Qazaqstanda benzin men dizel otynyna salynatyn aktsizdi esepteý tártibi ózgerdi. Ózgeriske sáikes aktsizdiń ózgermeli bóligin esepteý kezinde qoldanylatyn koeffitsient 50 paiyzdan 95 paiyzǵa deiin kóterildi. Jańa tártip 1 qyrkúiekten bastap týyndaǵan quqyqtyq qatynastarǵa qoldanylady, dep habarlaidy dalanews.kz.
Jańa mehanizm benzinniń kóterme baǵasy tonnasyna 214 584 teńgeden asqan kezde iske qosylady. Dizel otyny úshin bul shek tonnasyna 284 350 teńge bolyp belgilengen. Baǵa belgilengen shekten qanshalyq joǵary bolsa, aktsiz somasy da soǵurlym kóbeiedi.
Ózgeris janarmai óndirýshilerdiń kóterme saýdasyna, otyn importyna jáne davaldyq shikizatty óńdeý nátijesinde alynǵan ónimderdi berýge qatysty bolmaq. Sondai-aq, koeffitsient óndirýshilerdiń bólshek saýda men otyndy óz óndiristik qajetine paidalanǵan kezde de 95 paiyzǵa deiin kóterilgen.
Bul rette janarmaidyń baǵa shekteri men negizgi aktsiz mólsherlemeleri ózgergen joq. Benzindi óndirýshi bólshek saýdada satqan kezde negizgi mólsherleme - tonnasyna 38 634 teńge. Dizel otyny úshin kóterme saýdadaǵy mólsherleme - 35 726 teńge, bólshek saýdada bul - 35 786 teńge.
Aktsiz koeffitsienti ósýi janarmai baǵasyna áser ete me, joq pa, ony naryqtaǵy naqty baǵa men óndirýshilerdiń shyǵyny aiqyndaidy.
