2026 jyly toilanatyn ataýly kúnder men mereitoilar belgili boldy, dep habarlaidy Dalanews.kz e-history.kz saityna silteme jasap.
2026 jyly Qazaqstan men álem órkenietine ólsheýsiz úles qosqan tulǵalardyń, óner men ǵylym qairatkerleriniń, memleket jáne qoǵam qairatkerleriniń aitýly mereitoilary atalyp ótedi. Olar jai ǵana datalar emes, ult jady men rýhani kodtyń mańyzdy bólshegi. Sondai mereitoi ieleriniń ómir joly men murasyna kóz júgirtip kóreiik.
5 qańtar – Qaiym Muqamedhanulynyń týǵanyna 110 jyl (1916–2004). Qazaq ádebiettanýyndaǵy abaitaný ǵylymynyń negizin qalaǵan kórnekti ǵalym, zertteýshi, jazýshy ári dramatýrg. Ol Abai shyǵarmashylyǵyn ǵylymi ainalymǵa túsirip, aqyn shákirtteriniń murasyn túgendep, qazaq rýhaniiatynyń tutas bir salasyn jańa deńgeige kóterdi. Elimizdiń táýelsizdik dáýirinde mádeni murany saqtaýǵa baǵyttalǵan tabandy eńbegimen de erekshe tanyldy.
7 qańtar – Talǵat Musabaevtyń týǵanyna 75 jyl (1951–2025). Halyqaralyq ǵarysh keńistigine úsh ret ushyp, júzdegen táýlik orbitada bolǵan Qazaqstannyń tuńǵysh kásibi ǵaryshkerleriniń biri. Halyq qaharmany atanǵan ol ǵylym, injeneriia jáne ǵarysh tehnologiialaryn damytýǵa zor úles qosyp, táýelsiz Qazaqstandy ǵarysh derjavalary qataryna jetelegen aitýly tulǵa.
9 aqpan – Muqaǵali Maqataevtyń týǵanyna 95 jyl (1931–1976). Qazaq poeziiasynyń eń biik shyńdarynyń biri sanalatyn lirik aqyn, erekshe poetikalyq oilaýymen milliondaǵan oqyrmannyń júregin jaýlaǵan tulǵa. Onyń muńy men súiinishi, ómir men mahabbat týraly tereń tolǵanystary ulttyq ádebietti jańa beleske kóterip, qazaq sóz óneriniń kórkemdik shegin keńeitti.
10 aqpan – Keńes Dúisekeevtiń týǵanyna 80 jyl (1946–2020). Saz áleminde ózindik qoltańbasyn qaldyrǵan talantty kompozitor, ánderi arqyly qazaq estradasyn jańǵyrtyp, kóptegen óner juldyzdarynyń shyǵarmashylyǵyna jol ashqan qairatker. Onyń áýenderi ulttyq sezim men zamanaýi mýzykalyq izdenisti sheber úilestirip, keń aýditoriiaǵa súiikti óner týyndylaryna ainaldy.
25 aqpan – Káýken Kenjetaevtyń týǵanyna 110 jyl (1916–2008). Ánshi, akter, rejisser retinde qazaq teatr jáne kino óneriniń damýyna ólsheýsiz úles qosqan óner sańlaǵy. Onyń sahnadaǵy tabiǵi bolmysy, dramalyq jáne mýzykalyq rólderdi birdei meńgergen sheberligi ult mádenietinde airyqsha oryn alady.
25 aqpan – Merýert Ótekeshova 75 jasta (1951). Qazaq kinosy men teatrynda aishyqty obrazdar somdap, halyqtyń ystyq yqylasyna bólengen talantty aktrisa. Qazaqtyń Qyz Jibegi. Kásibi sheberligi, tabiǵi qýaty jáne sahnalyq mádenietimen birneshe býyn kórermenge umytylmas áser qaldyrǵan tulǵa.
28 aqpan – Jambyl Jabaevtyń týǵanyna 180 jyl (1846–1945). Qazaq poeziiasynyń dástúrli arnasyn keńeitip, ony jańa tarihi keńistikke alyp shyqqan uly tulǵa. Aqyn, aitysker, abyz jyraý ári jaýynger jyrshy. Ol zamannyń tynysyn, halyqtyń muratyn, qoǵamnyń kúrdeli kezeńderin poetikalyq qýatpen bederledi. Uly jyraý óz ustazy Súiinbai Aronulynyń dástúrin jalǵap, ony jańa biikke kóterdi. Al soǵys jyldarynda onyń jalyndy jyrlary maidandaǵy jaýyngerlerge rýh berip, eldi jigerlendirgen úmittiń, tózimniń, birliktiń únine ainaldy.
