Qazaqstanda QR arqyly jasalatyn qolma-qol aqshasyz tólemderdi qosylǵan qun salyǵynan (QQS) bosatý máselesi qarastyrylyp jatyr. Bul týraly Úkimettegi brifingte Ulttyq bank tóraǵasynyń orynbasary Binýr Jalenov málimdedi., dep habarlaidy dalanews.kz.
Jýrnalister jańa bastamanyń qazaqstandyq kásipkerler tóleitin bank komissiialaryna, onyń ishinde biryńǵai QR júiesine qalai áser etetinin surady.
Binýr Jalenovtyń aitýynsha, bul másele jýyrda jobalyq keńse otyrysynda talqylanǵan.
«Qolma-qol aqshasyz tólemderdi QQS-tan bosatý máselesi qaraldy. Mundaǵy basty maqsat – barlyq tólem túrleri úshin birdei jaǵdai jasaý. Qazirgi Salyq kodeksinde keibir qolma-qol aqshasyz tólemder, mysaly, bank kartalary arqyly esep aiyrysýlar QQS-tan bosatylǵan. Biz ulttyq tólem júiesin, sonyń ishinde biryńǵai QR júiesin damytyp jatqandyqtan, barlyǵyna ortaq talap engizý usynyldy. Bul túsinispeýshilikterdi azaityp, ákimshilendirýdi jeńildetedi», – dedi ol.
Ulttyq bank ókiliniń sózinshe, bastama tujyrymdamalyq turǵydan qoldaý tapqan. Qazir onyń naqty tetikteri Úkimetpen birlesip pysyqtalyp jatyr. Odan keiin usynys qaraý úshin Parlamentke engiziledi. Sońǵy sheshimdi depýtattar qabyldaidy.
Aita keteiik, biryńǵai QR júiesi ártúrli bankterdiń tólem servisterin bir platformada biriktirýge múmkindik beredi. Bastama qolma-qol aqshasyz tólemderdi keńinen qoldanýǵa jáne tólem infraqurylymyn damytýǵa baǵyttalǵan.
