الماتىدا بولعان جانتۇرشىگەرلىك جول اپاتى بويىنشا تەرگەۋ جالعاسىپ جاتىر. قالا پوليسياسىنىڭ باسشىلىعى وقيعاعا قاتىسى بار بارلىق تۇلعا زاڭ الدىندا جاۋاپ بەرەتىنىن مالىمدەدى، دەپ حابارلايدى Dalanews.kz.
الماتى قالاسى پوليسيا دەپارتامەنتىنىڭ باسشىسى ايدىن قابدۇلدينوۆتىڭ ايتۋىنشا، قازىرگى تاڭدا نەگىزگى كۇدىكتى - Zeekr كولىگىنىڭ جۇرگىزۋشىسى اۋرۋحانادا جاتىر. ونىڭ جاعدايى تۇراقتالعان سوڭ، ءتيىستى پروسەسسۋالدىق شەشىم قابىلدانىپ، قاماۋعا الىنۋى مۇمكىن.
"قىلمىستىق ءىس اياسىندا بارلىق قاجەت تەرگەۋ ارەكەتتەرى جۇرگىزىلۋدە. جۇرگىزۋشىنىڭ ارەكەتىنە قۇقىقتىق باعا بەرىلەدى. سونداي-اق وسى وقيعاعا بايلانىستى پوليسيا قىزمەتكەرلەرىنىڭ ارەكەتى دە تەكسەرىلىپ جاتىر. ەگەر كىنا انىقتالسا، ءتيىستى شارالار قابىلدانادى"، - دەدى ول.
سونىمەن قاتار قوعامدا قىزۋ تالقىلانعان تاعى ءبىر ماسەلە - جۇرگىزۋشى الەكساندر پاكتىڭ وقيعا كەزىندە ماس كۇيدە بولعان-بولماعانى. پوليسيا مالىمەتىنشە، كۇدىكتى اۋرۋحاناعا جەتكىزىلگەن ساتتە بىردەن قان تالداۋى الىنعان. الايدا ونىڭ ناتيجەلەرى ازىرگە دايىن ەمەس.
"قان سىنامالارى الىنعان، ءبىراق ساراپتاما قورىتىندىسى ءالى شىققان جوق. ناتيجەلەر بەلگىلى بولعاندا قوسىمشا اقپارات بەرىلەدى"، - دەپ ناقتىلادى دەپارتامەنت باسشىسى.
باسپا ءسوز ءماسليحاتى بارىسىندا پوليسيا قىزمەتكەرلەرىنىڭ ىقتيمال قاتىسى دا نازاردان تىس قالعان جوق. ۆەدومستۆو بۇل باعىتتا قىزمەتتىك تەكسەرىس جۇرگىزىلىپ جاتقانىن راستادى.
"قىزمەتكەرلەردىڭ ارەكەتىنە جان-جاقتى قۇقىقتىق باعا بەرىلەدى. ەگەر ولاردىڭ كىناسى دالەلدەنسە، ەڭ قاتاڭ جاۋاپكەرشىلىك شارالارى قولدانىلادى"، - دەدى ايدىن قابدۇلدينوۆ.
قازىرگى تاڭدا ءىستىڭ بارىسى پوليسيا دەپارتامەنتى باسشىلىعىنىڭ تىكەلەي باقىلاۋىندا. ساراپتاما ناتيجەلەرى دايىن بولعان سوڭ جانە كۇدىكتىنىڭ جاعدايى جاقسارعان كەزدە قوسىمشا مالىمەتتەر جاريالانباق.
ايتا كەتەيىك، 21 ناۋرىز كۇنى ءال-فارابي داڭعىلىندا جوعارى جىلدامدىقپەن كەلە جاتقان Zeekr كولىگى قارسى باعىتقا شىعىپ كەتىپ، Mercedes اۆتوكولىگىمەن سوقتىعىسقان. قايعىلى وقيعا سالدارىنان ءۇش ادام وقيعا ورنىندا كوز جۇمدى. اتالعان دەرەك بويىنشا قىلمىستىق ءىس ق ر قك-نىڭ 345-بابىنىڭ 4-بولىگىمەن تىركەلىپ، تەرگەۋ امالدارى جۇرگىزىلىپ جاتىر.
