Áleýmettik jelide aiyppul salmai, tek eskertýlermen shektelgen politseilerdi jazǵyryp, jer-jebirine jete ursyp jatqan belgisiz er adamnyń aýdio jazbasy tarap ketti. Buǵan qatysty Túrkistan oblysynyń politsiia departamenti túsinikteme beripti. Soǵan qaraǵanda bul jait osy óńirde bolǵan, dep jazady Dalanews.kz.
"Mynaý ma, senderdiń kórsetkishteriń: 1, 19... Myna arada bári kórinip tur, kimniń ne istegeni. Eskertýdi kóp jazǵansyńdar. Búgin osy másele boiynsha bizdi jinaǵaly jatyr... Munyń bári BÁQBT bazasynan alynǵan (ákimshilik quqyq buzýshylyqtardyń biryńǵai tizilimi - shamamen. red.)... Mine, Altynbekke raqmet, 19 kún ishinde 30 hattama toltyrǵan. Qalǵandaryńdy bilmeimin, ne oilap júretinderińdi. Qambar, sen jeti eskertý jazǵansyń. Al men seni eńbekqor dep oilap júrsem", – deidi belgisiz adam jelide tarap ketken aýdiojazbada.
Sondai-aq, áleýmettik jelide taraǵan aqparatta mundai zańsyz nusqaýlar úshin QR IIM basshylyǵy qyzmetkerlerin qatań jazalaityny da aitylady.
"Atalǵan fakt boiynsha Túrkistan politsiia basqarmasy tekserý amaldaryn qolǵa aldy, onyń nátijeleri boiynsha politsiia qyzmetkerleriniń is-áreketterine quqyqtyq baǵa beriletin bolady", - dedi Zakon.kz tilshisine Túrkistan oblysy PD baspasóz qyzmeti.
Sondai-aq, óńir politsiiasy olardyń "ákimshilik hattamalar toltyrýda sandyq normativterdi belgileý tájiribesi alynyp tastalǵanyn jáne osyǵan uqsas nusqaýlar berilmegenin" aitypty.
Buǵan deiin Soltústik Qazaqstan oblysynyń prokýrorlary avtokólikti 5 minýttan artyq qyzdyrǵany úshin politseilerdiń júrgizýshige salǵan ákimshilik aiyppulynyń kúshin joiǵan bolatyn.
