قازىعۇرت اۋدانى شاربۇلاق اۋىلىنداعى «قايىپ اتا» مال بورداقىلاۋ كەشەنىندە وتكەن كوشپەلى سەمينارعا يران ەلىنەن كەلگەن ينۆەستورلارمەن قاتار اۋدان، قالا اكىمدەرى، اۋىل شارۋاشىلىعى باسقارماسىنىڭ ماماندارى، شارۋا قوجالىق يەلەرى جانە عىلىمي ورتالىقتار مەن نەسيەلىك قارجى ينستيتۋتتارىنىڭ وكىلدەرى قاتىستى.
سەميناردىڭ ماقساتى - شارۋالار مەن مەملەكەتتىڭ اراسىنداعى قارىم-قاتىناستى نىعايتا وتىرىپ، اۋىل شارۋاشىلىعىنىڭ دامۋىنا سەرپىن بەرۋ. ۇساق شارۋا قوجالىقتارىنىڭ بىرىگۋىنە مۇمكىندىك جاساپ، سول ارقىلى ءونىم كولەمىن ارتتىرىپ وتاندىق تاۋاردى شەتەلگە ەكسپورتتاۋ.
«ەلىمىزدە اۋىل شارۋاشىلىعىمەن ونىڭ ىشىندە مال شارۋاشىلىعىمەن اينالىساتىن شارۋالارعا مەملەكەت تاراپىنان قولداۋ جوعارى دەنگەيدە. وسى ورايدا اۋىل شارۋاشىلىعى كووپەراتيۆتەرىن قۇرۋ، نەسيەلەۋ جانە سۋبسيديالاۋ ماسەلەلەرىن حالىققا ءتۇسىندىرىپ شارۋالاردى اتا كاسىپكە باۋلۋ قاجەت. ەكولوگيالىق تۇرعىدان تازا ءونىم سانالاتىن ءبىزدىڭ ونىمدەرىمىزگە وزگە ەلدەردىڭ سۇرانىسى وتە جوعارى. وسىنى ءتيىمدى پايدالانۋىمىز كەرەك»، -دەدى جانسەيىت قانسەيىت ۇلى.
سەمينارعا كەلگەن عالىمدار مەن بىلىكتى ماماندار مال تۇقىمىن اسىلداندىرۋ بويىنشا تاجىريبەلەرىمەن ءبولىسىپ ،شارۋالاردى تولعاندىراتىن ساۋالدارعا جاۋاپ بەرەدى. كوشپەلى سەمينارعا جينالعاندار «قايىپ اتا» مال بورداقىلاۋ كەشەنىن ارالاپ اتقارىلىپ جاتقان جۇمىستارمەن تانىستى.
ايتا كەتەيىك، قازعۇرت اۋدانىنداعى «قايىپاتا» cەرىكتەستىگى نەگىزىنەن مال بورداقىلاۋمەن اينالىسادى. بۇگىنگى تاڭدا مۇندا 3 مىڭ باس ءىرى قارا بورداقىلانىپ جاتىر. مال بورداقىلاۋ الاڭىنداعى اقباس سيىرلار ورتا ەسەپپەن 300-350 كەلىگە دەيىن ەت بەرەدى. ەتتى مالعا ءتان بەلگىلەرى دە ايقىن – تەز جەتىلەدى، كەۋدەسى كەڭ، ەتتى، اياقتارى قىسقا، بەرىك كەلەدى. ۇرعاشى تايىنشا كۇنىنە 700-800 گرامم، 15-18 ايلىق بۇقالاشتار تاۋلىگىنە 900 گراممعا دەيىن سالماق قوسادى. ارينە، ول ءۇشىن مالعا دۇرىس كۇتىم قاجەت. سولتۇستىكتەن جەتكىزىلگەن ءىرى قارانىڭ بابى بولعاندىقتان، كۇنگەيدىڭ كليماتىنا تەز جەرسىنگەن.
يران يسلام مەملەكەتى جىلىنا 2 ملن. 400 توننا ەت تۇتىنادى. وسى قاجەتتىلىكتىڭ ءبىر بولىگىن قامتۋ ماقساتىندا، ەكى تاراپ كۇنىنە 3000 باس ۇساق مال ەتى مەن 100 باس مەن ءىرى قارا ەتىن الۋ ءۇشىن كەلىسىم شارت جاساستى. بۇل ءوز كەزەگىندە، ەل ەكونوميكاسىنا وڭ ىقپالىن تيگىزىپ، ەلباسىنىڭ ەت ەكسپورتىن ارتتىرۋ مىندەتىن جۇزەگە اسىرۋعا مۇمكىندىك بەرەدى.
سونىمەن قاتار، الداعى ۋاقىتتا وڭىرىمىزدە ءىرىقارا مال قاۋىمداستىعىن قۇرۋ كوزدەلىپ وتىر. ويتكەنى وبلىسىمىزدا سوڭعى ەكى جىلدا ءىرى قارا مال سانى 35 مىڭعا ارتىپ، 865 مىڭ باستى، قوي-ەشكى 155 مىڭعا ارتىپ 3 ملن. 893 مىڭعا، جىلقى 16 مىڭعا ارتىپ 230 مىڭعا، تۇيە 1،7 مىڭ ارتىپ 23 مىڭعا جەتىپ وتىر.
وقو اكىمىنىڭ باسپا ءسوز قىزمەتى
