- Areke, sizben suhbatty myna suraqtan bastasam dep otyrmyn. «Qazaq eli» serıalyna QR Mádenıet jáne sport mınıstrligi tarapynan qazir qandaı da bir qoldaý jasalyp jatyr ma osy?
-Suhbatymyzdy osy saýaldan bastaǵanyńyz jáne ony maǵan qoıǵanyńyz óte jón boldy. Sebebi men – osy jobanyń bas prodúserimin. Máseleniń mán-jaıyn naqty bilemin. Negizinen jobany qoldap otyrǵan QR Mádenıet jáne sport mınıstrligi. Sondyqtan mınıstrliktegi azamattarǵa raqmet aıtýymyz kerek.
-Bastapqyda qarjy jetpeıdi dep, jurttan jylý jınaǵan edińizder. Qazir qarjylandyrý jaǵy qalaı?
-Ondaı kezder boldy, ras. Qazir qarjy bólindi. Jumys retimen júrip jatyr.
-Qansha bólindi jáne qaıdan?
-Negizi eń basynda mınıstrlikten 1 mıllıard teńge bólingen. Ol qarjy óz ornymen jumsaldy. Keıin qarjylyq qıyndyqtar bolǵan soń, biz qosymsha qarjy suradyq. Mınıstrlik qosymsha taǵy aqsha bóldi.
-Almaty qalasy ákimshiligi de aralasyp, biraz qarjy tabylǵan edi ǵoı.
-Iá, Almaty qalasy ákimshiligi usynys jasap, «BazısA» kompanıasy 180 mıllıon teńge bóldi. Odan bólek, «Freedom Finance
» uıymy da 100 mıllıon berdi. Osynyń barlyǵyn Mádenıet mınıstrligi uıymdastyrdy.
- Sonymen túsirilim jumystary aıaqtalǵany belgili. Ótken joly rejıser Rústem Ábdirashevpen sóıleskenimizde, montajdaý jumystary júrip jatqanyn aıtyp edi...
-Ras, birinshi maýsymnyń túsirilimderi aıaqtaldy. Tipti, montajdaý jumystary da márege jetip qaldy. Buıyrsa bıyl «Qazaq eli» serıaly ekranǵa jol tartady dep josparlap otyrmyz. Al túsirilim jumystaryna keler bolsaq, ol aıaqtalǵan joq. Sebebi, biz jobanyń ekinshi maýsymyn shyǵarmaqpyz. Bul baǵytta Batysta kóptegen serıaldar túsirilip jatyr ǵoı. Sol sekildi, «Qazaq eli» serıaly jurtty tań qaldyryp, tamsandyratyn qazaq kınogerleriniń tuńǵysh týyndysy bolady dep oılaımyz.
-Demek, bul batystyq formattaǵy ekshn-serıal bolmaq qoı... Mysaly, «Taqtar oıyny»...
-Iá, dál solaı. Bizdiń elde bul janrda, bul formatta serıal túsirilgen joq. Batysta, Batysty qoıyp dúnıejúzinde suranysqa ıe bolyp otyrǵan «Taqtar oıyny» formatynda daıyndaldy. Eger «Taqtar oıyny» serıalynda kóp epızodtar kompúterlik grafıkamen daıyndalsa, bizde bári tabıǵı bolady. «Taqtar oıyny» serıalynda fantasıka basym, keıipkerler oıdan shyǵarylǵan. Al bizdiń serıalda bári shyn keıipkerler. Ómirde bolǵan, oqıǵalar da tarıhı derekter boıynsha túzilgen. Aıta keteıin, bizde buryn-sońdy mundaı serıaldar bolǵan joq. Sondyqtan biz barymyzdy saldyq.
-«Taqtar oıynyna» álemdik deńgeıde suranys joǵary. Al bizdiń «Qazaq eli» serıaly álemdik prokatta básekelese ala ma?
-Bilesiz be? Bizge kóptegen sheteldik telearnalar habarlasyp jatyr. Mysaly, berisi Reseı men Ýkraına bizdiń serıaldy satyp alýǵa usynys jasap úlgerdi. Máselenkı, qazir ORT arnasymen kelissózder júrgizilýde. Arysy Batystyń telearnalary habarlasyp, serıaldyń qashan daıyn bolatynyn surap otyr. «NBC» bastaǵan Batys elderi arnalary kóptep habarlasýda. «Ál jazıra» arnasy da bizdiń serıaldy satyp alýǵa kelisti. Sebebi, Batys prokatyndaǵy serıaldardyń kópshiligi kompúterlik grafıkamen túsiriledi. Al bizde shynaıy keıipkerler, shynaıy tabıǵat aıasy. Jasyl fondy qoldanbadyq. Sondyqtan «Qazaq eli» serıalynyń sapasy da, áseri de erekshe bolmaq.
- Fılm byltyr, Qazaq handyǵynyń 550 jyldyǵy aıasynda kórsetilýi kerek edi. Bizge belgili, belgisiz sebeptermen keshigip, áne-mine dep júrip, bıyl ǵana ázir bolǵan sıaqty. Nege?
-Ras aıtasyz, serıalymyz belgili sebeptermen keshigip qaldy. Degenmen bıylǵy jyl da qazaq halqy úshin aıtýly datalarmen sáıkes keledi. Táýelsizdigimizdiń 25 jyldyǵyn atap ótkeli otyrmyz. Jeltoqsan kóterilisine de 30 jyl toldy.
-Sonymen serıaldy qashan kóremiz?
-Bıylǵy jyldyń 16-jeltoqsanynda «Qazaq eli» serıalynyń kıno nusqasy kórermenge jol tartady. Alǵashqy kórsetilimi Astana qalasynda «Qazaqstan» konsert zalynda, Almaty qalasynda «Respýblıka» saraıynda ótkiziledi. Al 17 jeltoqsan kúni elimizdiń barlyq kınoteatrlarynda «Qazaq eli» serıalynyń kınonusqasy shyǵady. Kıno nusqanyń uzaqtyǵy 2 saǵat. Serıaldy kórgen adamnyń ókinbeıtinine bek senimdimin.
-Al serıal she?
-Kez kelgen serıaldy túsirgen soń, aldymen onyń kıno nusqasy kórsetilimge shyǵarylady. Biz de solaı istedik. Al serıalǵa keler bolsaq, jeltoqsan aıynda, jańa jylǵa qarsy eki aptalyq demalys bolady. Dál sol kezde biz serıaldy kórsetpekpiz.
-Qansha serıal túsirildi?
-«Qazaq eli» serıalynyń alǵashqy maýsymyna 10 serıal ázir. Ár serıaldyń uzaqtyǵy 40-45 mınýttan turady.
-Alǵashqyda kóp serıaly degen edi... Daıyn bolǵany 10 bólim eken. Osy 10 bólimdi eki jyl túsirdińizder me?
-Negizi qazir biz «Qazaq eliniń» ekinshi maýsymyn daıyndap jatyrmyz. Alǵashqyda «Máńgilik el» baǵdarlamasy aıasynda 100 bólim dep josparlanǵan bolatyn. Belgili sebeptermen túsirilim jumystary keshikti. Sondyqtan biz alǵashqy maýsymdy 10 serıamen bastaımyz. Sosyn ekinshi maýsym, úshinshi maýsym bolyp jalǵasa beredi.
-Jaqsy, Areke, iske sát!
-Sizderge de raqmet!
Suhbattasqan - Nurgeldi Ábdiǵanıuly
