Qurylys salasy Qazaqstannyń jalpy ishki óniminiń shamamen 6%-yn quraidy. Keibir jyldary qurylys jumystarynyń kólemi 15–18%-ǵa deiin ósip, ekonomikanyń ortasha qarqynynan ozyp otyrdy, dep habarlaidy Dalanews.kz.
2019–2024 jyldar aralyǵynda elde shamamen 98 mln sharshy metr turǵyn úi paidalanýǵa berildi. 2025–2026 jyldarǵa memleket 31,6 mln sharshy metrden astam turǵyn úidi paidalanýǵa berýdi, tozyǵy jetken turǵyn úi qoryn jańǵyrtýdy jáne ondaǵan myń jer ýchaskesine injenerlik infraqurylym júrgizýdi josparlap otyr.
«Bir qaraǵanda, bári tamasha kórinedi, – dep pikir bildiredi Qazaq Expert Club sarapshysy Svetlana Nurtazina, – alaida jobalardy basqarý salasynyń mamany retinde men qai tustardy jaqsartý qajet ekenin kórip otyrmyn, sebebi áńgime júzdegen milliard teńge týraly bolyp otyr.
Muny Joǵary aýditorlyq palatanyń (JAP) aýditteri de rastaidy. Tek 2025 jyldyń ózinde tekseris nátijesi boiynsha aýditorlar 24 nysanda 355 mlrd teńgege zańbuzýshylyqtar anyqtady. Al 2025 jylǵa deiingi kezeńde 695 mln dollar (shamamen 355 mlrd teńge) kóleminde buzýshylyqtar, sonyń ishinde resýrstardy tiimsiz paidalaný jáne josparlaý máseleleri anyqtalǵan».
Nurtazinanyń pikirinshe, negizgi sebep — qurylys jobalaryn basqarýdyń eskirgen modeli.
«2018 jyldan bastap Qazaqstanda Ulttyq jobalyq basqarý júiesi engizildi: úkimet, ministrlikter jáne ákimdikter janynan jobalyq keńseler quryldy. Biraq is júzinde keńselerdiń kópshiligi jobalardy basqarmaidy, olardy ákimshilik turǵyda ǵana súiemeldeidi: esepter jinaidy, jiyntyq aqparat qalyptastyrady, aqparat usyný merzimderin baqylaidy», – dep tolyqtyrdy sarapshy.
Onyń oiynsha, jaǵdaidy ózgerte alatyn negizgi qadam — jobany basqarýǵa mandaty bar, sheshimderge, merzimderge, biýdjetke jáne jobanyń arhitektýrasyna yqpal ete alatyn basqarýshylyq býyndy engizý.
«Sonymen qatar jedel basqarýshylyq sheshimder de múmkin, – deidi Svetlana. – Bul — jobalyq-smetalyq qujattamany ázirleý protsesin jobalyq keńseniń súiemeldeýi, qurylys-montaj jumystary kezeńinde baqylaý núktelerinde turaqty reviý ótkizý, tek merzimder men biýdjetti ǵana emes, sheshimderdiń ómirsheńdigin de taldaý».
Material Qazaq Expert Club qurylys salasyndaǵy sarapshysy Svetlana Nurtazinanyń pikirine negizdelip daiyndaldy.
