Қазақстанда QR арқылы жасалатын қолма-қол ақшасыз төлемдерді қосылған құн салығынан (ҚҚС) босату мәселесі қарастырылып жатыр. Бұл туралы Үкіметтегі брифингте Ұлттық банк төрағасының орынбасары Бинур Жаленов мәлімдеді., деп хабарлайды dalanews.kz.
Журналистер жаңа бастаманың қазақстандық кәсіпкерлер төлейтін банк комиссияларына, оның ішінде бірыңғай QR жүйесіне қалай әсер ететінін сұрады.
Бинур Жаленовтың айтуынша, бұл мәселе жуырда жобалық кеңсе отырысында талқыланған.
«Қолма-қол ақшасыз төлемдерді ҚҚС-тан босату мәселесі қаралды. Мұндағы басты мақсат – барлық төлем түрлері үшін бірдей жағдай жасау. Қазіргі Салық кодексінде кейбір қолма-қол ақшасыз төлемдер, мысалы, банк карталары арқылы есеп айырысулар ҚҚС-тан босатылған. Біз ұлттық төлем жүйесін, соның ішінде бірыңғай QR жүйесін дамытып жатқандықтан, барлығына ортақ талап енгізу ұсынылды. Бұл түсініспеушіліктерді азайтып, әкімшілендіруді жеңілдетеді», – деді ол.
Ұлттық банк өкілінің сөзінше, бастама тұжырымдамалық тұрғыдан қолдау тапқан. Қазір оның нақты тетіктері Үкіметпен бірлесіп пысықталып жатыр. Одан кейін ұсыныс қарау үшін Парламентке енгізіледі. Соңғы шешімді депутаттар қабылдайды.
Айта кетейік, бірыңғай QR жүйесі әртүрлі банктердің төлем сервистерін бір платформада біріктіруге мүмкіндік береді. Бастама қолма-қол ақшасыз төлемдерді кеңінен қолдануға және төлем инфрақұрылымын дамытуға бағытталған.
