Қорғаныс министрлігіне қарайтын Ақтау гарнизонында келісімшарт бойынша қызмет ететін 39 жастағы әскери қызметші өзіне қол жұмсады, деп хабарлайды Dalanews.kz.

Оқиға 28 қыркүйекте болған.

“Ақтау гарнизонындағы әскери бөлімдердің бірінде келісімшарт бойынша қызмет ететін 1985 жылғы әскери қызметшінің денесі табылды. Әскери қызметші бір жылға жуық уақыт декреттік демалыста болған. Алдын ала ақпарат бойынша әскери қызметшінің өзіне қол жұмсауына отбасылық-тұрмыстық жанжал себеп болған. Оқиғаның себептері анықталып жатыр”, - деп мәлімдеді Ақтау гарнизонының баспасөз қызметі.

Осы факті бойынша қылмыстық іс қозғалған.

Әуе қорғанысы күштерінің қолбасшылығы марқұмның туыстары мен жақындарына көңіл айтты.

Еске салайық, қыркүйек айында бірнеше қайғылы оқиға орын алды.

Мәселен, 7 қыркүйекте Маңғыстау облысында әскери оқу-жаттығулар кезінде мерзімді қызметтегі сарбаздың бетіне оқ тиіп, ауруханаға жетпей көз жұмған еді.Адам өлімі бойынша қылмыстық іс қозғалды. Тергеу мүддесіне байланысты басқа ақпарат жарияланбады. 

Қайтыс болған сарбаздың әкесі Қорғаныс министріне бейнеүндеу жолдады. Кейіннен Қорғаныс министрлігі кінәлілер қатаң жауапкершілікке тартылатынын мәлімдеді.

16 қыркүйекте Қазақстанның оңтүстігіндегі Арыс гарнизонында әскери бөлімдердің бірінде келісімшарт бойынша қызмет ететін әскери қызметші басынан травматикалық қарудан жарақат алды.

19 қыркүйекте Аягөзде әскери қызметшінің денесі табылды. Гарнизонның алдын ала ақпараты бойынша, офицер өз-өзіне қол жұмсаған.

Ал Алматыда ҰҚК Шекара академиясының курсанты қайтыс болды.