Almatyda ál-Farabı dańǵylynda bolǵan jol apaty boıynsha qylmystyq ister qozǵaldy, dep habarlaıdy Dalanews.kz.

İshki ister mınıstri Erjan Sádenovtiń tapsyrmasymen Almaty qalasynda bolǵan jol apaty alǵashqy sátten bastap erekshe baqylaýǵa alynǵan. Sonymen qatar, qazir aıtylyp jatqan barlyq ýáj tekserilip jatyr.

"Jol apaty boıynsha buǵan deıin qylmystyq is qozǵalǵan bolatyn. ZEEKR kóliginiń júrgizýshisine sot sanksıasymen qamaýǵa alý sharasy qabyldandy. Jol apaty kezinde ol jeńil dárejede masań kúıde bolǵan. Sondaı-aq, mınıstrdiń tapsyrmasy boıynsha qyzmettik tekseris bastaldy. Almaty qalasyna Ózindik qaýipsizdik departamentiniń, Ákimshilik polısıa komıtetiniń jáne Jeke qurammen jumys departamentiniń basshylary tájirıbeli qyzmetkerlermen birge jiberildi. Memlekettik nómirler zańsyz berilýi múmkin degen ýájder boıynsha Ózindik qaýipsizdik departamenti qylmystyq is qozǵady", - dep jazylǵan habarlamada.

Polısıa departamenti basshylarynyń biriniń júrgizýshisine qatysty áreketsizdik deregi boıynsha da qylmystyq is qozǵalǵan. Ol ýaqytsha ustaý ızolátoryna qamalǵan.

"Barlyq mán-jaı, sonyń ishinde medıakeńistikte taralyp jatqan aqparat jan-jaqty tekseriledi. Anyqtalǵan kemshilikterge baılanysty kadrlyq sheshimder qabyldandy. Mınıstrdiń buıryǵymen Almaty qalasy Polısıa departamenti bastyǵynyń syrtqy qyzmetter men jol qaýipsizdigin qadaǵalaıtyn orynbasary, sondaı-aq, ákimshilik polısıa jáne qoǵamdyq qaýipsizdik basqarmalarynyń basshylary qyzmetinen bosatyldy. Zańbuzýshylyqtar rastalǵan jaǵdaıda oqıǵa qatysýshylary da, laýazymdy tulǵalar da jaýapqa tartylady", - dedi departament bastyǵy - İİM resmı ókili Shyńǵys Álekeshev.

Eske salaıyq, qaıǵyly oqıǵa 21 naýryzda Almatyda ál-Farabı dańǵylynda boldy. Jol apaty saldarynan úsh adam kóz jumdy.