25-28 qyrkúıek kúnderi aralyǵynda Almatyda gıbrıdti formatta Qazaqstan balalar anestezıologtary men reanımatologtarynyń respýblıkalyq ǵylymı-praktıkalyq konferensıasy ótti.
Eki kúnge boıy ótken konferensıa jumysyna Reseı, Ózbekstan, Qyrǵyzstan, Túrik, Lıtva elderiniń bilikti mamandary, medısınalyq JOO rektorlary men profesorlary, ǵylymı ınstıtýttardyń jetekshi mamandary men basshylary, sonymen qatar, óz elimizdiń jáne shet eldiń balalar anestezıologtary men reanımatologtary, balalar men neonataldyq anestezıologıa jáne qarqyndy terapıa salasynyń jetekshi mamandary, jalpy sany 500-den astam dárigerler qatysty.
Bas qosýdyń saltanatty ashylý Qazaqstan Respýblıkasynyń Densaýlyq saqtaý mınıstri Aqmaral Álnazarovanyń, «Anestezıologtar jáne reanımatologtar federasıasy» RQB prezıdenti, profesor Erǵalı Mıerbekovtyń, Pedıatrıa jáne balalar hırýrgıasy ǵylymı ortalyǵynyń Basqarma tóraǵasynyń ǵylymı jáne ınovasıalyq qyzmetter jónindegi orynbasary Lázat Manjýovanyń jáne Túrkıa, Reseı jáne t.b. shet elderden kelgen qonaqtardyń quttyqtaý alǵy sózimen ashyldy.
«Balalar densaýlyǵyn saqtaý men qorǵaý memlekettiń eń basty basym baǵyttarynyń biri bolyp tabylady. Sońǵy 3 jylda balalar ólim-jitimi azaıdy. Turaqty tendensıa sońǵy 7 aıda da saqtalady. Bul jetistikter elimizde qabyldanyp jatqan júıeli jumystardyń arqasynda múmkin boldy. Balalar anestezıologıasy men reanımatologıaqyzmetiárqashan bizdiń basty nazarymyzda. Bul sala mamandarynyń balalar densaýlyǵyn saqtaýda alar orny erek. Elimizdegi balalar anestezıologıalyq jáne reanımatologıalyq qyzmetinde Densaýlyq saqtaý mınıstrligi tarapynan úlken jumystar atqarylýda. Jyldan-jylǵa materıaldyq-tehnıkalyq baza jaqsarýda, kadr áleýeti artýda, úzdiksiz bilim alý men jas mamandardy daıyndaý qolǵa alynýda, medısınalyq JOO jańa kafedralar ashylýda», dep atap ótti quttyqtaý sózinde QR Densaýlyq saqtaý mınıstri Aqmaral Álnazarova.
«Balalar anestezıologtary men reanımatologtarynyń konferensıasy- balalar men neonataldyq anestezıologıa jáne qarqyndy terapıa salasyndaǵy jetekshi mamandarmen tájirıbe almasýǵa, biliktilikterin arttyrýǵa jáne pikirtalastarǵa belsendi qatysýǵa múmkindik beretin alań. Konferensıa baǵdarlamasyn balalar anestezıolog-reanımatologtaryna, neonatologtarǵa, transfýzıologtarǵa, efferentologtarǵa jáne densaýlyq saqtaý uıymdarynyń mamandaryna arnap jasadyq. Balalardyń densaýlyǵyn qorǵaý Qazaqstan densaýlyq saqtaý salasyn damytýdyń basym baǵyttarynyń biri bolyp tabylady. Sol sebepti, bul konferensıa otandyq medısınany damytýǵa jáne halyqaralyq baılanystardy kúsheıtýge baǵyttalǵan Qazaqstannyń búkil anestezıologıalyq qoǵamdastyǵy ómirindegi aıtýly oqıǵa bolyp tabylady. Bul bizdiń aýyr jaǵdaıdaǵy kishkentaı naýqastarymyzǵa kómektesýge qatysatyn barlyq mamandardyń birigýine, ortaq máselelerdi sheshýge múmkindik beredi», dep atap ótti «Anestezıologtar jáne reanımatologtar federasıasy» RQB prezıdenti, profesor Erǵalı Mıerbekov. Onyń aıtýynsha, búgingi tańda bul qyzmet sertıfıkattalǵan 400-den astam balalar anestezıolog-reanımatologtaryn jáne 100-den astam anestezıolog-reanımatologtardy biriktiredi.
Konferensıada elimizdegi balalar anestezıologıalyq jáne reanımatologıalyq qyzmetiniń búgingi jaǵdaıy men ózekti máseleleri, balalarǵa anestezıologıalyq kómek pen qarqyndy emdi uıymdastyrý jáne jetildirý máseleleri, balalar anestezıologıasyndaǵy neıromonıtorıng jáne neıronavıgasıa máseleleri, balalar anestezıologtary men reanımatologtarynyń bilimi men quqyqtyq aspektileri, reanımasıalyq jáne anestezıologıalyq kómekte orta býyn medısına qyzmetkerleriniń róli, pedıatrıa jáne neonatologıadaǵy anestezıolog-reanımatolog jumysynyń ózekti máseleleri, onyń ishinde barlyq negizgi baǵyttary – kardıologıalyq anestezıologıa, neıroanestezıologıa, transplantologıa jáne t.b. máseleler talqylanyp, osy salanyń ózekti máseleleri jan-jaqty qozǵaldy.
Konferensıanyń alqaly jıynynda anestezıologıa salasyna kóp jyl eńbek sińirgen elimizdiń ardager balalar anestezıologtary men reanımatologtaryna qurmet kórsetilip, osy salanyń bilikti mamandary Qazaqstan Respýblıkasy halqynyń ómiri men densaýlyǵyn saqtaý isine qosqan úlesi men minsiz adal eńbegi úshin «Ardager anestezıolog- reanımatolog» jáne «Úzdik anestezıolog-reanımatolog» tósbelgilerimen marapattaldy.
Konferensıa aıasynda eki birdeı ǵylymı ortalyqta sheteldik mamandardyń dárisimen 4 sheberlik synyby ótti. 100-den asa jas mamandar qatysqan sheberlik synypty Túrik eliniń jáne Reseı eliniń bilikti mamandary ótkizdi.
İs-sharanyń basty maqsaty – QR halqyna mamandandyrylǵan medısınalyq kómekti jaqsartý maqsatynda anestezıologtar men reanımatologtardyń jáne sabaqtas mamandyqtardyń basyn qosý, osy salada jınaqtalǵan máselelerdi talqylaý jáne olardy sheshý joldaryn izdeý.
Konferensıa QR Densaýlyq saqtaý mınıstrliginiń qoldaýymen «Anestezıologtar jáne reanımatologtar federasıasy» Respýblıkalyq qoǵamdyq birlestigijáne Pedıatrıa jáne balalar hırýrgıasy ǵylymı ortalyǵynyń uıymdastyrýymen ótkizildi.
Shara aıasynda anestezıologıa men qarqyndy emde qoldanylatyn medısınalyq qural-jabdyqtar men dári-dármekterdiń profıldi kórmesi ótti.