5 naýryz – Álihan Bókeihannyń týǵanyna 160 jyl (1866–1937). Ult-azattyq qozǵalystyń kóshbasshysy, Alash Orda úkimetiniń jetekshisi, entsiklopedist ǵalym ári pýblitsist. Ol qazaq qoǵamyn jańǵyrtý, ulttyq memlekettilik ideiasyn qalyptastyrý jolynda kúresip, saiasi, ǵylymi, ekonomikalyq oi-óristiń damýyna ólsheýsiz úles qosty. Álihannyń murasy – táýelsizdik ideiasynyń máńgilik tuǵyry.
7 naýryz – Satybaldy Narymbetovtiń týǵanyna 80 jyl (1946–2021). Qazaq kino óneriniń kórnekti tulǵasy, rejisser, kinodramatýrg ári jazýshy. Onyń «Mustafa Shoqai», «Kózimniń qarasy» sekildi filmderi ulttyq tarih pen adam tabiǵatyn tereń tolǵaýmen erekshelenedi. Narymbetov shyǵarmashylyǵy – qazaq kinosynyń kórkem deńgeiin kótergen qundy mektep.
8 naýryz – Manarbek Erjanovtyń týǵanyna 125 jyl (1901–1966). Qazaq án óneriniń shoqtyǵy biik maitalmany, akter, kompozitor, kúishi, halyq ártisi. Onyń qońyr daýsy men sahnalyq sheberligi ult mýzykasyna jańa tynys syilap, halyq murasyn keńinen tanytty. Manarbektiń oryndaýshylyq mádenieti búginde qazaq óneriniń altyn qoryna engen.
13 naýryz – Qairat Rysqulbekovtiń týǵanyna 60 jyl (1966–1988). 1986 jylǵy Jeltoqsan kóterilisiniń simvolyna ainalǵan erjúrek jas, erkindik pen ádildik jolynda kúresken qaisar tulǵa. Onyń qysqa ǵumyrynda kórsetken batyldyǵy men azamattyq erligi qazaq jastarynyń táýelsizdikke degen jigerin oiatqan tarihi oqiǵa retinde este qaldy.
22 naýryz – Mákilqoja Qulanbaevtyń týǵanyna 100 jyl (1926–1993). Kino jáne teatr óneriniń sarabdal akteri, Qazaq KSR-niń eńbek sińirgen ártisi. Onyń beineleri ulttyq sahna óneriniń damýyna airyqsha serpin berip, akterlik mekteptiń qalyptasýyna úles qosty. Tabiǵi talant pen kásibi shyńdalýdyń úilesimi Qulanbaevty qazaq mádenietiniń kórnekti ókiline ainaldyrdy.
25 naýryz – Qarshyǵa Ahmediiarovtyń týǵanyna 80 jyl (1946–2010). Kúishilik mekteptiń kórnekti ókili, dombyrashy, Qazaqstannyń halyq ártisi. Onyń oryndaýshylyq sheberligi, kúrdeli kúilerdi jańa qyrynan damytýy jáne shákirt tárbieleýdegi eńbegi qazaq mýzykasynyń ósip-órkendeýine úlken úles qosty.
7 sáýir – Qajymuqan Muńaitpasulynyń týǵanyna 155 jyl (1871–1948). Qazaqtan shyqqan tuńǵysh kásipqoi balýan, álem arenalaryn baǵyndyrǵan dara sport sheberi. Ol birneshe eldiń chempiony atanyp, ulttyq kúsh ónerin halyqaralyq deńgeide tanytqan. Qajymuqannyń erligi men qaisar minezi halyqtyq batyrlyq uǵymynyń simvolyna ainalyp, onyń aty qazaq rýhynyń myzǵymas belgisi retinde este qaldy.
