Almatyda ál-Farabi dańǵylynda bolǵan jol apaty boiynsha qylmystyq ister qozǵaldy, dep habarlaidy Dalanews.kz.
Ishki ister ministri Erjan Sádenovtiń tapsyrmasymen Almaty qalasynda bolǵan jol apaty alǵashqy sátten bastap erekshe baqylaýǵa alynǵan. Sonymen qatar, qazir aitylyp jatqan barlyq ýáj tekserilip jatyr.
"Jol apaty boiynsha buǵan deiin qylmystyq is qozǵalǵan bolatyn. ZEEKR kóliginiń júrgizýshisine sot sanktsiiasymen qamaýǵa alý sharasy qabyldandy. Jol apaty kezinde ol jeńil dárejede masań kúide bolǵan. Sondai-aq, ministrdiń tapsyrmasy boiynsha qyzmettik tekseris bastaldy. Almaty qalasyna Ózindik qaýipsizdik departamentiniń, Ákimshilik politsiia komitetiniń jáne Jeke qurammen jumys departamentiniń basshylary tájiribeli qyzmetkerlermen birge jiberildi. Memlekettik nómirler zańsyz berilýi múmkin degen ýájder boiynsha Ózindik qaýipsizdik departamenti qylmystyq is qozǵady", - dep jazylǵan habarlamada.
Politsiia departamenti basshylarynyń biriniń júrgizýshisine qatysty áreketsizdik deregi boiynsha da qylmystyq is qozǵalǵan. Ol ýaqytsha ustaý izoliatoryna qamalǵan.
"Barlyq mán-jai, sonyń ishinde mediakeńistikte taralyp jatqan aqparat jan-jaqty tekseriledi. Anyqtalǵan kemshilikterge bailanysty kadrlyq sheshimder qabyldandy. Ministrdiń buiryǵymen Almaty qalasy Politsiia departamenti bastyǵynyń syrtqy qyzmetter men jol qaýipsizdigin qadaǵalaityn orynbasary, sondai-aq, ákimshilik politsiia jáne qoǵamdyq qaýipsizdik basqarmalarynyń basshylary qyzmetinen bosatyldy. Zańbuzýshylyqtar rastalǵan jaǵdaida oqiǵa qatysýshylary da, laýazymdy tulǵalar da jaýapqa tartylady", - dedi departament bastyǵy - IIM resmi ókili Shyńǵys Álekeshev.
Eske salaiyq, qaiǵyly oqiǵa 21 naýryzda Almatyda ál-Farabi dańǵylynda boldy. Jol apaty saldarynan úsh adam kóz jumdy.
