Almatyda bolǵan jantúrshigerlik jol apaty boiynsha tergeý jalǵasyp jatyr. Qala politsiiasynyń basshylyǵy oqiǵaǵa qatysy bar barlyq tulǵa zań aldynda jaýap beretinin málimdedi, dep habarlaidy Dalanews.kz.
Almaty qalasy politsiia departamentiniń basshysy Aidyn Qabduldinovtyń aitýynsha, qazirgi tańda negizgi kúdikti - Zeekr kóliginiń júrgizýshisi aýrýhanada jatyr. Onyń jaǵdaiy turaqtalǵan soń, tiisti protsessýaldyq sheshim qabyldanyp, qamaýǵa alynýy múmkin.
"Qylmystyq is aiasynda barlyq qajet tergeý áreketteri júrgizilýde. Júrgizýshiniń áreketine quqyqtyq baǵa beriledi. Sondai-aq osy oqiǵaǵa bailanysty politsiia qyzmetkerleriniń áreketi de tekserilip jatyr. Eger kiná anyqtalsa, tiisti sharalar qabyldanady", - dedi ol.
Sonymen qatar qoǵamda qyzý talqylanǵan taǵy bir másele - júrgizýshi Aleksandr Paktyń oqiǵa kezinde mas kúide bolǵan-bolmaǵany. Politsiia málimetinshe, kúdikti aýrýhanaǵa jetkizilgen sátte birden qan taldaýy alynǵan. Alaida onyń nátijeleri ázirge daiyn emes.
"Qan synamalary alynǵan, biraq saraptama qorytyndysy áli shyqqan joq. Nátijeler belgili bolǵanda qosymsha aqparat beriledi", - dep naqtylady departament basshysy.
Baspasóz máslihaty barysynda politsiia qyzmetkerleriniń yqtimal qatysy da nazardan tys qalǵan joq. Vedomstvo bul baǵytta qyzmettik tekseris júrgizilip jatqanyn rastady.
"Qyzmetkerlerdiń áreketine jan-jaqty quqyqtyq baǵa beriledi. Eger olardyń kinási dáleldense, eń qatań jaýapkershilik sharalary qoldanylady", - dedi Aidyn Qabduldinov.
Qazirgi tańda istiń barysy politsiia departamenti basshylyǵynyń tikelei baqylaýynda. Saraptama nátijeleri daiyn bolǵan soń jáne kúdiktiniń jaǵdaiy jaqsarǵan kezde qosymsha málimetter jariialanbaq.
Aita keteiik, 21 naýryz kúni Ál-Farabi dańǵylynda joǵary jyldamdyqpen kele jatqan Zeekr kóligi qarsy baǵytqa shyǵyp ketip, Mercedes avtokóligimen soqtyǵysqan. Qaiǵyly oqiǵa saldarynan úsh adam oqiǵa ornynda kóz jumdy. Atalǵan derek boiynsha qylmystyq is QR QK-niń 345-babynyń 4-bóligimen tirkelip, tergeý amaldary júrgizilip jatyr.