15 sáýir – Shómishbai Sarievtiń týǵanyna 80 jyl (1946–2021). Tereń lirikasymen, názik muń men syrǵa toly jyrlarymen erekshelenetin aqyn, eńbek sińirgen qairatker. Ol shyǵarmashylyq jolynda qazaq óleńine jańa boiaý, jańa tynys ákelip, sóz ónerin biiktetken tulǵa. Filosofiialyq oi men jan jylýyn toǵystyrǵan jyrlary oqyrman júreginen erekshe oryn aldy.
24 sáýir – Qabdesh Jumadilovtiń týǵanyna 90 jyl (1936–2021). Qazaq ádebietiniń klassigi, tarihi romandardyń sheberi, halyq jazýshysy. Onyń shyǵarmalary ult taǵdyry, eldik bolmys, shekaranyń arǵy-bergi betinde ómir súrgen qazaqtardyń tarihy men muńyn tereńnen tolǵaidy. Qalamgerdiń ádebi murasy – qazaq prozasynyń eń biik jetistikteriniń biri.
25 sáýir – Kúlásh Ahmetovanyń týǵanyna 80 jyl (1946–2025). Patriottyq rýh pen názik lirizmdi ushtastyrǵan aqyn, Memlekettik syilyqtyń laýreaty. Ol qazaq poeziiasyna ózindik ún men jiger ákelip, ulttyq minezdi aiqyn kórsetetin jyrlarymen tanyldy. Aqynnyń shyǵarmashylyǵy birneshe býyn oqyrmanǵa shabyt syilap keledi.
29 sáýir – Ahmet Jubanovtyń týǵanyna 120 jyl (1906–1968). Ulttyq mýzyka óneriniń irgesin qalaýshylardyń biri, kórnekti ǵalym, kompozitor jáne dirijer. Ol qazaq mýzykasyn ǵylymi júiege túsirip, Abai atyndaǵy opera jáne balet teatrynyń, Qurmanǵazy atyndaǵy halyq aspaptary orkestriniń damýyna úlken úles qosty.
5 mamyr – Fatima Balǵaevanyń týǵanyna 100 jyl (1926–2005). Qazaqtyń qobyz ónerin kásibi deńgeige kóterip, oryndaýshylyq mektebin qalyptastyrǵan kórnekti qobyzshy, halyq ártisi. Ustazdyq jolynda kóptegen talantty shákirt tárbielep, ulttyq mýzykanyń damýyna eleýli yqpal etti. Onyń óneri – qobyzdyń syrly úni men dástúrin jańǵyrtqan altyn arqaý.
6 mamyr – Iliia Jaqanov 90 jasta (1936). Jazýshy, kompozitor, óner zertteýshisi, qazaq mýzykasynyń tarihyn zerdelegen iri tulǵa. Onyń zertteýleri men ánshilik murasy ulttyq ónerdiń biikteýine jol ashty. «Eki juldyz», «Ásel», «Jailaýkól keshteri» sekildi týyndylary halyq júreginen myqtap oryn alǵan.
6 mamyr – Jaqsylyq Úshkempirovtiń týǵanyna 75 jyl (1951–2020). Grek-rim kúresinen olimpiada chempiony, qazaq sportyn álemge tanytqan dańqty palýan. Onyń eńbekqorlyǵy, tabandylyǵy men jeńiske degen jigeri jas sportshylarǵa úlgi bolyp keledi. Úshkempirov – sport tarihynda esimi altyn árippen jazylǵan qaisar tulǵa.
18 mamyr – Oljas Súleimenov 90 jasta (1936). Aqyn, qoǵam qairatkeri, túrkitanýshy, halyqaralyq deńgeide tanylǵan oishyl. «Az i Ia» eńbegi men poeziialyq týyndylary arqyly ol ulttyq tarih pen mádenietti jańasha túsinýge jol ashty. Qoǵamdyq belsendiligi men rýhani kóshbasshylyǵy ony qazaq ziialylarynyń aldyńǵy qatarly ókilderiniń qataryna qosty.
4 shilde – Ermek Serkebaevtyń týǵanyna 100 jyl (1926–2013). Qazaq opera óneriniń álemdik deńgeide tanylǵan juldyzy, KSRO jáne Qazaqstannyń halyq ártisi. Onyń barqyt daýysy, minsiz vokaldyq tehnikasy men sahnalyq mádenieti qazaq mýzykasyn jańa biikke kóterdi. Serkebaevtyń óneri – ulttyq opera mektebiniń qalyptasýyna jol ashqan, ult mádenietinde óshpes iz qaldyrǵan dara mura.
