy da qoldaý bildirip, ózderińizben kezdesip otyrǵan jaiymyz bar. Aldaǵy ýaqytta ár toqsan saiyn memleket tarapynan bólinetin qarjynyń qalai jumsalyp jatqanyn esepti kezdesýlerden bilip otyrasyzdar, – dep mektep direktory Q.Musaeva sózin ary qarai jalǵady.

– Endi negizgi máselemizge kóshsek. 2015 jyldyń 9 aiynda mektebimizge memleket tarapynan 142 mln. teńge bólindi. Sonyń 130 mln. teńgesi jergilikti biýdjet esebinen bólinse, qalǵan 11,6 mln. teńgesi respýblikalyq biýdjet esebinen bólinip otyr. Osy rette myna bir máseleni aita ketý kerek dep esepteimin. Bizdiń mektebimizde eshqandai qaiyrymdylyq esepshoty jumys istemeidi. Ata-analar tarapynan mektep qajettiligi úshin eshqandai qarjy jinalmaitynyn osydan baiqaýǵa bolady. Endi joǵaryda atap ótken qarjynyń qalai jumsalǵanyna toqtalsaq. Jalpy, bólingen qarjynyń basym bóligi ustazdardyń jalaqysyna jumsalyp, bul maqsatqa 96,7 mln. teńge qarastyryldy. Al áleýmettik tólemder 4,7 mln. teńgeni quraǵan. Sol siiaqty biyl úzdik ustaz ben 9 jas mamanǵa syiaqy qarjy berip, 2,5 mln. teńge jumsadyq. Osy rette úzdik ustazdarǵa 300 myń teńgeden syiaqy berilse, jas mamandarǵa tólengen syiaqynyń mólsheri 150 myń teńgeni qurady. Bul – ustazdar qaýymyn súiikti isine yntalandyryp otyrý úshin qajet bastama. Mektep qabyrǵasynda alǵashqy meditsinalyq kómek kórsetý úshin biyl 77 myń teńgege qajetti dári-dármekti satyp aldyq. Al kommýnaldyq qyzmettik tólemderge bólinetin qarjy 5,1 mln. teńgeni qurady. Oqýshylar men ustazdar qaýymy tutynatyn aýyz sýǵa 200700 teńge jumsaldy, – dep Qaldyqyz Musaeva jurtshylyq aldynda memleket qarjysynyń qaida jumsalǵanynyń esebin shyǵaryp berdi. Jiyn sońynda mektep jaiynda qysqasha málimet bergen Qaldyqyz hanym ujymda ártúrli aýdandyq, qalalyq, respýblikalyq marapattarǵa ie bolǵan ustazdar qyzmet etetinin alǵa tartty.

– Mektebimizdegi ustazdar qaýymy tárbie isiniń mańyzdylyǵyna, erteńgi atqarylatyn istiń baǵyt-baǵdaryna úlken mán beredi. Bul barsha ustazdardyń mindeti. Osyndai ujymnyń arqasynda mektebimizdiń abyroiy jyl ótken saiyn asqaqtap keledi, – dep mektep direktory esebin qorytyndylady.

№123 mekteptiń esebi

Baǵila ÁShIMBAEVA, Almaty qalasy Áýezov aýdany Qoja Ahmet Iassaýi atyndaǵy №123 mektep-gimnaziiasynyń direktory, Qazaqstan Respýblikasy Bilim berý isiniń Qurmetti qyzmetkeri:

– Qurmetti ata-analar, Almaty ákiminiń qyzmetine Baýyrjan Baibek taǵaiyndalǵaly beri qalalyq bilim salasynyń jumysyna kóptegen ózgerister engizilip jatyr. Osy oraida Baýyrjan Qydyrǵaliulynyń tikelei tapsyrmasymen sizderdiń aldaryńyzda 2015 jyldyń 9 aiyndaǵy biýdjet boiynsha bizdiń mektebimizge bólingen qarjynyń kirisi jáne shyǵysy esebin bergeli otyrmyn. Saiyp kelgende búgingi jinalysymyzda bir ǵana másele – qarjynyń ornymen igerilýi sóz bolady.

