Abai atyndaǵy Qazaq ulttyq pedagogikalyq ýniversiteti pedagogikalyq bilim berý salasyndaǵy álemdegi jetekshi joǵary oqý oryndarynyń biri retindegi mártebesin taǵy da rastady. Ýniversitet «QS World University Rankings by Subject 2026» reitinginde «Bilim berý jáne oqytý» (Education & Training) baǵytynda álem boiynsha 41-oryndy ielenip, TOP-50 qataryna endi, dep habarlaidy Dalanews.kz.
QazUPÝ osy baǵyt boiynsha TOP-50-ge engen Qazaqstandaǵy jalǵyz ýniversitet jáne Ortalyq Aziiadaǵy kóshbasshy atandy. Bul nátije ýniversitettiń zamanaýi pedagogikany damytýdaǵy jáne jańa býynnyń halyqaralyq deńgeidegi mamandaryn daiarlaýdaǵy strategiialyq rólin dáleldeidi.
QS aimaqtyq direktory Sergei Hristoliýbov jańa pándik reitingterde Ortalyq Aziianyń joǵary bilim berý júiesi úshin tarihi jetistikke qol jetkizilgenin atap ótti. Onyń ishinde, Abai ýniversiteti Aziia boiynsha úzdik ondyq qataryna enip, Ortalyq Aziia boiynsha kósh bastady. Bul nátije – QS pándik reitingterine qatysý tarihyndaǵy óńir úshin eń joǵary kórsetkish.
Jetistiktiń negizgi faktory – joǵary halyqaralyq akademiialyq bedel: bul kórsetkish boiynsha ýniversitet álemde 9-oryndy ielendi. Sońǵy bes jylda ýniversitet 410 akademiialyq nominatsiiaǵa ie boldy, olardyń 67%-y AQSh, Eýropa, Ulybritaniia, Kanada jáne TMD elderiniń jetekshi ýniversitetterimen seriktestikke bailanysty.
Eńbek naryǵy tarapynan da joǵary baǵa berildi: «Jumys berýshi bedeli» kórsetkishi boiynsha álemde 43-oryn QazUPÝ túlekteriniń halyqaralyq deńgeide suranysqa ie ekenin kórsetedi.
QS by Subject 2026 reitinginde ýniversitet basqa baǵyttar boiynsha da usynylǵan:
- «Óner jáne gýmanitarlyq ǵylymdar»: #360 oryn
- «Qazirgi tilder»: #201–250
- «Lingvistika»: #301–350 (2019 jyldan beri turaqty ósim)
- «Óner jáne dizain»: #201–300
Abai atyndaǵy QazUPÝ ǵylymi zertteýlerdi damytý, halyqaralyq seriktestikterdi keńeitý jáne negizgi kórsetkishterdi: dáieksóz alý, akademiialyq bedel, halyqaralyq zertteý jelisi jáne Hirsh indeksin arttyrý arqyly óz pozitsiialaryn nyǵaitýdy jalǵastyrýda.
Abai atyndaǵy QazUPÝ – jai ǵana oqý orny emes. Bul – jahandyq akademiialyq keńistikke integratsiialanǵan ulttyq pedagogikalyq bilim berý kóshbasshysy.
QS World University Rankings pándik reitinginiń sońǵy shyǵarylymynyń nátijelerimen kelesi silteme arqyly tanysýǵa bolady.