17 shilde – Latif Hamididiń týǵanyna 120 jyl (1906–1983). Qazaq mýzykasynyń damýyna ólsheýsiz úles qosqan kompozitor, pedagog, halyq ártisi. «Meniń Qazaqstanym» ánuranynyń avtorlarynyń biri retinde ol ulttyq rýhty asqaqtatyp, mýzykalyq muramyzdyń altyn qoryn jasaqtady. Hamididiń shyǵarmashylyǵy men ustazdyq eńbegi birneshe býyn mýzykanttyń qalyptasýyna yqpal etti.
27 shilde – Toqtar Áýbákirov 80 jasta (1946). Qazaqtyń tuńǵysh ǵaryshkeri, Qazaqstannyń Halyq Qaharmany. Ol óz erligimen, qaisar minezimen jáne kásibi biliktiligimen táýelsiz Qazaqstandy ǵaryshtyq derjava retinde tanytyp, ulttyq ǵylym men aviatsiia salasynyń damýyna zor serpin berdi.
1 tamyz – Sahi Romanovtyń týǵanyna 100 jyl (1926–2002). Qazaqstan beineleý óneriniń kórnekti ókili, halyq sýretshisi, kino sýretshisi jáne grafik. Onyń qoltańbasy ulttyq keskindemege jańa lep ákelip, kóptegen filmderdiń kórkemdik stilin qalyptastyrdy. Romanovtyń shyǵarmashylyq murasy – qazaq óner tarihyndaǵy kásibi sheberliktiń biik úlgisi.
28 tamyz – Ózbekáli Jánibekovtiń týǵanyna 95 jyl (1931–1998). Memleket jáne qoǵam qairatkeri, ǵalym, etnograf, ulttyq mádeni murany qaita jańǵyrtý isiniń kóshbasshysy. Ol tarihi jádigerlerdi saqtap, kieleý, ulttyq salt-dástúrdi jandandyrý baǵytynda úlken eńbek atqardy. Jánibekovtiń qyzmeti qazaq rýhaniiaty men mádenietiniń jańarý dáýiriniń negizin qalaǵan erekshe fenomen sanalady.
2 qazan – Abdolla Qarsaqbaevtyń týǵanyna 100 jyl (1926–1983). Qazaq kinosynyń altyn qoryn qalyptastyrǵan kórnekti rejisser, «Meniń atym – Qoja» sekildi ult mádenietiniń asyl murasyna ainalǵan filmderdiń avtory. Onyń shyǵarmalary qazaq balasynyń rýhani álemin, adamdyq qasietterin tereń ashyp, ulttyq kinematografiianyń kórkemdik deńgeiin aiqyndady.
15 qazan – Saiyn Muratbekovtiń týǵanyna 90 jyl (1936–2007). Halyqqa jaqyn lirikalyq prozasymen tanylǵan jazýshy, aýdarmashy, eńbek sińirgen qairatker. Onyń adam janynyń tereń qatparlaryn asha biletin áńgimeleri men hikaiattary qazaq ádebietine erekshe náziktik pen kórkemdik serpin ákeldi. Shynaiylyqqa toly keiipkerleri arqyly ol qazaq prozasynyń ulttyq bolmysyn aishyqtap, ádebiettiń súiikti klassigine ainaldy.
2 qarasha – Ybyrai Altynsarinnyń týǵanyna 185 jyl (1841–1889). Qazaq dalasyndaǵy alǵashqy mektepterdiń negizin qalaǵan aǵartýshy, pedagog, jazýshy, etnograf ári folklortanýshy. Ol bilimdi halyqtyń bolashaqqa aparar basty kúsh dep tanyp, jańa oqý júiesin engizdi, oqýlyqtar jazyp, balalar ádebietiniń irgesin qalady. Altynsarinniń aǵartýshylyq murasy – ultty órkenietke jetelegen jaryq jol.
7 qarasha – Jaqyp Aqbaevtyń týǵanyna 150 jyl (1876–1934). Qoǵam qairatkeri, zańger, Alash qozǵalysynyń belsendi músheleriniń biri. Ol qazaq halqynyń quqyqtyq sanasyn damytýǵa, otarlyq qysym jaǵdaiynda ádildik pen bostandyq ideiasyn qorǵaýǵa kúsh saldy. Aqbaevtyń kúreskerlik joly – ulttyq quqyqtyq oidyń qalyptasýyndaǵy tarihi kezeń.
