Búgin «Dala Qyrandary» jastar qoǵamdyq birlestiginiń shtab-páterinde Týrizm jáne sport ministri Erbol Myrzabosynovtyń qatysýymen dóńgelek ústel formatynda jumys kezdesýi ótti, dep habarlaidy Dala News.
Kezdesý qoldanystaǵy yntymaqtastyq memorandýmy aiasynda uiymdastyrylyp, elde júrip jatqan konstitýtsiialyq reforma máselelerine arnaldy. Jiynǵa birlestiktiń belsendileri men úilestirýshileri qatysyp, azamattyq qoǵamnyń jańa Konstitýtsiia jobasyn talqylaýǵa tikelei aralasýy mańyzdy ekenin atap ótti.
«Dala Qyrandary» qozǵalysynyń úilestirýshisi Madi Rymjanovtyń aitýynsha, uiym sońǵy eki jyl boiy Konstitýtsiianyń 36.1-baby aiasynda júieli jumys júrgizip keledi.
«Bul qoldanystaǵy Konstitýtsiianyń 36.1-baby. Onda Qazaqstan Respýblikasyn qorǵaý árbir azamattyń qasietti boryshy ekeni jazylǵan. Biz ózimizdi eń aldymen patriot ári elimizdiń qorǵaýshysy dep sanaimyz. Memleket basshysy jańa Konstitýtsiia jobasyn talqylaýǵa qoǵam belsendi qatysýy kerek ekenin aitty. Bul jastar úshin óz usynystaryn engizýge berilgen úlken múmkindik. Sol sebepti biz Týrizm jáne sport ministrin shaqyryp, óz bastamalarymyzdy talqyladyq. Atap aitqanda, memlekettiń jáne qoǵamnyń memlekettik rámizderdi qorǵaýdaǵy ustanymyn kúsheitý, olardyń mártebesin arttyrý jóninde usynystar aittyq. Jańa Konstitýtsiia jobasynda memleketke rámizderdiń bedelin kóterý jónindegi jaýapkershilik pen ról naqty bekitilýi tiis dep esepteimiz. Bul baǵytta bizde naqty usynystar bar», – dedi Madi Rymjanov.
Kezdesý barysynda qozǵalys ókilderi óz usynystaryn naqty qoǵamdyq tájiribege súiene otyryp jetkizdi. Uiym úilestirýshisi Meirbolat Toitov memlekettik rámizderdi qorǵaý tetikteri búginde jetkiliksiz ekenin aitty.
«36.1 baǵyty boiynsha eki jyldyq tájiribemizge súiene otyryp, memlekettik rámizderdi qorǵaýǵa qatysty qoldanystaǵy sharalar, ókinishke qarai, tolyq nátije bermei otyrǵanyn senimdi túrde aita alamyz. Rámizderge degen qurmetsizdik jekelegen jaǵdai emes, júieli ári jii kezdesetin qubylysqa ainaldy. Biz mundai faktilermen kún saiyn derlik betpe-bet kelemiz», – dedi Meirbolat Toitov.
Osyǵan bailanysty «Dala Qyrandary» Konstitýtsiianyń 9-babyn kúsheitýdi usynyp otyr. Atap aitqanda, memlekettik rámizderdi qurmetteý men qorǵaý normalaryn konstitýtsiialyq deńgeide bekitý, sondai-aq memleketke bilim berý, mádeniet jáne BAQ arqyly rámizderge qurmetti kózqaras qalyptastyrý mindetin júkteý qajet dep sanaidy.
Óz kezeginde Týrizm jáne sport ministri Erbol Myrzabosynov azamattyq uiymdarmen ashyq dialogtyń mańyzyn atap ótip, usynystardyń ózektiligine toqtaldy.
«Dala Qyrandary» qozǵalysynyń el ishindegi tanymaldyǵy kún saiyn artyp keledi. Qazirgi tańda Qazaqstanda aýqymdy ózgerister men konstitýtsiialyq reformalar júrip jatyr, sondyqtan memleket úshin osyndai uiymdarmen ashyq dialog júrgizý óte mańyzdy. Qazirgi qoǵamǵa zaman talabyna sai erejeler qajet. Bul – saiasi aitys emes, ýaqyt talabyna sai negizgi normalardy jańartý máselesi. Qoǵamdyq uiymdar men memleket bir tilde sóilegen kezde, nátije naqty istermen kórinýi tiis», – dep atap ótti ministr.
Kezdesý qorytyndysy boiynsha «Dala Qyrandary» ázirlegen usynystar Konstitýtsiialyq komissiianyń qaraýyna joldanatyn boldy.
