Ішкі істер министрінің бірінші орынбасары Бауыржан Әленов Нұрай Серікбайдың өліміне қатысты тергеуге пікір білдірді. Оның айтуынша, күдікті жазадан жалтара алмайды, деп хабарлайды Dalanews.kz.
Бауыржан Әленовтің мәліметінше, күдікті қазір Алматы облысы Ақтас ауылындағы арнаулы психиатриялық ауруханада жатыр. Қылмыстық іс аясында сараптамалар жүргізіліп жатыр.
"Сараптамалар аяқталғаннан кейін бір ай ішінде іс сотқа жолданады. Күдікті міндетті түрде жауапқа тартылады. Бұл мәселеде алаңдауға негіз жоқ", - деді ол Сенат дәлізінде.
Сондай-ақ, ол күдіктінің есі дұрыстығын тексеру мұндай істерде қалыпты тәжірибе екенін атап өтті.
Айта кетейік, 11 қаңтарда Шымкентте 21 жастағы Нұрай Серікбай пышақ жарақаттарынан көз жұмды. Қайғылы оқиға бейнебақылау камераларына түсіп қалған.
Марқұмның туыстарының айтуынша, Нұрай Серікбай 11 рет пышақ жарақатын алған.
Кейінірек полиция қызметкерлері жедел іздестіру іс-шаралары барысында 21 жастағы тұрғынды өлтірді деген күдікті ер адамды ұстады.
Сонымен қатар, Президент Ұлттық құрылтайда шымкенттік Нұрайдың өліміне қатысты пікір білдірді. Бұған дейін күдікті жындыханаға жатқызылғаны айтылды.