16 qarasha – Manash Qozybaevtyń týǵanyna 95 jyl (1931–2002). Belgili tarihshy, professor, akademik, Qazaqstandaǵy ǵylymi tarihnamanyń jańa baǵyttaryn qalyptastyrǵan kórnekti ǵalym. Ol HH ǵasyrdaǵy qazaq tarihyn tereń zerttep, ulttyq sananyń jańǵyrýyna yqpal etken eńbekterimen tanyldy.
19 jeltoqsan – Ábýbákir Ahmetjanulynyń týǵanyna 170 jyl (1855/56–1932). Qazaq folklortaný ǵylymynyń bastaýynda turǵan kórnekti folklorshy, etnograf. Ol el ishindegi jumbaq, jańyltpash, maqal-mátel, jyr úlgilerin júielep jinap, halyq shyǵarmashylyǵyn ǵylymi ainalymǵa engizdi. Qazaq etnografiiasynyń negizin qalaǵan tulǵalardyń biri retinde onyń eńbegi ulttyń rýhani jady men mádeni bolmysyn saqtaýda erekshe mańyzǵa ie.
25 jeltoqsan – Ábiken Bekturovtyń týǵanyna 125 jyl (1901–1985). Tehnika ǵylymdarynyń doktory, professor, QR UǴA akademigi, Qazaqstandaǵy himiia ǵylymynyń damýyna jol ashqan kórnekti ǵalym. Ol elimizdegi himiialyq zertteýlerdiń ǵylymi negizin qalyptastyryp, óndiristik tehnologiialardy jetildirý baǵytynda irgeli eńbekter jazdy.
AIY MEN KÚNI BELGISIZ TARIHI OQIǴALAR
Ámir Temirdiń (Aqsaq Temir) týǵanyna 690 jyl (1336–1405). Orta Aziianyń asa qýatty memleket qairatkeri, dańqty qolbasshy, álemdik tarihta tereń iz qaldyrǵan tulǵa. Onyń qurǵan imperiiasy áskeri strategiia, memlekettik basqarý, sáýlet óneri men mádeniet salasynda iri serpilis jasap, aimaqtyq órkenietterdiń damýyna airyqsha yqpal etti.
Batyr Qabanbai Qojaqululynyń týǵanyna 335 jyl (1691/92–1769/70). Qazaqtyń azattyq jolyndaǵy kúresiniń uly qolbasshysy, «Daraboz» atanǵan halyq batyry. Ol jońǵar shapqynshylyǵyna qarsy shaiqastarda eldiń birligi men jerdiń tutastyǵyn qorǵaǵan iri tulǵa retinde tarihta qaldy. Qabanbai batyrdyń erlik joly – ulttyq rýhty kótergen qaisarlyqtyń simvoly.
Abylai hannyń týǵanyna 315 jyl (1711–1781). Úsh júzdiń basyn qosqan kemeńger han, qazaq memlekettiliginiń qalyptasýynda sheshýshi ról atqarǵan uly qairatker. Onyń saiasi kóregendigi men el bileýdegi diplomatiialyq sheberligi qazaq halqyn eń aýyr kezeńderde saqtap qalýǵa múmkindik berdi. Abylai dáýiri – birlik pen memlekettilikti nyǵaitqan tarihi beles.
Batyr Sartai Baijanulynyń týǵanyna 315 jyl (1711–1785). Jońǵar shapqynshylyǵy kezinde elin qorǵaǵan erjúrek qolbasshylardyń biri. Erligimen, uiymdastyrýshylyq qabiletimen tanylǵan Sartai batyrdyń ult tarihyndaǵy orny – eldik pen erliktiń úlgisi. Onyń esimi halyq jadynda táýelsizdik jolyndaǵy batyrlardyń biri retinde saqtalǵan.
Isatai Taimanulynyń týǵanyna 235 jyl (1791–1838). Batyr, qolbasshy, Qazaqstandaǵy iri ult-azattyq kóterilisiniń jetekshisi. Halyqtyń quqyǵyn qorǵap, ádildik pen bostandyq úshin kúresken Isataidyń erligi qazaqtyń azattyq tarihynda airyqsha oryn alady. Onyń kúreskerlik rýhy ulttyq sanada máńgilikke qalǵan.
