Negizgi másele boiynsha oblys ákiminiń orynbasary Aidarbek Baijanov baiandama jasady. Baiandamashynyń aitýynsha, 2018-2019 jyldarǵy jylytý maýsymy aiaqtala salysymen aldaǵy 2019-2020 jyldarǵy jylytý maýsymyna daiyndyq bastalyp, oǵan 10,3 mlrd. teńge bólingen. Jalpy oblys halqynyń kómirge qajettiligi 1,7 mln. tonnany quraidy. Biylǵy jyly kómir jetispeýshiligin boldyrmaý jáne baǵany negizsiz ósirmeý úshin Shubarkól jáne Qarajyra razrezderinen biryńǵai operator qyzmeti boiynsha kómirdi tikelei jetkizetin eki kompaniia aiqyndaldy. Bekitilgen kestege sáikes maýsymnan bastap tasymaldana bastaidy. Biylǵy jyly óńirde 14,8 shaqyrymnan astam jylýmen qamtý júiesi salynyp, jańǵyrtylady. Aldaǵy úsh jylǵa 212 kóp qabatty turǵyn úidi 56 blok-modýldi gazben jylytylatyn qazandyq ornatý arqyly jylytý júiesine qosý jospary ázirlendi. Biylǵy jyly sonyń ishinde 88 kóp qabatty turǵyn úi úshin 16 BMQ salý josparlanyp otyr.
Oblys ákimi Talǵar jáne Qarasai aýdandaryndaǵy kóp qabatty turǵyn úilerdi jylytý júiesine qosý jumysynyń jaiyn surady. Orynbasarynyń jaýabyna kóńili tolmaǵan A. Batalov: «Jylytý júiesine qosylmaǵan kóp qabatty úilerdi túgel qamtityndai arnaiy baǵdarlama jasańdar, jumysty josparly túrde kezeń-kezeńimen iske asyraiyq dep qansha ret aittym. Áli kúnge ondai baǵdarlama týraly usynystaryńdy kórgen joqpyn. Bul jumystyń jaýapkershiligin sezinip júrgen joqsyńdar!», - dep sala basshylaryn tezine aldy. Taldyqorǵan qalasyn gazdandyrý isiniń de shaban júrip jatqanyna osy salaǵa jetekshilik etetin basshylardyń jumysty durys uiymdastyra almai otyrǵandyǵynan ekenin shegelep aitty.
Munan soń baiandamany talqylaý úshin minbege qala ákimi Ǵalymjan Ábdiraiymov shaqyryldy. Qala ákimi ótken jylǵy jylytý maýsymynyń qorytyndysymen tanystyryp, aldaǵy mindetterge toqtaldy. Jylýmen, sýmen jáne elektrmen qamtý júieleriniń daiyndyǵy, otyn jetkizý, gazdandyrý barysy týraly aityp berdi.
– Qala boiynsha eń aldymen gazdandyrý isine jańa ákim retinde belsene kirisýiń kerek. Mynadai baiaý júrispen is ónbeidi. Bul isti shiraq qolǵa al! – dedi A. Batalov qala ákimi Ǵ. Ábdiraiymovqa qarata.
Sonymen qatar aýdan, qala ákimderine jáne sala basshylaryna oblystaǵy jylytý maýsymyna bilim berý jáne densaýlyq saqtaý salasy nysandarynyń daiyndyǵy jiti nazarda bolýyn tapsyrdy.
–Ótken jylytý maýsymy oidaǵydai ótti. Degenmen aldaǵy jylytý kezeńine daiyndyǵymyz nashar. Jedel sharalar qabyldaýymyz kerek. Qys bizdiń sylbyrlyǵymyzdy, ústirt qaraǵanymyzdy kótermeidi. Sondyqtan árbir aýdan, qala ákimderi óz aýmaqtaryndaǵy qoimalarǵa kómirdiń, áleýmettik sala nysandaryna qajetti otyn túrleriniń der kezinde jetkilikti deńgeide jetkizilýin qatań qadaǵalasyn. Kómir baǵasynyń negizsiz ósýine jol bermeýimiz kerek, bul da baqylaýda bolýy tiis másele. Ortalyqtandyrylǵan jylytý júiesine qosylmaǵan kóp qabatty úilerdiń máselesin kún tártibinen túsirmei, nátijeli sheshýdi tapsyramyn. Taldyqorǵan qalasynyń gazdandyrylý qarqynyna kóńilim tolmaidy, óte baiaý,sondyqtan osy isti shiratýdy talap etemin, – dedi A. Batalov.
Jiyn sońynda ótken jylǵy jylytý kezeńiniń sapaly ótýine úles qosqan birqatar kommýnaldyq sala qyzmetkerleri marapattaldy. Atap aitqanda Panfilov aýdany 1-shi, Qarasai aýdany – 2-shi, Alakól úshinshi dárejeli diplomdarmen marapattalyp, arnaiy kommýnaldyq tehnikalar syiǵa tartyldy. Sol siiaqty oblys ákiminiń qurmet gramotalary men alǵys hattary, baǵaly syilyqtar jylýmen qamtý salasy nysandaryna jumys isteitin qarapaiym eńbek adamdaryna berildi.
