Shymkentte M.Áýezov atyndaǵy Ońtústik Qazaqstan ýniversitetiniń rektory 28,5 million teńge para aldy degen kúdikpen ustaldy, - dep habarlaidy Dalanews.kz Otyrar.kz-ke silteme jasap.
Bul aqparat áleýmettik jelide taraǵan. Ondaǵy aqparatqa sáikes, rektordan bólek oqý ornyndaǵy taǵy eki adam men eki kompaniia basshysy ustalǵan.
Ekonomikalyq tergeý departamenti rektordyń ustalǵany týraly aqparatty rastaǵan. Qazirgi ýaqytta tergeý amaldary júrgizilip jatyr.
Vedomstvo basshysynyń aitýynsha, tergeýdiń qupiialylyǵyna bailanysty aqparat jariia etilmeidi. Istiń memlekettik satyp alýǵa qatysty ekeni ǵana belgili.
Aita keteiik, buǵan deiin Jambyl politehnikalyq joǵary kolledjiniń direktory Dúisenbek Ábdiraiymov para alyp jatqan jerinde ustalǵan bolatyn.
Bul týraly Orda.kz derekkózderi habarlaǵan. Antikorda ázirge bul jaily resmi aqparat joq.
Kolledj direktory para retinde naqty qansha alǵany belgisiz. Ábdiraiymov aqshany kolledjde grant berý úshin alǵan.
Dúisenbek Ábdiraiymov 63 jasta. Alty jyl boiy oblystyq bilim basqarmasyn basqardy. Keiin Jambyl politehnikalyq kolledjin basqardy. 1998 jyldan 2004 jylǵa deiin jumys istegende Ábdiraiymovtar otbasy eki jataqhana ǵimaratyn jekeshelendirdi. Sonyń negizinde politehnikým bastyǵynyń eki qyzy kolledj ashty.
Eske salaiyq, biyl joǵary oqý oryndaryndaǵy memlekettik grantqa qatysty shý bolǵan edi. Birneshe túlek sý basqan óńirler úshin bólingen kvotanyń kesirinen joǵary ball jinasa da memlekettik grantqa ilikpei qalǵan. Talapkerler Ǵylym jáne joǵary bilim ministrligin sotqa berdi.
Bul týraly belgili quqyq qorǵaýshy Halida Ájiǵulova áleýmettik jelidegi paraqshasynda jazdy.
Ájiǵulovanyń aitýynsha, keshe alǵashqy talapker Ǵylym ministrligine qarsy ákimshilik aryz túsirgen.
«Ókinishke qarai, ministrlik óz qateligin áli moiyndamai otyr, zańnamany buzyp TJ kvotasyn ruqsatsyz engizýge quqylymyz dep sanaidy. Biraq ministrlik óz kúshimen jeńip turǵan granttarynan zańsyz aiyrylǵan talapkerlerdi únemi kózge ilmei júre bere almaidy. Grant úshin jyldar boiy eńbek etken balalardyń quqyǵyn shektep, tasqynnan zardap shekken basqa balalarǵa kómektesýge bolmaidy. Basqanyń esebinen qaiyrymdylyq jasaýǵa bolmaidy», - dep jazdy quqyq qorǵaýshy.
Ájiǵulovanyń sózinshe, ýniversitetter joǵary ball alǵanyna qaramastan keibir balalarǵa ishki granttardy berýden bas tartqan. Al otbasylardyń olardy oqytýǵa aqshasy joq.
