گولليۆۋد اكتريساسى ليندسي لوحان ءومىرىنىڭ جاڭا ءبىر بەلەسىن باستادى دەگەن حابارلاما اياسىندا، باتىستىق باق-تار، بالكي، "ليندسي لوحان يسلامدى قابىلدادى" دەگەن جاڭالىقتاردى تاراتۋدا.

مۇنىڭ الدىندا ليندسي ومىرىندە ءبىرقاتار وقيعالار ورىن العان ەدى. اۋەلدە بىرنەشە جىل بۇرىن نيۋ-يوركتە پاپاراسسي قولىنا ۇستاعان قۇرانى بار اكتريسانى فوتوعا ءتۇسىرىپ العان بولاتىن. كەيىن اكتريسا تۇركياعا بارىپ، باسىنا ورامال تاعىپ، كونفەرەنسيادا ءسوز سويلەدى، سونداي-اق، سيريا بوسقىندارىنىڭ لاگەرىنە بارىپ، ءوز ۋاقىتى مەن كوڭىلىن سيريا بالالارىنا ارنادى. ال سوڭعى جاڭالىقتاردىڭ ءبىرى لوحاننىڭ الەۋمەتتىك جەلىلەرىندەگى اككاۋنتىمەن بايلانىستى – ول ينستاگرام مەن تۆيتتەردەن ءوزىنىڭ بارلىق فوتولارىن الىپ تاستاعان، ونىڭ ورنىنا مۇسىلمانداردىڭ ءداستۇرلى امانداسۋى «الەيكۋم ساليام» پايدا بولعان، اۋدارماسى «سىزگە دە اللانىڭ سالەمى بولسىن» دەگەندى بىلدىرەدى.

ءليندسيدىڭ وسى ارەكەتى "اكتريسا يسلامدى قابىلدادى" دەگەن حابارلامانىڭ تارالۋىنا سەبەپ بولدى. اكتريسانىڭ ءوز ومىرىندە بولىپ جاتقان وقيعالارعا دەگەن كوزقاراسىن بىلدىرەتىن سۇحباتىن تابۋدىڭ بىزگە ءساتى ءتۇستى. نەگىزىندە وعان نە بولعانى تۋرالى تاقىرىپتى پايىمداۋدان اۋلاقپىز، تەك  ونىڭ ءبىر تۇرىك تەلەارناسىندا سويلەگەن سوزىنەن ۇزىندىلەر كەلتىرەمىز.

ليندسەي لوحان، گولليۆۋد اكتريساسى: «شتاتتارداعى سوڭعى ون جىلدا مەنىڭ ومىرىمدە ءارتۇرلى درامالى وقيعالار ورىن الدى. ماعان ءقازىر لوندوندا تۇراتىن ساۋد ارابيالىق جاقىن دوستارىم ءارقاشان قولداۋ كورسەتەتىن. ولار ماعان قۇراننىڭ ءبىر داناسىن سىيعا تارتتى. مەن ونى وقىپ، ۇيرەنە باستادىم ءارى وزىممەن بىرگە نيۋ-يورككە الىپ كەلدىم. بۇل كىتاپ ماعان ۇيلەسىلىمدىلىك پەن رۋحاني ماعىناسى مول، مۇلدە وزگە دۇنيەنىڭ ەسىگىن اشتى. بۇل — شىنايى مەن ەدىم.

پاپاراسسي مەنى قولىمداعى قۇرانمەن فوتوعا ءتۇسىرىپ العان، قۇراندى ۇستاعانىم ءۇشىن عانا مەنى قوعام سوگىپ، مەنى قارالاپ كورسەتۋگە تىرىستى. ءوزىمدى نيۋ-يوركتەن لوندونعا كەتىپ قانا باقىتتى سەزىنە باستادىم. ءوز وتانىمدا قالۋ مەن ءۇشىن قيىن بولدى. وسىنىڭ ءبارى — قۇراندى وقىپ، بىلگىم كەلەتىندىگىمنەن تۋعان ءوز تىلەگىم ەدى. مەنى فوتوعا ءتۇسىرىپ جۇرگەندەرىنەن حابارىم جوق بولاتىن، بۇل باسپا ءۇشىن جاسالماعان ەدى. وسى وقيعا كوپتەگەن ادامداردىڭ ۇنەمى وسىنداي جاعدايلارعا تاپ بولاتىندىعىن تۇسىنۋگە كومەكتەستى. مىسالى ءۇشىن، نەلىكتەن حيجاب كيگەن ايەلگە وزگەشە تۇردە قارايدى، ءوزىم دە وسىنداي جاعدايدى باستان وتكەردىم.

