Qazaqstan syrtqy saýdada tsifrlyq aktivterdi qoldanýǵa qatysty taǵy bir qadam jasady. Halyqaralyq qarjy ortalyǵy (AHQO) málimetinshe, transshekaralyq esep aiyrysýda steiblkoinderdi paidalaný tetigi ázirlenip jatyr, dep habarlaidy dalanews.kz.
Reformany jedeldetýge kriptovaliýta naryǵyndaǵy kórsetkishter de áser etip otyr. Qazaqstan azamattaryna tiesili shamamen 1 million kriptoámiian bar. Al AHQO aýmaǵyndaǵy retteletin operatsiialardyń kólemi 2023 jylǵy 320 million dollardan byltyr 10,5 milliard dollarǵa deiin ósken. Biylǵy birinshi jartyjyldyqta bul kórsetkish 5,5 milliard dollarǵa jetti.
Ekonomist, Qazaq Expert Club teń quryltaishysy Baýyrjan Shýrmanovtyń aitýynsha, bastamanyń negizgi maqsaty - halyqaralyq tólemderdiń jyldamdyǵy men qunyn ońtailandyrý.
Steiblkoin - kóbine AQSh dollaryna bailanysty tsifrlyq aktiv. Mysaly, USDT jáne USDC siiaqty steiblkoinderdiń baǵasy bitkoin sekildi qatty qubylmaidy. Olardyń quny fiat valiýtasyna 1:1 araqatynasynda bekitiledi.
Qazir qazaqstandyq kásipker shetelden shikizat nemese qural-jabdyq satyp alǵan kezde tólem qarajaty SWIFT júiesi arqyly birneshe korrespondent-bankten ótedi. Bul protsess 2-5 jumys kúnin alýy múmkin. Al komissiialar men aiyrbas baǵamyndaǵy aiyrmashylyq tólem somasynyń 1,5-4 paiyzyna deiin jetedi.
Steiblkoin arqyly blokchein jelisindegi esep aiyrysý birneshe minýtta júzege asady. Bul rette tranzaktsiia komissiiasy tólem kólemine qaramastan kóbine az mólsherde bolady.
Álemdik tájiribede mundai tásil qazirdiń ózinde qoldanylyp keledi. Mysaly, Singapýrda Valiýta basqarmasy tsifrlyq valiýtalar arqyly B2B tólemderin júrgizýge arnalǵan infraqurylymdy litsenziialaǵan. Jergilikti treiderler, teńiz tasymalymen ainalysatyn kompaniialar táýlik boiy naqty ýaqyt rejiminde esep aiyrysa alady. Latyn Amerikasynda, sonyń ishinde Braziliia men Meksikada Aziiadan elektronika men avtokomponentter importtaityn kompaniialar steiblkoin paidalana bastaǵan. Mundai tólemder Qytaiǵa birneshe minýtta jetip, bankterdegi birneshe kúndik kútý ýaqytyn qysqartýǵa múmkindik beredi.
Qazaqstan ekonomikasy úshin mundai tetik eń aldymen kapital ainalymyn jedeldetýge múmkindik beredi. Kásipkerler halyqaralyq tólemderdiń ótýin kútip, ainalym qarajatyn uzaq ýaqytqa buǵattap qoimaidy. Sonymen qatar, kúrdeli geosaiasi jaǵdaida sheteldik korrespondent-bankter tarapynan tólemder keshigýi nemese qabyldanbaýy siiaqty qaýip tómendeýi múmkin.
Munyń qarapaiym tutynýshyǵa da áseri bolýy múmkin. Importtaýshylar bank komissiialaryn, júk kidirýinen týyndaityn shyǵyndardy jáne valiýta aiyrbastaýǵa ketetin qarajatty taýardyń túpki baǵasyna qosady. Sondyqtan halyqaralyq tólemder arzandap, jyldamdasa, importtyq taýarlardyń baǵasyna túsetin qysym da tómendeýi yqtimal.