Dina Nurpeiisovanyń týǵanyna 165 jyl (1861–1955). Qazaqtyń dástúrli kúi ónerin HH ǵasyrǵa jetkizgen uly kúishi, dombyrashy, halyq ártisi. Qurmanǵazy shákirti Dinanyń oryndaýshylyq sheberligi men shyǵarmashylyǵy ulttyq mýzykanyń biikteýine zor úles qosty.
Abdolla Asylbekovtiń týǵanyna 130 jyl (1896–1937). Alǵashqy qazaq pýblitsisteriniń biri, aqyn, qoǵam qairatkeri. Qazaq baspasózi men oi-sanasynyń qalyptasýynda erekshe ról atqarǵan Asylbekovtiń pýblitsistikasy ulttyq rýh pen aǵartýshylyq ideialaryn jalǵady. Qýǵyn-súrginniń qurbanyna ainalǵanymen, onyń eńbekteri qazaq jýrnalistikasynyń irgetasyn qalaǵan mura retinde baǵalanady.
Baýbek Bulqyshevtiń týǵanyna 110 jyl (1916–1944). Uly Otan soǵysy jyldarynda jarq etip kórinip, «Ómir men ólim týraly» pýblitsistikasymen tanylǵan jazýshy. Onyń órshil rýhy, otanshyldyqqa toly oilary men jalyndy maqalalary jaýyngerlik pýblitsistikanyń simvolyna ainaldy. Qysqa ǵumyrynda qaldyrǵan murasy – jas urpaqqa jiger beretin rýhani sabaq.
ATAÝLY DATALAR
29 tamyz – Semei iadrolyq synaq poligonynyń jabylǵanyna 35 jyl (1991). Qazaqstan iadrolyq qarýsyzdaný jolynda batyl qadam jasap, álemdik qaýipsizdikke úles qosqan tarihi sheshim. Poligonnyń jabylýy qazaq halqynyń uzaq jyldar boiǵy qasiretine núkte qoiyp, jahandyq beibitshilikke baǵyttalǵan jańa kezeńniń bastalýy boldy.
10 jeltoqsan – Qazaq KSR ataýynyń Qazaqstan Respýblikasy bolyp ózgertilgenine 35 jyl (1991). Bul sheshim eldiń saiasi egemendigi men ulttyq memlekettiliginiń jańasha qalyptasýyn aiqyndaǵan mańyzdy kezeń edi. Memleket ataýynyń ózgerýi – táýelsizdikke bet alǵan jańa tarihi dáýirdiń simvoly boldy.
16 jeltoqsan – 1986 jylǵy Jeltoqsan oqiǵasyna 40 jyl. Qazaq jastarynyń ádildik pen ult namysyn qorǵaý jolyndaǵy kóterilisi el tarihynda azattyqqa bastar rýhty oiatqan oqiǵa retinde este qaldy. Jeltoqsan – táýelsizdikke jetkizgen qaisarlyqtyń, ulttyq jigerdiń kórinisi.
16 jeltoqsan – Qazaqstan Respýblikasynyń jariialanǵanyna 35 jyl (1991). Qazaqstan táýelsiz memleket retinde tarih sahnasyna shyqqan kún. Bul – eldiń saiasi erkindikke qol jetkizip, halyqaralyq qaýymdastyqqa derbes memleket retinde moiyndalǵan tarihi belesi.
Isatai–Mahambet kóterilisine 190 jyl (1836–1838). Jáńgir hannyń saiasaty men Resei imperiiasynyń otarlyq qysymyna qarsy baǵyttalǵan halyq-azattyq qozǵalys. Isatai Taimanuly men Mahambet Ótemisuly bastaǵan bul kóterilis ulttyq erkindikke degen umtylystyń simvolyna ainalyp, qazaq halqynyń azattyq rýhyn tanytqan tarihi kezeń boldy.
Janqoja Nurmuhameduly bastaǵan ult-azattyq kóteriliske 170 jyl (1856). Syr boiyn otarlaýǵa qarsy baǵyttalǵan bul qozǵalys qazaq halqynyń erkindik súigish minezin, jer men eldi qorǵaý jolyndaǵy qaisarlyǵyn kórsetti. Janqoja batyrdyń basshylyǵymen ótken kóterilis otarlyq ezgige qarsylyqtyń iri tarihi kezeńderiniń biri sanalady.
