وڭتۇستىك قازاقستان وبلىسىنىڭ اكىمى جانسەيىت تۇيمەبايەۆتىڭ باستاماسىمەن ايماقتاعى شارۋالاردى كاسىپكە باۋلىپ، شارۋاشىلىققا بەيىمدەۋ ماقساتىندا وڭىرىمىزدە وقىتۋ سەمينار ايلىعى باستالدى. اۋدان، قالالاردا ۇيىمداستىرىلىپ جاتقان كوشپەلى سەميناردا، اۋىل شارۋاشىلىعى كووپەراتيۆتەرىن قۇرۋ، نەسيەلەۋ جانە سۋبسيديالاۋ ماسەلەلەرى قامتىلماق.

وسىعان بايلانىستى، شىمكەنتتەگى مارتوبە ەلدى مەكەنىنە قاراستى «كازاگرونوم» وندىرىستىك جىلىجاي كەشەنى اۋماعىندا  وبلىستىق  سەمينار  ءوتتى. وعان اۋدان، قالا اكىمدەرى مەن اۋىل شارۋاشىلىعى باسقارماسىنىڭ ماماندارى، شارۋالار مەن شارۋا قوجالىق يەلەرى، عىلىمي ورتالىقتار مەن قارجىلىق ينستيتۋتتاردىڭ وكىلدەرى قاتىستى.

سەميناردىڭ ماقساتى – شارۋالار مەن مەملەكەتتىڭ اراسىنداعى قارىم-قاتىناستى نىعايتا وتىرىپ، اۋىل شارۋاشىلىعىنىڭ دامۋىنا سەرپىن بەرۋ. ۇساق شارۋا قوجالىقتارىنىڭ بىرىگۋىنە مۇمكىندىك جاساپ، سول ارقىلى ءونىم كولەمىن ارتتىرۋ بولىپ تابىلادى.

كەزدەسۋدە ءوڭىر باسشىسى تاياۋدا مۇنداي باسقوسۋلاردىڭ ەت-سۇت باعىتىندا قازىعۇرت پەن ارىس جانە سارىاعاش اۋداندارىندا، قۇس شارۋاشىلىعى بويىنشا ورداباسى مەن تولەبيدە، بالىق شارۋاشىلىعى اياسىندا شاردارا مەن تۇلكىباستا، قارقىندى باۋ شارۋاشىلىعى شەڭبەرىندە سايرامنىڭ شارۋاشىلىق وكىلدەرىمەن ۇيىمداستىرىلاتىنىن جەتكىزدى.

– حالقى تىعىز ورنالاسقان وڭتۇستىك قازاقستان وبلىسىن جان-جاقتى دامىتۋ اياسىندا مەملەكەت باسشىسىنىڭ تاپسىرماسى بار. سوندىقتان، ءوڭىر حالقىن جەمىس-جيدەك، كوكونىستەرمەن، جالپى، اۋىل شارۋاشىلىعى ونىمدەرىمەن قامتۋ ءۇشىن بارىنشا جۇمىس ىستەۋىمىز قاجەت. بۇگىنگى سەميناردىڭ ماقساتى دا اۋىل شارۋاشىلىعى ءونىمىن وندىرۋشىلەر مەن مەملەكەت اراسىنداعى بايلانىستى نىعايتىپ، ۇساق قوسالقى شارۋاشىلىقتاردى كووپەراتيۆتەرگە بىرىكتىرۋ ەكەنىن ايتا كەتۋ قاجەت، – دەدى ج.تۇيمەبايەۆ.

سونىمەن بىرگە، شارۋالارعا مەملەكەت تاراپىنان جاسالىپ جاتقان قولداۋلاردىڭ رەتى ايتىلىپ، كووپەراتيۆتى قۇرۋدىڭ ءتارتىبى، بەرىلىپ جاتقان سۋبسيديالار مەن نەسيەلەر جايلى كەڭىنەن ماعلۇماتتار بەرىلدى. ال عىلىمي ورتالىقتار وكىلدەرى جىلىجاي شارۋاشىلىعى سالاسىنداعى زاماناۋي تەحنيكالىق زەرتتەۋلەرىن العا تارتىپ، قىزىقتىرعان ساۋالدارعا جاۋاپ بەردى.



ايتا كەتەيىك، بۇگىنگى تاڭدا وبلىستاعى جىلىجايلار  كولەمى 1123 گەكتاردى قۇراپ،  رەسپۋبليكاداعى ۇلەسى 86 پايىزعا جەتىپ وتىر. جىلىجايلاردىڭ باسىم بولىگى سارىاعاش اۋدانىندا ورنالاسقان (591 گا – 53 %).

جىلىجاي شارۋاشىلىقتارىن دامىتۋعا مەملەكەت تاراپىنان قولداۋلار كۇشەيتىلگەن.   وندىرىستىك  جىلىجايدىڭ  ءار گەكتارىنا 1،5 ملن. تەڭگە (جىلىتۋ جۇيەسى  جوق  جىلىجايدىڭ 1 گەكتارىنا 800 مىڭ تەڭگە) سۋبسيديا بەرىلەدى. تىڭايتقىشتار مەن  گەربيسيدتەرگە  50 %  دەيىن  سۋبسيديا قاراستىرىلعان.  ونەركاسىپتىك باعىتتاعى جىلىجايلارعا 11،3%-بەن  نەسيە  بەرىلسە، كووپەرتيۆ مۇشەلەرىنىڭ 6 %-بەن نەسيە الۋعا  مۇمكىندىگى بار.



 

وقو اكىمىنىڭ باسپا ءسوز قىزمەتى