Halyq arasynda patriottyq sezimdi arttyrýda merekeler men mádeni is-sharalardyń mańyzy zor. Bizdiń elimizde de azamattardyń otansúigishtik sezimin arttyratyn merekeler bar. Olarǵa 25 qazan Respýblika kúnin, Rámizderdi ulyqtaý jáne Táýelsizdik kúnin qosýǵa bolady. Osy rette Dalanews.kz tilshileri elimizdiń merekeleri men mádeni is-sharalaryn ózge eldikimen salystyryp, bizdiń qundylyqtardyń olardan bir mysqylda tómen emes ekenine kóz jetkizdi.
Dúniejúziniń kóptegen elderi patriottyq sezimdi arttyrý úshin ártúrli ádister men sharalardy qoldanyp keledi. Zertteý barysynda bul sharalar eldiń tarihi, mádeni jáne áleýmettik erekshelikterine bailanysty ártúrli bolyp keletinin baiqadyq.
Búginde álemdi aýzyna qaratyp otyrǵan AQSh-ta ulttyq merekeler men saltanatty sharalar kóp. Solardyń ishinde 4 shilde de toilanatyn Táýelsizdik kúniniń mańyzy zor. Amerikandyqtar osy merekeni atap ótý arqyly halyq arasynda ulttyq maqtanysh sezimi qalyptastyrýǵa kúsh salady eken. Budan bólek áskeri sherýler men túrli otshashýlar patriotizmdi nasihattaýdyń mańyzdy bóligi retinde qarastyrady.
Osy rette bizdiń elimizde uiymdastyrylatyn áskeri sherýler de el ishinde áskerdiń tanymaldyǵyn arttyra túskeni anyq. Áskerilerdiń ómiri arqyly jastardyń júreginde otanshylydyq sezimin oiatý isi Qazaqstanda jaqsy damyǵan desek bolady.
Elimiz táýelsizdigin alǵannan keiin Otan qorǵaýshylar kúnin 7 mamyrǵa aýystyrdyq. Osy mereke paida bolǵan kúninen bastap halyq arasyna tez sińip ketti. Qazirgi tańda 7 mamyr tek áskerilerdiń ǵana emes, elimizdegi er azamattardyń báriniń ortaq merekesi ainaldy. Dál osy kúni balabaqsha men mektepten bastap ákimdik pen ministrlikterde kóptegen is-sharalar uiymdastyrylyp, keń baitaq elimizde barlyq jerinde merekelik kóńil kúi ornaidy.
Aitpaqshy, AQSh mektepterinde oqýshylar kún saiyn «Pledge of Allegiance» dep atalatyn elge adaldyq antyn aitýdy ádetke ainaldyrǵanyn kinolarynan baiqap júrmiz. Aldaǵy ýaqytta bizde de jas urpaqtyń boiynda patriottyq sezimniń otyn jaǵý úshin osyndai óleń joldaryn shyǵarýymyz kerek. Tipti, ol óleń joldary bolmasa da balalardyń rýhyn kóteretin kúi bolsa da bolar edi.
Aitpaqshy, Almatyda «Zerdesh» dep atalatyn qazaq tilinde balalarǵa bilim beretin mektep bar. Eger osy mektepke jolyńyz túsip, bara qalsańyz, bilim oshaǵy qońyraýdyń ornyna kúi atasy Qurmanǵazynyń «Adaiyn» paidalanǵanyn kórip, riza bolasyz.
Árbir 45 minýt saiyn «Adai» kúii oryndalǵanda mektep oqýshylary synyptarynan shyǵyp, máz-mairam bolyp jatqanyn kórip, júrek túkpirińde bir qýanysh sezimi oianady. «Adai» kúiin kúnde tyńdap ósken balalar bolashaqta ultjandy azamat bolyp qalyptasatyny sózsiz.
Ádette toi-tomalaqqa barǵanymyzda «Adai» kúiin dúrkirete qoiyp, daiashylar úlken asymyz etti alyp shyǵatyna kózimiz úirendi ǵoi. O basta muny keibireýler qoldasa, kelesi bireýler jaratpai júrýshi edi. Bizdińshe, qazaqtyń rýyhyn oiatatyn osyndai án-kúiimiz úlken sahnalardan ǵana aityp qoimai kundelikti ómirmizde keń qoldanysqa enýi kerek. Ata-babamyzdyń án-kúiin, kiimin kúndelikti ómirimizdiń bir bólshegine ainalǵanyn qalaimyz. «Adai» kúiiniń fonynda et alyp shyqqannan bul kúidiń baǵasy túsip qalmaidy. Qaita kúi jastardyń qulaǵyna sińip, patriottyq sezim oiana túsedi.
Sondyqtan el ishinde oryn alyp jatqan osyndai úrdisterdi qoldap, qolpashtap otyrýymyz kerek. Sol kezde el azamattarynyń bári ultjandy azamatqa ainalady.
