Qytai men Qazaqstan arasyndaǵy saýda derekterinde taǵy da aitarlyqtai alshaqtyq anyqtaldy. Qytai tarapy kórsetken eksport kólemi Qazaqstannyń resmi import statistikasynan milliardtaǵan dollarǵa joǵary, dep habarlaidy Dalanews.kz tradereport.kz saityna silteme jasap.
Qytaidyń Bas keden basqarmasynyń málimetine sáikes, 2025 jyldyń qorytyndysy boiynsha Qytaidyń Qazaqstanǵa eksporty 29,69 mlrd dollarǵa jetken. Bul bir jyl burynǵy kórsetkishten 6,2 paiyzǵa kóp.
Al Qazaqstannyń Memlekettik kirister komiteti sol kezeńde Qytaidan ákelingen import kólemi nebári 18,94 mlrd dollar bolǵanyn aitady. Degenmen qazaqstandyq statistikada ósim aitarlyqtai joǵary - 24,1 paiyz.
Osylaisha eki eldiń resmi derekteri arasynda 10,8 mlrd dollar aiyrmashylyq paida bolyp otyr. Bul aiyrmashylyq Qytai usynǵan málimetterdiń paidasyna sheshilgen. Aita keteiik, 2024 jyly bul alshaqtyq odan da joǵary bolyp, 12,7 mlrd dollarǵa jetken.
Sarapshylardyń aitýynsha, ekijaqty saýda kólemi jyl saiyn ósip kele jatqanymen, statistikalyq sáikessizdik máselesi, ásirese Qazaqstan importy boiynsha, áli kúnge deiin sheshilmei otyr.
Másele tek esep-qisappen shektelmeidi. Shekaradaǵy jaǵdai da ahýaldy kúrdelendire túsýde. «Nur joly» ótkizý beketi únemi shamadan tys júktememen jumys isteidi.
Ótken jyldyń sońynda bul baǵytta júk kólikteriniń birneshe shaqyrymǵa sozylǵan kezegi paida bolǵan. Fýralar Atameken men Sholaqai aýyldarynan bastap ótkizý beketine deiin tizilip turǵan. Júrgizýshiler kabinalarynda túnemekke májbúr bolyp, elektrondy kezek júiesine jáne jaýapty qyzmetterdiń túsinikti aqparat bermeýine shaǵymdanǵan.
