2024 jyldyń birinshi jartyjyldyǵynda Almaty oblysynda ekonomıkalyq ósim kórsetkishi aıtarlyqtaı jaqsy kórsetkishke jetti. Barlyq negizgi salalarda oń dınamıka saqtaldy, iri ınfraqurylymdyq jobalardy iske asyrý, jańa mektepter salý jáne avtomobıl joldaryn jóndeý jalǵasýda, óńirdiń ınvestısıalyq áleýeti artýda, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.
«Alda óńiri órkendetý úshin kóptegen mindet tur. Olardyń ishindegi eń bastysy – ekonomıkanyń ósý qarqynyn saqtaý jáne óńir halqynyń ómir súrý sapasyn jaqsartý», – dep atap ótti ákimdik otyrysynda Almaty oblysynyń basshysy Marat Sultanǵazıev.
Oblys ákiminiń orynbasary Rýstam Isataev óńirdiń aǵymdaǵy jaǵdaıy men damý jolyna egjeı-tegjeıli taldaý jasady. Ol qysqa merzimdi ekonomıkalyq ındıkatordyń 108,2% quraǵanyn, bul óńirge respýblıkada 5-shi oryndy ıelenýge múmkindik bergenin atap ótti.
Aýyl sharýashylyǵy (106,4%, 192,2 mlrd teńgege óndiris) jáne ónerkásip (105,2%, 884,3 mlrd teńgege ónim shyǵarý) ekonomıkanyń kóterilýine eleýli úles qosty. Óńirdiń ınvestısıalyq múmkindigi arta túsýde. Investısıalardyń ósimi ótken jylmen salystyrǵanda 21% -dy qurady.
Óńdeý ónerkásibinde 3,6% ósim baıqalady, metal buıymdarynyń, elektr jabdyqtarynyń, qaǵaz ónimderiniń jáne jeńil ónerkásip taýarlarynyń óndirisi artty. Alaıda hımıa ónerkásibinde, rezeńke jáne plasmassa buıymdaryn óndirýde, sondaı-aq 18 júıe quraýshy kásiporynnyń 5-de kórsetkishterdiń tómendeýi baıqalady.
«Kásiporyndarmen jaǵdaıdy jaqsartý úshin júıeli jumys júrgizilýde. Mysaly, memleket qosymsha energetıkalyq qýattardy alýǵa qoldaý kórsetedi, bul bolashaqta olardyń óndiris qýatyn arttyrýǵa múmkindik beredi. Osylaısha, «Azıa Agro-Fýd» zaýyty qytaılyq kompanıalarmen daıyn ónimdi jetkizý boıynsha eki iri kelisimshartqa qol qoıyp, onyń óndiristik júktemesin 50%-dan 75%-ǵa deıin arttyrdy. Zaýyttyń úzdiksiz jumysyn qamtamasyz etý úshin memlekettik-jekeshelik áriptestik sheńberinde jańa qosalqy stansa salý josparlanýda.
Óz sózinde Rýstam Isataev bıyl óńdeý ónerkásibinde 205 mıllıard teńgege 16 joba iske asyp jatqanyn atap ótti. Aýyl sharýashylyǵynda óndiristiń ósýinen basqa ınvestısıalar belsendi túrde tartylýda. 79,3 mıllıard teńgege 22 jobany iske asyrý josparlanýda. Aýyl turǵyndaryna óz bıznesin ashýǵa jáne jumys oryndaryn qurýǵa múmkindik beretin «Aýyl amanaty» baǵdarlamasyna erekshe nazar aýdarylýda.
Alaıda, oblys basshysynyń pikirinshe, baǵdarlama aıasynda tolyq qýatynda jumys istemeıtin bordaqylaý keshenderi men sút-taýar fermalaryn jumysqa qosý qajet.
Qurylys salasynda turaqty ósim baıqalady. Jumys kólemi 14,5%-ǵa artyp, 110,4 mlrd teńgege jetti. Turǵyn úıdi paıdalanýǵa berý aıtarlyqtaı ulǵaıtyldy, 600 myń sharshy metrge jýyq úı salyndy. Áleýmettik osal toptar úshin 21 mıllıard teńgege 1304 páter satyp alý josparlanýda.
Jalpy osyndaı oń úrdiske qaramastan, keıbir aýdandarda ekonomıkalyq ósý boıynsha josparly kórsetkishterge qol jetkizilmedi. Osy oraıda oblys basshysy aýdan ákimderine turaqty ósýdi qamtamasyz etý jáne josparlanǵan kórsetkishterge qol jetkizý úshin barlyq múmkindikti paıdalaný jóninde tapsyrma berdi.
