"Алтынбекке рақмет". Желіде айыппұлға қатысты бір шендінің масқара аудио жазбасы тарап кетті

Dalanews 25 қаң. 2025 16:58 1714

Әлеуметтік желіде айыппұл салмай, тек ескертулермен шектелген полицейлерді жазғырып, жер-жебіріне жете ұрсып жатқан белгісіз ер адамның аудио жазбасы тарап кетті. Бұған қатысты Түркістан облысының полиция департаменті түсініктеме беріпті. Соған қарағанда бұл жайт осы өңірде болған, деп жазады Dalanews.kz.  
"Мынау ма, сендердің көрсеткіштерің: 1, 19... Мына арада бәрі көрініп тұр, кімнің не істегені. Ескертуді көп жазғансыңдар. Бүгін осы мәселе бойынша бізді жинағалы жатыр... Мұның бәрі БӘҚБТ базасынан алынған (әкімшілік құқық бұзушылықтардың бірыңғай тізілімі - шамамен. ред.)... Міне, Алтынбекке рақмет, 19 күн ішінде 30 хаттама толтырған. Қалғандарыңды білмеймін, не ойлап жүретіндеріңді. Қамбар, сен жеті ескерту жазғансың. Ал мен сені еңбекқор деп ойлап жүрсем", – дейді белгісіз адам желіде тарап кеткен аудиожазбада.

Сондай-ақ, әлеуметтік желіде тараған ақпаратта мұндай заңсыз нұсқаулар үшін ҚР ІІМ басшылығы қызметкерлерін қатаң жазалайтыны да айтылады.

"Аталған факт бойынша Түркістан полиция басқармасы тексеру амалдарын қолға алды, оның нәтижелері бойынша полиция қызметкерлерінің іс-әрекеттеріне құқықтық баға берілетін болады", - деді Zakon.kz тілшісіне Түркістан облысы ПД баспасөз қызметі.
 
Сондай-ақ, өңір полициясы олардың "әкімшілік хаттамалар толтыруда сандық нормативтерді белгілеу тәжірибесі алынып тасталғанын және осыған ұқсас нұсқаулар берілмегенін" айтыпты.

Бұған дейін Солтүстік Қазақстан облысының прокурорлары автокөлікті 5 минуттан артық қыздырғаны үшін полицейлердің жүргізушіге салған әкімшілік айыппұлының күшін жойған болатын.


Ұсынылған
Соңғы жаңалықтар