Qar barysyn qorǵaý jáne monitoring maqsatynda spýtniktik qarǵybaý ornatyldy. Bul týraly Ekologiia jáne tabiǵi resýrstar ministrligi Orman sharýashylyǵy jáne janýarlar dúniesi komiteti málimdedi, dep habarlaidy Dalanews.kz.
Jýyrda Ile-Alataýy memlekettik ulttyq tabiǵi parki aýmaǵynda, Úlken Almaty shatqalynda, tasjolǵa jaqyn jerde qar barysy maral aýlaǵan. Bul aýmaq halyq jii demalatyn oryn bolǵandyqtan, jemtigin jep jatqan jyrtqyshty adamdar baiqap qalǵan. Aqparat áleýmettik jelilerde lezde tarap, kelesi kúni bul jerge kelýshiler sany arta túsken.
Ulttyq park qyzmetkerleri men ǵalymdar túsindirgenine qaramastan, kóp adam jabaiy ańǵa tym jaqyn jerden dron ushyryp, erekshe qorǵalatyn tabiǵi aýmaqtaǵy júris-turys qaǵidalaryn buzǵan.
"Kópshilik onyń Qazaqstannyń Qyzyl kitabyna engen sirek kezdesetin janýar ekenin jáne qaýipti jyrtqysh ekenin eskermedi. Mundai áreketter janýar úshin aitarlyqtai kúizelis týdyrdy", - dedi mamandar.
Qar barysyn qorǵaý maqsatynda mamandar ony ýaqytsha aýlaý týraly sheshim qabyldaǵan. Janýarǵa spýtniktik qarǵybaý taǵylyp, densaýlyǵyn baǵalaý úshin biomaterialdar alǵan.
"Kásibi mamandar barlyq rásimdi qysqa merzimdi narkozda, halyqaralyq veterinariia jáne etika standarttaryn qatań saqtap júrgizdi. Qarǵybaý tótenshe jaǵdai anyqtalǵan jaǵdaida qashyqtan ajyratý fýnktsiiasymen jabdyqtalǵan. Sonymen qatar, bir-eki jyl ishinde qarǵybaý janýardan ózdiginen ajyraidy", - dedi komitet ókilderi.
Dese de zerthanalyq taldaý nátijesi qar barysy saý ekenin jáne eshqandai aýrýǵa shaldyqpaǵanyn kórsetken.