الگى ءبىر ايەلدىڭ (بۇل جەردە لاگەردەن قاشقان بوسقىن ايەل ءسوز بولىپ وتىر – رەد.ەسكەرتپەسى) تۇركيادا مەنىڭ باسىما ورامال تاققانىن وزىمە ءبىر ەرەكشە ابىروي كوردىم. ويتكەنى مەن ول ءۇشىن بەيتانىس ادام بولسام دا، ول ماعان ءوز مادەنيەتىنىڭ ءبىر بولىگى بولۋىما رۇقسات ەتتى. مەن وعان: "ماعان ءسىزدىڭ ورامالىڭىزدىڭ ءتۇسى ۇنايدى»، - دەپ ەدىم، ول ءوز ورامالىن ماعان سىيعا تارتتى. مۇمكىن ونىڭ بار-جوعى ەكى-اق ورامالى بولعان شىعار، ءبىراق بىرەۋىن ول ماعان سىيلادى. سول كەزدە مەن وزىمە بىلاي ايتتىم: مەنى مۇلدە بىلمەي تۇرىپ، بۇل ايەل وزىنە سونداي قىمبات نارسەسىن ماعان سىيعا تارتقاندىقتان، مەن بۇل ورامالدى شەشپەيمىن. ءبىراق ب ا ق، قاشاندا سولاي، ءبارىن بۇرمالاپ كورسەتتى، نە ءۇشىن ورامالدى تاققانىم ەشكىمنىڭ قاپەرىنە دە كىرىپ شىقپادى، ءبارىنىڭ ويى شۋلى تاقىرىپتاردا عانا بولدى، مۇنىڭ ءبارى وتكەندە قۇرانمەن بولعان جاعدايداي بولىپ شىقتى.

بىلەسىز بە، مەنىڭ جاسىم ءقازىر 30-دا، ءوز ءومىرىمدى دۇرىس ارناعا سالۋىم كەرەكتىگىن جەتە تۇسىنەمىن. كۇن وتكەن سايىن ءوز ءومىرىمنىڭ قالاي ءوتىپ جاتقانىن باقىلاعىم كەلەدى...»

ليندسي لوحاننىڭ يسلامدى قابىلدادى دەگەن حابارلامالار الەۋمەتتىك جەلىلەردە وڭ كوزقاراسقا دا يە بولدى. فەيسبۋك قولدانۋشىلاردىڭ ءبىرى بىلاي اتاپ وتكەن ەكەن:  «بۇل ول ءۇشىن جاقسى... ول تىنىشتىققا كەنەلەدى». باسقا ءبىر قولدانۋشى كرەيگ ماكدونالد بىلايشا تۇسىنىك بەرگەن: «ەگەر يسلام وعان سالاۋاتتى ءومىر سالتىن تابۋعا ءارى ساقتاپ قالۋعا كومەكتەسسە، وندا بۇل راسىندا عاجايىپ ءبىر وقيعا بولماق».

ءوز كەزەگىمىزدە، ءبىز دە اكتريساعا ارنالعان يگى تىلەكتەرگە قوسىلامىز. ليندسي لوحاننىڭ ومىرىندە تالاي شىرقاۋلار مەن قۇلديلاۋلار بولعان، ءبىراق بۇل قىزدىڭ اقيقات تۋرالى ويلانۋى ءبىزدى قۋانتپاي قويمايدى. اللا تاعالا وعان جانە باسقا دا اقيقاتتى ىزدەۋشىلەرگە،  اقيقاتتى تاۋىپ، جاراتۋشىنىڭ رازىلىعىندا بولۋعا ءناسىپ ەتسىن دەپ تىلەيمىز... ءامين!