نەگىزگى ماسەلە بويىنشا وبلىس اكىمىنىڭ ورىنباسارى ايداربەك بايجانوۆ بايانداما جاسادى. بايانداماشىنىڭ ايتۋىنشا، 2018-2019 جىلدارعى جىلىتۋ ماۋسىمى اياقتالا سالىسىمەن الداعى 2019-2020 جىلدارعى جىلىتۋ ماۋسىمىنا دايىندىق باستالىپ، وعان 10،3 ملرد. تەڭگە بولىنگەن. جالپى وبلىس حالقىنىڭ كومىرگە قاجەتتىلىگى 1،7 ملن. توننانى قۇرايدى. بيىلعى جىلى كومىر جەتىسپەۋشىلىگىن بولدىرماۋ جانە باعانى نەگىزسىز وسىرمەۋ ءۇشىن شۇباركول جانە قاراجىرا رازرەزدەرىنەن ءبىرىڭعاي وپەراتور قىزمەتى بويىنشا كومىردى تىكەلەي جەتكىزەتىن ەكى كومپانيا ايقىندالدى. بەكىتىلگەن كەستەگە سايكەس ماۋسىمنان باستاپ تاسىمالدانا باستايدى. بيىلعى جىلى وڭىردە 14،8 شاقىرىمنان استام جىلۋمەن قامتۋ جۇيەسى سالىنىپ، جاڭعىرتىلادى. الداعى ءۇش جىلعا 212 كوپ قاباتتى تۇرعىن ءۇيدى 56 بلوك-مودۋلدى گازبەن جىلىتىلاتىن قازاندىق ورناتۋ ارقىلى جىلىتۋ جۇيەسىنە قوسۋ جوسپارى ازىرلەندى. بيىلعى جىلى سونىڭ ىشىندە 88 كوپ قاباتتى تۇرعىن ءۇي ءۇشىن 16 بمق سالۋ جوسپارلانىپ وتىر.
ا. بايجانوۆتىڭ مالىمەتىنە سۇيەنسەك، وبلىستا گازبەن قامتۋعا جاتاتىن 474 ەلدى مەكەن بولسا، سونىڭ 142ء-سى گازداندىرىلعان. بۇگىنگى كۇنگە ەلدى مەكەندەردى كوگىلدىر وتىنمەن قامتۋ دەڭگەيى 30%-عا جەتكەن. ال بيىلعى جىلعى مەجە – بۇل كورسەتكىشتى 35%-عا كوتەرۋدى كوزدەپ وتىر. الداعى ۋاقىتتا اقسۋ، سارقان جانە الاكول اۋداندارىنىڭ 74 ەلدى مەكەنىن گازداندىرۋ ءۇشىن «ءۇشارال» اگتس-ىمەن «تالدىقورعان – ءۇشارال» مگ قۇرىلىسىنىڭ جسق دايىنداۋ باستالدى، وعان وبلىستىق بيۋدجەتتەن 150 ملن. تەڭگە بولىنگەن. ءقازىر تالدىقورعان قالاسىندا كوگىلدىر وتىنعا قوسىلعان ابونەنتتەر سانى – 3700، ال جىل سوڭىنا دەيىن گازبەن قامتىلعاندار سانىن 5500-گە جەتكىزۋ جوسپارلانعان.
وبلىس اكىمى تالعار جانە قاراساي اۋداندارىنداعى كوپ قاباتتى تۇرعىن ۇيلەردى جىلىتۋ جۇيەسىنە قوسۋ جۇمىسىنىڭ جايىن سۇرادى. ورىنباسارىنىڭ جاۋابىنا كوڭىلى تولماعان ا. باتالوۆ: «جىلىتۋ جۇيەسىنە قوسىلماعان كوپ قاباتتى ۇيلەردى تۇگەل قامتيتىنداي ارنايى باعدارلاما جاساڭدار، جۇمىستى جوسپارلى تۇردە كەزەڭ-كەزەڭىمەن ىسكە اسىرايىق دەپ قانشا رەت ايتتىم. ءالى كۇنگە ونداي باعدارلاما تۋرالى ۇسىنىستارىڭدى كورگەن جوقپىن. بۇل جۇمىستىڭ جاۋاپكەرشىلىگىن سەزىنىپ جۇرگەن جوقسىڭدار!»، - دەپ سالا باسشىلارىن تەزىنە الدى. تالدىقورعان قالاسىن گازداندىرۋ ءىسىنىڭ دە شابان ءجۇرىپ جاتقانىنا وسى سالاعا جەتەكشىلىك ەتەتىن باسشىلاردىڭ جۇمىستى دۇرىس ۇيىمداستىرا الماي وتىرعاندىعىنان ەكەنىن شەگەلەپ ايتتى.
