Astanada bosanǵan Aljır azamaty kóshi-qon zańyn buzdy dep tanylyp, elden shyǵarylýy múmkin, dep habarlaıdy DalaNews.

Aljır azamaty Sarah Tazekrıtt Qazaqstanǵa kúıeýimen birge týrısik vızamen kelgen. Onyń elde bolý merzimi 2025 jylǵy 14 qazanda aıaqtalýy tıis bolǵan. Alaıda dál sol kúni tolǵaǵy bastalyp, eki kúnnen keıin Astanada bosanǵan.

Osydan keıin áıeldiń elden shyǵýy múmkin bolmaı qaldy. Birinshiden, medısınalyq talaptarǵa sáıkes júkti jáne jańa bosanǵan áıelderge ushýǵa shekteý qoıylady. Ekinshiden, jańa týǵan náresteniń shyǵýyna qajetti qujattar bolmaǵan.

Qujat rásimdeý birneshe aıǵa sozylǵan. Otbasy aldymen Qazaqstanda týý týraly kýálik alyp, keıin Aljırdiń dıplomatıalyq organdaryna júgingen. Biraq Astanada elshilik bolmaǵandyqtan, olardy Ózbekstanǵa baǵyttaǵan.

Soǵan qaramastan, 2026 jyldyń naýryzynda sot Sarah Tazekrıttti kináli dep tanyp, elden shyǵarý jáne Qazaqstanǵa kirýge tyıym salý týraly sheshim shyǵarǵan.

Advokat Altynbek Aıtymbetovtiń aıtýynsha, bul jaǵdaıda áıeldiń elden ketýden jaltarý nıeti bolmaǵan.

«Bul – májbúrli jaǵdaı. Ana men balanyń densaýlyǵy birinshi orynda bolýy tıis edi», – deıdi ol.

Qorǵaýshy tarap isti qaıta qaraýdy talap etip, Bas prokýratýraǵa júgingen. Olardyń pikirinshe, bul sheshim oryndalsa, bala úshin aýyr saldar týyndaýy múmkin.

Qazirgi tańda sońǵy úmit – kasasıalyq sot sheshimi.