Aldymen aitarym...

Alaida aldymen mekteptiń tarihy men jetistikterine az-muz toqtala keteiin. Almaty qalasy Áýezov aýdany Qoja Ahmet Iassaýi atyndaǵy №123 mektep-gimnaziiasy 1989 jyly quryldy. Mektep 1266 orynǵa arnalǵan. Qazirgi tańda jalpy 67 synyp bar, al oqýshylardyń sany 1800-den asady. Bastaýysh synypta barlyǵy – 42 muǵalim qyzmet etedi. Ustazdar shyǵarmashylyq toptarmen jumys jasaidy. Bizde tarihty, tildi, matematikany tereńdetip oqytatyn shyǵarmashylyq toptar qurylǵan.

Qazirgi kúni UBT-ǵa daiyndyq jumystary bastalyp ketti. Bul tarapta qosymsha sabaqtardy iske qosyp jatyrmyz. Jalpy ata-analarmen búgingidei kezdesýler jii ótkizilip turady. Oǵan ózderińiz de kýásizder.

Ata-analar tarapynan suraq: «Mektepterde aqsha jinaý máselesine qatań tyiym salynypty dep estidik. Jalpy osy týraly aita otyrsańyz?».

Baǵila ÁShIMBAEVA: Men sizdermen kezdesýde eń birinshi aqsha jinaý máselesin aitamyn. Almaty mektepterinde ata-analardan aqsha jinaýǵa qatań tyiym salynǵan. Mundaǵy maqsatty ózderińiz de bilesizder. Ata-analardan aqsha jinap, olarǵa artyq salmaq salmaý. Baýyrjan Qydyrǵaliuly kele sala osy máseleni kótergen bolatyn.

Iá, 90-shy jyldarmen salystyrǵanda qazirgi kúnimiz jaqsy. Úkimetten mektepterge qarjy bólinip jatyr. Endigi másele olardy ornymen igerý, qajetti jerlerine jetkizý – myna bizdiń mindetimiz.

2015 jyly mektep gimnaziiasyna qansha qarjy bólindi?

Almaty qalasy Áýezov aýdany Qoja Ahmet Iassaýi atyndaǵy №123 mektep-gimnaziiasyna 2015 jylǵa bólingen jalpy qarjy 274 mln 616 myń teńgeni qurap otyr. 2015 jyldyń 9 aiyna arnalǵan kiris jáne shyǵys esebine keletin bolsaq bul 214 mln 551 myń teńge. Onyń ishinde jergilikti biýdjet boiynsha bólingen qarjy 196 mln 56 myń teńge. Respýblikalyq biýdjetten bólingen qarjy 18 mln 495 myń teńge.

Joǵaryda aityp kettik, synyptarymyzdyń sany – 67, onyń ishinde bastaýysh synyptardyń sany – 31 (992 oqýshy), joǵary synyptardyń sany – 36 (929 oqýshy). Oqýshylarymyzdyń sany 1921 balany quraidy.

Al mektep qyzmetkerleriniń sany – 180. Onyń ishinde 42 adam ákimshilik-sharýashylyq salasynyń mamandary jáne kishi qyzmetkerler. Pedagogikalyq qyzmetkerlerdiń, iaǵni muǵalimderdiń sany 130 adamdy qurap otyr.

Muǵalimderimizdiń 63-i joǵary sanatty, 22 ustaz birinshi sanatty, ekinshi sanatty muǵalimderdiń sany 25 jáne sanaty joq ustazdardyń sany – 28. 8 ustazymyz Nazarbaev ziiatkerlik mektebiniń kýrsynan ótip keldi.