مۇنان سوڭ باياندامانى تالقىلاۋ ءۇشىن مىنبەگە قالا اكىمى عالىمجان ءابدىرايىموۆ شاقىرىلدى. قالا اكىمى وتكەن جىلعى جىلىتۋ ماۋسىمىنىڭ قورىتىندىسىمەن تانىستىرىپ، الداعى مىندەتتەرگە توقتالدى. جىلۋمەن، سۋمەن جانە ەلەكترمەن قامتۋ جۇيەلەرىنىڭ دايىندىعى، وتىن جەتكىزۋ، گازداندىرۋ بارىسى تۋرالى ايتىپ بەردى.
وبلىس اكىمى «باسقۋات» قازاندىعىنىڭ قازىرگى جاي-كۇيى، گازعا قوسۋ مۇمكىندىكتەرى تۋرالى سۇرادى. تالدىقورعان قالاسىنىڭ جىلىتۋ ماۋسىمىن ويداعىداي وتكىزۋدە باسا ءمان بەرەتىن جايتتارعا دا نازار اۋداردى. سول سياقتى تروتۋارلاردىڭ تازالانبايتىنى تۋرالى شاعىم قالا تۇرعىندارىنان كوپ تۇسەتىنىن دە ەسكە سالدى.
– قالا بويىنشا ەڭ الدىمەن گازداندىرۋ ىسىنە جاڭا اكىم رەتىندە بەلسەنە كىرىسۋىڭ كەرەك. مىناداي باياۋ جۇرىسپەن ءىس ونبەيدى. بۇل ءىستى شيراق قولعا ال! – دەدى ا. باتالوۆ قالا اكىمى ع. ءابدىرايىموۆقا قاراتا.
سونىمەن قاتار اۋدان، قالا اكىمدەرىنە جانە سالا باسشىلارىنا وبلىستاعى جىلىتۋ ماۋسىمىنا ءبىلىم بەرۋ جانە دەنساۋلىق ساقتاۋ سالاسى نىساندارىنىڭ دايىندىعى ءجىتى نازاردا بولۋىن تاپسىردى.
–وتكەن جىلىتۋ ماۋسىمى ويداعىداي ءوتتى. دەگەنمەن الداعى جىلىتۋ كەزەڭىنە دايىندىعىمىز ناشار. جەدەل شارالار قابىلداۋىمىز كەرەك. قىس ءبىزدىڭ سىلبىرلىعىمىزدى، ءۇستىرت قاراعانىمىزدى كوتەرمەيدى. سوندىقتان ءاربىر اۋدان، قالا اكىمدەرى ءوز اۋماقتارىنداعى قويمالارعا كومىردىڭ، الەۋمەتتىك سالا نىساندارىنا قاجەتتى وتىن تۇرلەرىنىڭ دەر كەزىندە جەتكىلىكتى دەڭگەيدە جەتكىزىلۋىن قاتاڭ قاداعالاسىن. كومىر باعاسىنىڭ نەگىزسىز وسۋىنە جول بەرمەۋىمىز كەرەك، بۇل دا باقىلاۋدا بولۋى ءتيىس ماسەلە. ورتالىقتاندىرىلعان جىلىتۋ جۇيەسىنە قوسىلماعان كوپ قاباتتى ۇيلەردىڭ ماسەلەسىن كۇن تارتىبىنەن تۇسىرمەي، ناتيجەلى شەشۋدى تاپسىرامىن. تالدىقورعان قالاسىنىڭ گازداندىرىلۋ قارقىنىنا كوڭىلىم تولمايدى، وتە باياۋ،سوندىقتان وسى ءىستى شيراتۋدى تالاپ ەتەمىن، – دەدى ا. باتالوۆ.
جيىن سوڭىندا وتكەن جىلعى جىلىتۋ كەزەڭىنىڭ ساپالى وتۋىنە ۇلەس قوسقان ءبىرقاتار كوممۋنالدىق سالا قىزمەتكەرلەرى ماراپاتتالدى. اتاپ ايتقاندا پانفيلوۆ اۋدانى 1ء-شى، قاراساي اۋدانى – 2ء-شى، الاكول ءۇشىنشى دارەجەلى ديپلومدارمەن ماراپاتتالىپ، ارنايى كوممۋنالدىق تەحنيكالار سىيعا تارتىلدى. سول سياقتى وبلىس اكىمىنىڭ قۇرمەت گراموتالارى مەن العىس حاتتارى، باعالى سىيلىقتار جىلۋمەن قامتۋ سالاسى نىساندارىنا جۇمىس ىستەيتىن قاراپايىم ەڭبەك ادامدارىنا بەرىلدى.
