– Keshe qazaqtyń ulttyq aspaby dombyra týraly kóp málimet aldym. Búgin bul mýzykalyq aspapty osy jerdiń uly aqyny, kompozıtory – Abaıdyń únimen baılanystyrǵym keledi. Ol ózinen keıin dindarlyqty sińirgen týyndylar qaldyrdy. Abaı adamgershiliktiń bastaýy – mahabbat pen ádildik ekenin eske salady. Qandaı jaǵdaı bolmasyn zorlyq-zombylyqty aqtaýǵa bolmaıdy. Qudaı barshamyzdy soǵysqa emes, beıbitshilikke úndeıdi, – dedi Rım papasy.
Sondaı-aq ol Abaı bilim men tanym kókjıegin keńeıtýge shaqyrǵanyn atap ótti.
– Abaı bilim-ǵylymǵa umtylyp, ózgelerdiń mádenıeti men dástúrin tanýǵa, tarıhy men ádebıetin oqýǵa úndedi, – dedi Rım papasy.
Aıta keteıik, eki kúnge sozylatyn sezge 50 elden 100-den astam delegasıa, onyń ishinde ıslam, hrıstıan, býddızm, ıýdaızm, ındýızm, daosızm, zoroastrızm, sıntoızm dinderiniń ókilderi, sondaı-aq saıasatkerler men qoǵam qaıratkerleri, halyqaralyq uıym músheleri kelgen.
Dinı forýmǵa Rım Papasy Fransıskten bólek, Ál-Azhardyń Joǵarǵy ımamy Ahmed Mohammed Ahmed at-Taıeb, Ierýsalım Patrıarhy III Teofıl, Ashkenazdyń bas ravvıni Davıd Laý, Izraıldiń Bas sefard ravvıni Ishak Iosıf jáne basqa da dinı jetekshiler, birqatar halyqaralyq uıym ókilderi qatysýda.