Muǵalimder jalaqysy jáne jalpy shyǵyn týraly

2015 jyldyń 9 aiyndaǵy barlyq shyǵys 214 mln 551 teńgeni qurady. Onyń ishinde qyzmetkerler men jumysshylardyń eńbekaqysyna 166 mln. 198 myń teńge bólindi. Qyzmetkerler eńbekaqysyna – 141 mln 345 myń teńge, qosymsha aqshalai tólemderge 2 mln 550 myń teńge jumsaldy. Ótemaqylyq tólemderge 7 mln 9 myń teńge baǵyttaldy. Al áleýmettik salyqqa 8 mln 659 myń teńge bólindi. Áleýmettik aýdarymǵa 5 mln 779 myń teńge jumsaldy.

Budan soń kommýnaldyq tólemderge 5 mln 872 myń teńge bólindi. Jylytý ortalyǵy júiesi jáne ystyq sý úshin 3 mln 512 myń teńge bólindi. Sýyq sýmen qamtý jáne káriz júiesine 1 mln 349 myń teńge jumsaldy. Elektr qýatyna 819 myń teńge, bailanys qyzmetine 192 myń teńge jumsaldy.

Budan syrt mektepke qajetti sharýashylyq zattar bar. Olarǵa jumsalǵan qarajat 3 mln 84 myń teńge. Onyń ishinde sharýashylyq taýarlar men tazalaýǵa arnalǵan zattarǵa 1 mln 603 myń teńge bóldik. Keńse taýarlary men jazý qaǵazdaryna 545 myń teńge baǵyttaldy. Sporttyq taýarlarǵa 351 myń teńge qarajat bólindi. Synyp jýrnaldary úshin 118 myń teńge jáne aýyz sý men plastikalyq staqandarǵa osy 9 aida 1 mln 216 myń teńge jumsaǵan ekenbiz.

Aǵymdaǵy jóndeý jumystaryna 3 jarym mln teńge bólindi.

Ata-analar tarapynan suraq: «Bul qarjy qaida ketti?».

Tóbeni, qabyrǵany ákteýge 804 myń teńge qarajat ketti. Ózge qarajat eden, plintýs syrlaýǵa, kitaphana tóbesine gipsokarton ustatýǵa, sportzaldy ákteýge, syrlaýǵa, jertóleni jóndeý jáne qýat symdaryn aýystyrýǵa, onyń bólmelerge linoleým tóseýge, ystyq jáne sýyq sý qubyrlaryn aýystyrýǵa baǵyttaldy.

Kúzet qyzmetine 1 mln 332 myń teńge jumsadyq. Qural-jabdyqtar men ǵimaratqa qyzmet kórsetý 1 mln 875 myń teńgege shyqty. Budan syrt mekeme qyzmetkerlerin kezekti meditsinalyq tekserýden ótkizýge 240 myń teńge bólinip, barlyq qyzmetkerler tiisti tekserýden ótti. Sonymen qatar mekteptegi ofistik tehnikalardy jóndeý jumystaryna 400 myń teńge baǵyttadyq.

Budan syrt oqýshylardy UBT-ǵa jetkizý, «Jas túlek» festivaline alyp baryp, alyp kelý úshin transporttyq qyzmetke 204 myń teńge bólindi. Gimnaziiada arnaiy meditsinalyq bólme jumys jasaidy: balalarǵa alǵashqy kómek kórsetý maqsatynda 108 myń teńgege dári-dármekter satyp aldyq. Turmystyq jaǵdaiy tómen oqýshylardy ystyq tamaqpen qamtamasyz etý úshin 382 myń teńge qarastyrdyq.

Budan syrt ata-analar ótinishi boiynsha 126 az qamtylǵan otbasylarǵa materialdyq kómek kórsetý negizinde 3 mln. 57 myń teńge aqshalai berildi.

Qurmetti ata-analar, mine, mektepke baǵyttalǵan qarajattyń qaida jáne qalai bólingenin ashyp aityp berdim. Bizdiń mektepte bala kóp. Ustaz da kóp. Saiyp kelgende barlyq qarajat mekteptiń qajetine jumsaldy.

Anyǵynda, mektebimiz kúrdeli jóndeýdi qajet etedi. Baýyrjan Qydyrǵaliuly munyń bárin bilip otyr. Osy sebepti mektebimizdi kúrdeli jóndeýden ótkizý týraly kezekke qoiypty. 2017 jyly kezegimiz kelse6 jarqyraǵan, jainaǵan mektepte oqimyz dep senimmen aita alamyn.

