حالىق اراسىندا پاتريوتتىق سەزىمدى ارتتىرۋدا مەرەكەلەر مەن مادەني ءىس-شارالاردىڭ ماڭىزى زور. ءبىزدىڭ ەلىمىزدە دە ازاماتتاردىڭ وتانسۇيگىشتىك سەزىمىن ارتتىراتىن مەرەكەلەر بار. ولارعا 25 قازان رەسپۋبليكا كۇنىن، رامىزدەردى ۇلىقتاۋ جانە تاۋەلسىزدىك كۇنىن قوسۋعا بولادى. وسى رەتتە Dalanews.kz تىلشىلەرى ەلىمىزدىڭ مەرەكەلەرى مەن مادەني ءىس-شارالارىن وزگە ەلدىكىمەن سالىستىرىپ، ءبىزدىڭ قۇندىلىقتاردىڭ ولاردان ءبىر مىسقىلدا تومەن ەمەس ەكەنىنە كوز جەتكىزدى.
دۇنيەجۇزىنىڭ كوپتەگەن ەلدەرى پاتريوتتىق سەزىمدى ارتتىرۋ ءۇشىن ءارتۇرلى ادىستەر مەن شارالاردى قولدانىپ كەلەدى. زەرتتەۋ بارىسىندا بۇل شارالار ەلدىڭ تاريحي، مادەني جانە الەۋمەتتىك ەرەكشەلىكتەرىنە بايلانىستى ءارتۇرلى بولىپ كەلەتىنىن بايقادىق.
بۇگىندە الەمدى اۋزىنا قاراتىپ وتىرعان اقش-تا ۇلتتىق مەرەكەلەر مەن سالتاناتتى شارالار كوپ. سولاردىڭ ىشىندە 4 شىلدە دە تويلاناتىن تاۋەلسىزدىك كۇنىنىڭ ماڭىزى زور. امەريكاندىقتار وسى مەرەكەنى اتاپ ءوتۋ ارقىلى حالىق اراسىندا ۇلتتىق ماقتانىش سەزىمى قالىپتاستىرۋعا كۇش سالادى ەكەن. بۇدان بولەك اسكەري شەرۋلەر مەن ءتۇرلى وتشاشۋلار ءپاتريوتيزمدى ناسيحاتتاۋدىڭ ماڭىزدى بولىگى رەتىندە قاراستىرادى.
وسى رەتتە ءبىزدىڭ ەلىمىزدە ۇيىمداستىرىلاتىن اسكەري شەرۋلەر دە ەل ىشىندە اسكەردىڭ تانىمالدىعىن ارتتىرا تۇسكەنى انىق. اسكەريلەردىڭ ءومىرى ارقىلى جاستاردىڭ جۇرەگىندە وتانشىلىدىق سەزىمىن وياتۋ ءىسى قازاقستاندا جاقسى دامىعان دەسەك بولادى.
ەلىمىز تاۋەلسىزدىگىن العاننان كەيىن وتان قورعاۋشىلار كۇنىن 7 مامىرعا اۋىستىردىق. وسى مەرەكە پايدا بولعان كۇنىنەن باستاپ حالىق اراسىنا تەز ءسىڭىپ كەتتى. قازىرگى تاڭدا 7 مامىر تەك اسكەريلەردىڭ عانا ەمەس، ەلىمىزدەگى ەر ازاماتتاردىڭ ءبارىنىڭ ورتاق مەرەكەسى اينالدى. ءدال وسى كۇنى بالاباقشا مەن مەكتەپتەن باستاپ اكىمدىك پەن مينيسترلىكتەردە كوپتەگەن ءىس-شارالار ۇيىمداستىرىلىپ، كەڭ بايتاق ەلىمىزدە بارلىق جەرىندە مەرەكەلىك كوڭىل كۇي ورنايدى.
ايتپاقشى، اقش مەكتەپتەرىندە وقۋشىلار كۇن سايىن «Pledge of Allegiance» دەپ اتالاتىن ەلگە ادالدىق انتىن ايتۋدى ادەتكە اينالدىرعانىن كينولارىنان بايقاپ ءجۇرمىز. الداعى ۋاقىتتا بىزدە دە جاس ۇرپاقتىڭ بويىندا پاتريوتتىق سەزىمنىڭ وتىن جاعۋ ءۇشىن وسىنداي ولەڭ جولدارىن شىعارۋىمىز كەرەك. ءتىپتى، ول ولەڭ جولدارى بولماسا دا بالالاردىڭ رۋحىن كوتەرەتىن كۇي بولسا دا بولار ەدى.
ايتپاقشى، الماتىدا «زەردەش» دەپ اتالاتىن قازاق تىلىندە بالالارعا ءبىلىم بەرەتىن مەكتەپ بار. ەگەر وسى مەكتەپكە جولىڭىز ءتۇسىپ، بارا قالساڭىز، ءبىلىم وشاعى قوڭىراۋدىڭ ورنىنا كۇي اتاسى قۇرمانعازىنىڭ «ادايىن» پايدالانعانىن كورىپ، ريزا بولاسىز.
ءاربىر 45 مينۋت سايىن «اداي» كۇيى ورىندالعاندا مەكتەپ وقۋشىلارى سىنىپتارىنان شىعىپ، ءماز-مايرام بولىپ جاتقانىن كورىپ، جۇرەك تۇكپىرىڭدە ءبىر قۋانىش سەزىمى ويانادى. «اداي» كۇيىن كۇندە تىڭداپ وسكەن بالالار بولاشاقتا ۇلتجاندى ازامات بولىپ قالىپتاساتىنى ءسوزسىز.
ادەتتە توي-تومالاققا بارعانىمىزدا «اداي» كۇيىن دۇركىرەتە قويىپ، داياشىلار ۇلكەن اسىمىز ەتتى الىپ شىعاتىنا كوزىمىز ۇيرەندى عوي. و باستا مۇنى كەيبىرەۋلەر قولداسا، كەلەسى بىرەۋلەر جاراتپاي ءجۇرۋشى ەدى. بىزدىڭشە، قازاقتىڭ رۋىحىن وياتاتىن وسىنداي ان-كۇيىمىز ۇلكەن ساحنالاردان عانا ايتىپ قويماي كۇندەلىكتى ومىرمىزدە كەڭ قولدانىسقا ەنۋى كەرەك. اتا-بابامىزدىڭ ان-كۇيىن، كيىمىن كۇندەلىكتى ءومىرىمىزدىڭ ءبىر بولشەگىنە اينالعانىن قالايمىز. «اداي» كۇيىنىڭ فونىندا ەت الىپ شىققاننان بۇل كۇيدىڭ باعاسى ءتۇسىپ قالمايدى. قايتا كۇي جاستاردىڭ قۇلاعىنا ءسىڭىپ، پاتريوتتىق سەزىم ويانا تۇسەدى.
سوندىقتان ەل ىشىندە ورىن الىپ جاتقان وسىنداي ۇردىستەردى قولداپ، قولپاشتاپ وتىرۋىمىز كەرەك. سول كەزدە ەل ازاماتتارىنىڭ ءبارى ۇلتجاندى ازاماتقا اينالادى.
