Түркістанда облыстық цифрландыру, мемлекеттік қызмет көрсету және архивтер басқармасы мен «Turkistan HUB» ұйымының ұйымдастыруымен «DevFest Turkistan – 2024» халықаралық конференциясы өтті. Іс-шара барысында IT және робототехника саласындағы сарапшылардың, кәсіпқойлардың және жас мамандардың басын біріктіріп, цифрлық технологияларды дамыту бағытында жаңа идеялар мен шешімдер ұсынды, – деп хабарлайды Dalanews.kz Түркістан облысы әкімінің баспасөз қызметіне сілтеме жасап.
Заманауи технологияны пайдаланудағы үздіктер бүгінгі талапқа сай қызмет ұсыну, IT саласындағы жаңа қадамдар, жасанды интеллект жұмыстары жайында сөз қозғап, пікір алмасты. Сондай-ақ, іс-шарада старт-аптар өз жобаларын таныстырып, үздік идеялар жүлделі орындарға ие болды.
Қазіргі таңда Түркістан облысында цифрлық инфрақұрылымды дамыту қарқынды жүргізілуде және бұл бағыт өңірдің әлеуметтік-экономикалық дамуына елеулі ықпал етуде. Цифрландыру аймақты заманауи технологиялармен жабдықтау арқылы халықтың өмір сүру сапасын арттыруға бағытталған.
Айталық, 2024 жылы «Қолжетімді интернет» жобасы аясында Түркістан облысының ауылдық аймақтарында кеңжолақты интернет желісін орнату жұмыстары жалғасуда. Қазірдің өзінде 785 ауыл интернетке қосылды, оның ішінде 3G, 4G және талшықты-оптикалық байланыс жүйелері кең таралған. Бұл жұмыс негізінен мемлекеттік-жекеменшік әріптестік арқылы жүзеге асырылуда. Облыста талшықты-оптикалық байланыс жүйесі қарқынды дамытудағы мақсаты – шалғай ауылдарды жоғары жылдамдықты интернетпен қамтып, өңірдің цифрлық инфрақұрылымын жетілдіру. Қазіргі таңда 807 елді мекеннің 415-і талшықты-оптикалық желіге қосылған. Оның 305-і мемлекеттік-жекеменшік әріптестік аясында жүзеге асырылса, қалғандары «Қазақтелеком» және «Транстелеком» компанияларының қатысуымен іске асырылды.
2024 жылдың басынан бері 177 елді мекенде осы технологияны енгізу жұмыстары жалғасып жатыр, 250 мыңнан астам тұрғыны бар 5 ауылда құрылыс аяқталып, желілер іске қосылды. Қалған ауылдарда жұмыстар келесі жылы аяқталуы жоспарлануда. Атап айтқанда, бұл байланыс мемлекеттік мекемелерді, мектептерді, және басқа да әлеуметтік объектілерді сапалы интернетпен қамтамасыз етуге бағытталған. Барлығы 2966 метр оптикалық кабель төселді.
Бұл бастамалар өңірдегі экономикалық, білім беру және медициналық қызметтердің қолжетімділігін арттырып, цифрландыру процестерін жеделдетуге ықпал етуде. Сонымен қатар, Starlink спутниктік интернеті арқылы шалғай мектептерде де интернетке қолжетімділік қамтамасыз етілуде.Сонымен қатар, Түркістан қаласының негізгі қоғамдық орындарында және туристік нысандарында жоғары жылдамдықты 5G желісі іске қосылды. Бұл туристерге ғана емес, аймақтың бизнес өкілдеріне де қосымша мүмкіндік береді. «Керуен сарай», «Rixos» қонақүйі, және әуежай сияқты нысандар 5G желісінің артықшылықтарын тиімді пайдаланып жатыр
«DevFest Turkistan – 2024» конференциясы да цифрландырудағы маңызды оқиғалардың бірі болды. Шара барысында IT мамандары мен жасанды интеллект саласының сарапшылары өз тәжірибелерімен бөлісіп, цифрлық саланы дамытуға қатысты жаңа идеяларды талқылады. Бұл конференция цифрлық қоғам құру бағытындағы маңызды қадамдардың бірі болып саналады
Түркістан төрінде өткен «DevFest Turkistan – 2024» конференциясыда жасанды интеллектті дамыту мәселелері талқыланып, бұл бағыттағы бірнеше стратегиялық қадамдар қарастырылуда. 2024-2029 жылдарға арналған жасанды интеллектті дамыту тұжырымдамасы шеңберінде экономиканың әртүрлі салаларына инновациялық технологияларды енгізу жоспарлануда.
– Жасанды интеллект денсаулық сақтау саласында ерекше рөл атқаратыны сөзсіз. Ауруларды ерте диагностикалау және емдеу процестерін жетілдіру үшін қолданылмақ. Бұл жерде жасанды интеллект дәрігерлерге көмекші құрал ретінде шешім қабылдау жүйесін қолдауға бағытталған. Сонымен қатар, білім беру саласында осы технологияларды пайдалану арқылы оқыту процесін жетілдіру және цифрлық құралдарды дамыту көзделген, – деді Түркістан облысының цифрландыру, мемлекеттік қызметтер көрсету және архивтер басқармасының басшысы Марат Айнабеков.
Елімізде жасанды интеллект бойынша жыл сайын 1000 жаңа маман даярлау жоспары бар, соның ішінде Google және Huawei секілді халықаралық компаниялармен бірлескен оқыту курстары өткізіледі. Түркістан облысы да осы бастамалардың маңызды қатысушысы болып отыр, аймақ цифрлық инновациялардың сынақ алаңы ретінде танылуда. Болашақта жыл сайын 100 жаңа стартап жобасын іске қосу мақсаты қойылған, бұл өңірлік және ұлттық экономиканы дамытудың тиімді құралына айналады.
«DevFest Turkistan – 2024» конференциясын ұйымдастырушылар қазіргі таңда Түркістан облысында робототехника саласын дамытуға үлкен көңіл бөлініп отырғанын алға тартты. Бұл сала аймақтың білім беру жүйесінде ерекше орын алып, жастарға жаңа технологияларды үйренуге мүмкіндік беруде. Түркістан облысының оқушылары робототехника бойынша әртүрлі байқаулар мен жарыстарға қатысып, инновациялық жобалары мен шешімдері көпшілікке таныстыруда. Айталық, Қазығұртта өткен облыстық робототехника турниріне 300-ден астам қатысушы қатысқан болатын. Сонымен қатар, өңірде халықаралық жарыстарға қатысатын жергілікті командалар да қалыптасқан. Түркістан облысы өз өнертапқыштарын әлемдік деңгейде таныту мақсатында робототехника бойынша жарыстарды жиі өткізіп келеді.
Түркістандағы білім беру мекемелерінде осы бағытта жұмыс істейтін арнайы технопарктер мен клубтар құрылып, балалар мен жастарға робототехника негіздерін үйретеді. Бұл бастамалар аймақтың цифрлық және инженерлік салаларының дамуына ықпал етуде. Робототехника мен жасанды интеллект саласындағы жобалар аймақтың жастарында техникалық дағдыларды дамытуға, олардың шығармашылық қабілеттерін шыңдауға және инженерлік білімді тереңдетуге мүмкіндік беріп отырғаны конференция барысында сөз болды.
Жалпы, цифрлық инфрақұрылымды дамыту Түркістан облысының тұрғындарына жаңа мүмкіндіктер ұсынып, олардың мемлекеттік қызметтерге, білімге және кәсіпкерлікке қолжетімділігін арттыруда.