Gúlnár Hodjabergenova, Áýezov aýdandyq bilim bóliminiń basshysy:

Гулнар Ходжабергенова
– Qazir ekiniń biri «mektepterde muǵalimderdiń ata-analardan ár nárseni syltaýratyp aqsha jinaidy» degen áńgime jii aitylatyny jasyryn emes. Jel soqpasa, shóptiń basy qimyldamaityny belgili. Jas urpaqqa úlgi-ónege beredi degen bilim ordalarynda ustazdardyń aqsha jinaýy durys emes. Qazirgi jaǵdaimyzdy toqsanynshy jyldardaǵy toqyraý jyldarymen salystyrýǵa kelmeidi. Táýelsizdik jyldary memleketimizdiń ál-aýqaty artyp, bilim berý mekemelerin jyl saiyn tiisti qarjymen qamtamasyz etýde. Memleket basshysy Nursultan Nazarbaev qarjylyq-ekonomikalyq daǵdarysqa qaramastan, bilim men densaýlyq saqtaý salasyna bólinetin qarjynyń bir tiyny da qysqarmaitynyn qadap aitty. Bir sózben aitqanda muǵalimniń ailyǵy, bilim berý oshaqtaryna qajetti kerek-jaraqtardy satyp alýǵa memleket tarapynan qarjy qarastyrylǵan.

Osy jaittardy eskergen Almaty qalasynyń ákimi Baýyrjan Baibek mekteptegi jemqorlyqqa túbegeili tosqaýyl qoiý úshin ár toqsan saiyn mektep direktorlarynyń ata-analar aldynda esep berý týrasynda talap qoiyp otyr. Óz kezeginde bul bastama Almaty qalasyndaǵy bilim mekemeleri men ata-analar tarapynan airyqsha qoldaýǵa ie bolyp otyr. Aldaǵy ýaqytta mektep direktorlary ár toqsan saiyn ata-analarmen kezdesip, memleket qarjysynyń qaida jumsalǵany jaiynda egjei-tegjeili
aqparat berip turatyn bolady.

Almaty qalalyq qarjy basqarmasynyń ruqsatymen mektepter qaiyrymdylyq esep shottaryn ashýǵa ruqsat berilgen. Biraq mundai esepshoty bar mektepter saýsaqpen sanarlyq. Aldaǵy ýaqytta arnaiy esepshoty bar mekteptiń direktorlary memleket qarjysy jáne arnaiy esepshotqa ata-analar tarapynan túsken qarjynyń qalai jumsalyp jatqany jaiynda esep berip turatyn bolady. Jalpy, qala basshysynyń bul bastamasy halyq arasyndaǵy «mektepte aqsha jinalady» degen jaman attan arylýǵa jáne memleket tarapynan bólinetin qarjyny tiimdi baǵytta jumsaýǵa yqpal etetine senimdimin.

Óz basym Áýezov aýdanyndaǵy birneshe mekteptiń esepti kezdesýine qatysqanda bul bastama halyq tarapynan qyzý qoldaý tapqanyn baiqadym. Árine, bul mektep direktorlarynyń alǵashqy esepti kezdesýi bolǵandyqtan az-kem kemshilikter ketýi múmkin. Biraq osy bir kezdesýge ata-analar men mektep ujymynyń boiy úirengennen keiin óziniń nátijesin berip, bilim salasynyń ashyqtyǵyn qamtamasyz etetin mańyzdy sharaǵa ainalatynyna senimdimin.

Dýman Tanabasov

Almatyda mektep direktorlary ata-analarǵa esep berdi

Oqi otyryńyz

Qazaqstan mektepterinde «Iassaýitaný» páni oqytyla bastady

Muǵalimder endi esepti qaǵazǵa shyǵaryp qaita tapsyrýdan bosatylýy múmkin

Qazaqstandyq JOO jataqhanalarynda 10 myńnan asa oryn jetispeidi