«Yntymaq-3» turǵyn aýdanyna atbasyn burǵan oblys ákimi turǵyndarymen kezdesip, turǵyn aýdannyń máselelerin talqylady, olarmen birge problemalyq jerlerdi aralap, olardyń sheshimi týraly turǵyndarǵa baıandap berdi.
Buǵan deıin aqpan aıynda osy turǵyn aýdandy aralaǵanynda oblys ákimine turǵyndar jol jóndelse, sý jáne elektrmen qamtý máseleleri sheshilse degen ótinishterin aıtqan bolatyn. Sol kezde Amandyq Batalov aıtylǵan máseleler boıynsha tıisti tapsyrmalar bergen.
Búgingi kúni sol jumystar qarqyndy atqarylyp jatyr. Jeltoqsan kóshesinde ortasha jóndeý jumystary bastalǵan, oǵan 161 mln. teńge bólingen, jolǵa asfált tóseledi. Aýdannyń uzyndyǵy 30 shaqyrym bolatyn 31 kóshesine bıylǵy jyly jergilikti búdjetten 655 mln. teńge qarastyrylyp otyr.
Jýyq arada sýmen qamtý máselesi de sheshiledi. Eki aptadan soń barlyq qajetti tekserý jumystarynan soń «Yntymaqqa» sý qosylady. Jobanyń jalpy quny – 203,4 mln. teńge, júıeniń uzyndyǵy – 16,1 km.
Ótken joly turǵyndar elektr jaryǵynyń jıi óshetinin aıtyp shaǵym bildirgen. Bul máseleniń de túıini tarqamaq. Elektrmen qamtý júıesiniń jalpy uzyndyǵy 20 km, jobanyń quny – 289,5 mln. teńge. Qazirgi kezde jumystardyń 84 % aıaqtaldy, shildeniń sońyna qaraı jańa transformator qoıylady.
Yntymaqtyqtar osy joly oblys ákiminen úıge sý kirgizý máselesin sheshýdi surady. Olar árbir úıge sý kirgizý aqysyn úı ıesi ózi tóleıtinin biletindikterin, turǵyn aýdanda tek bir ǵana traktor bolǵandyqtan, kezekti uzaq kútýge týra keletinin jáne jalǵyz traktor jumys aqysynyń qunyn tym sharyqtatyp jibergenin aıtty. Amandyq Batalov qala ákimi Ǵalymjan Ábdiraıymovqa jumysty qoljetimdi baǵada jyldam ári sapaly atqaratyn merdiger kompanıa tabýdy tapsyrdy. Bul jerde avtobýs qatynasy jaǵynan da problemalar týyndap jatady. Bul máseleni baqylaýǵa alý men qysqa merzimde sheshý qala ákimine júkteldi. Sol sıaqty damý josparyna sáıkes munda aldaǵy ýaqytta balabaqsha, mektep, aýyldyq dárigerlik ambýlatorıa salynady.
Munan soń oblys ákimi «Jastar - 2» turǵyn aýdanyna bardy. Munda da sýmen, elektrmen qamtý, káriz júıesin tóseý jumystary jalǵasyp jatyr.
Jol jóndeý máselesi de sheshimin tapty. Turǵyn aýdanda qazir 13 kóshe bar. onyń 2-eýi – Nurly jol men Qonaev kósheleri asfálttalady, oǵan 82 mln. teńge bólindi. Qalǵan 11 kóshege qıyrshyq tas tóseldi, oǵan 150 mln. teńge qarastyryldy.
Qarasha aıyna qaraı sýmen qamtý jolǵa qoılady. Qazirgi kezde 20,8 shaqyrymnyń 15,3 shaqyrymy tartylǵan. Jumystar 73,5 % atqaryldy.
Syrtqy elektrmen qamtý júıesi de jasalýda, qyrkúıek aıynda jumystar aıaqtalýy tıis. Tartylýy tıis 52,3 shaqyrymnyń 30,5 shaqyrymy tartyldy. Jobanyń jalpy quny – 364,1 mln. teńge.
Káriz júıelerin tóseý jalǵasyp jatyr. Onyń jalpy uzyndyǵy 9,2 km.
Turǵyn aýdanda 900 oryndyq mektep salynady, ony jobalaýǵa konkýrs jarıalandy.
Al «Shaıqorǵanǵa» gaz ákelindi, jaqyn kúnderi saıajaılyqtar óz úılerin kógildir otynmen jylytatyn bolady. Elektrmen qamtý jumystary aıaqtalyp qaldy. Qazir úılerge eseptegish quraldar ornatylyp jatyr. Gazǵa qosylǵan abonentter sany – 622. Transformator men Naberejnaıa kóshelerine asfált tóseýge 81 mln. teńge bólindi. Sý qubyry júıeleri de tóselýde. Jalpy uzyndyǵy – 13,1 km.
Aqpan aıynda oblys ákimi turǵyndardyń ótinishi boıynsha «Qyzyl tas» saıajaıyn qalamen jalǵastyryp turatyn jańa kópir salýdy tapsyrǵan. Sol sıaqty № 14 avtobýstyń sońǵy aıaldamasy mańyna ekinshi kópir salý da júktelgen bolatyn. Osy eki nysannyń qurylysyna tender jarıalanyp, jobalyq-zertteý jumystaryna qarjy bólindi. Sonymen birge turǵyndardyń ótinishimen sońǵy aıaldama ornatyldy.
Saıajaılardy aralap, birqatar tapsyrmalar bergen oblys ákimi Amandyq Batalov:
– Búgin qala shetindegi aýdandar men saıajaılardy taǵy bir aralap shyǵyp, buǵan deıin bergen tapsyrmalarymnyń oryndalý barysymen tanystym. Injenerlik jeliler der kezinde tartylmaǵandyqtan, turǵyndar sý men elektr jelilerine qol jetkize almaı otyrdy. Barlyq talaptar men normalar eskerile otyryp, meniń tapsyrmalarym boıynsha jumys jasalyp jatyr. «Yntymaq-3» turǵyn aýdanynyń problemalyq máselelerin sheshýdiń ózine ǵana jergilikti búdjetten 1 mlrd. teńgeden astam qarjy bólindi. «Shaıqorǵanǵa» gaz keldi. Áleýmettik nysandar salýdyń qajet ekenin de esten shyǵarmaımyz. Biz barlyq qajetti ınfraqurylymdy damytýdy jalǵastyra beremiz, – dedi A. Batalov.
