Búgin, 6 aqpanda Italıada qysqy Azıa oıyndarynyń saltanatty ashylýy ótedi. Tórt jyldyqtyń basty dodasynda Qazaqstan quramasynan 10 sport túri boıynsha 36 sportshy óner kórsetedi, dep habarlaıdy Dalanews.kz.

Alǵashqy jarystar 7 aqpanda bastalady. Olımpıada básekelerin Qazsport, Qazaqstan, Jibek Joly jáne "Habar" telearnalary tikeleı efırde kórsetedi. Tómende Astana ýaqytymen berilgen jarys kestesi usynylady.

7 aqpanda Qazaqstan sportshylary shańǵy jarysy men kónkımen júgirýden synǵa túsedi. Áıelder arasyndaǵy skıatlonda Nadejda Stepashkına, Ksenıa Shalygına jáne Dará Rájko jarys jolyna shyǵady. Sol kúni keshke Nadejda Morozova men Elızaveta Golýbeva 3000 metrge kónkımen júgirýden baq synaıdy.

8 aqpanda erler arasyndaǵy skıatlonda Amırgalı Mýratbekov, Vıtalıı Pýhkalo jáne Naıl Bashmakov óner kórsetedi. Sonymen qatar bıatlonnan aralas estafetada Vladıslav Kıreev, Aset Dúsenov, Aısha Rakısheva jáne Mılana Geneva qatysady.

9 aqpanda Morozova men Golýbeva 1000 metr qashyqtyqta taǵy jarysady. Sol kúni Ilá Mızernyh pen Danıl Vasılev shańǵy tramplıninen sekirýden baq synaıdy.

10 aqpan – qazaqstandyqtar úshin jarysqa toly kún. Shańǵy sprıntinde erler men áıelder quramasy tolyq quramda qatysady. Short-trekten Denıs Nıkısha, Abzal Ajgalıev, Iana Han jáne Olga Tıhonova irikteý kezeńderinde jarysqa túsedi. Frıstaıl-mogýlda Pavel Kolmakov erler arasynda, al Iýlıa Galysheva, Anastasıa Gorodko jáne Aıaýlym Amrenova áıelder arasynda óner kórsetedi. Sol kúni bıatlonshylar Vladıslav Kıreev pen Aset Dúsenov jeke jarysqa qatyssa, keshke mánerlep syrǵanaýdan Mıhaıl Shaıdorov qysqa baǵdarlamada óner kórsetedi.

11–12 aqpanda frıstaıl-mogýl, bıatlon, taý shańǵysy, shańǵy jarysy jáne kónkımen júgirý básekeleri jalǵasady. Bul kúnderi Iýlıa Galysheva bastaǵan mogýlshylar fınalǵa shyǵý úshin talasady, al Nadejda Morozova 5000 metr qashyqtyqta synǵa túsedi.

13–15 aqpan aralyǵynda short-trek, bıatlon, mánerlep syrǵanaý jáne taý shańǵysy boıynsha jarystar ótedi. Mıhaıl Shaıdorov erkin baǵdarlamada óner kórsetedi, al Iýlıa Galysheva bastaǵan sportshylar paralel mogýlda baq synaıdy. Evgenıı Koshkın erler arasynda 500 metrge kónkımen júgirýden jarysady.

16–18 aqpanda jarystardyń qarqyny kúsheıedi. Short-trekshiler, shańǵy qossaıysynyń ókili Chıngız Rakparov jáne frıstaıl-akrobatıka sportshylary irikteý kezeńderi men fınaldarǵa qatysady. Sofá Samodelkına mánerlep syrǵanaýdan qysqa baǵdarlamada óner kórsetedi.

19–21 aqpan kúnderi short-trek, frıstaıl-akrobatıka, bıatlon, shańǵy jarysy men kónkımen júgirýdiń sheshýshi kezeńderi ótedi. Qorytyndy kúnderi bıatlonnan, kónkımen júgirýden jáne shańǵy jarysynan júldeler sarapqa salynady.

22 aqpanda áıelder arasyndaǵy shańǵy jarysynyń mass-start básekesimen Qazaqstan sportshylarynyń Olımpıadadaǵy sońǵy jarysy ótedi.

Osylaısha, qazaqstandyq jankúıerler eki apta boıy ulttyq quramanyń ónerin tamashalap, Olımpıadadaǵy árbir jarysty tikeleı efırde kóre alady.