Gollivýd aktrisasy Lindsi Lohan ómiriniń jańa bir belesin bastady degen habarlama aiasynda, batystyq BAQ-tar, bálki, "Lindsi Lohan Islamdy qabyldady" degen jańalyqtardy taratýda.
Munyń aldynda Lindsi ómirinde birqatar oqiǵalar oryn alǵan edi. Áýelde birneshe jyl buryn Niý-Iorkte paparatstsi qolyna ustaǵan Qurany bar aktrisany fotoǵa túsirip alǵan bolatyn. Keiin aktrisa Túrkiiaǵa baryp, basyna oramal taǵyp, konferentsiiada sóz sóiledi, sondai-aq, siriia bosqyndarynyń lagerine baryp, óz ýaqyty men kóńilin siriia balalaryna arnady. Al sońǵy jańalyqtardyń biri Lohannyń áleýmettik jelilerindegi akkaýntymen bailanysty – ol Instagram men Tvitterden óziniń barlyq fotolaryn alyp tastaǵan, onyń ornyna musylmandardyń dástúrli amandasýy «aleikým saliam» paida bolǵan, aýdarmasy «Sizge de Allanyń sálemi bolsyn» degendi bildiredi.
Lindsidiń osy áreketi "aktrisa Islamdy qabyldady" degen habarlamanyń taralýyna sebep boldy. Aktrisanyń óz ómirinde bolyp jatqan oqiǵalarǵa degen kózqarasyn bildiretin suhbatyn tabýdyń bizge sáti tústi. Negizinde oǵan ne bolǵany týraly taqyrypty paiymdaýdan aýlaqpyz, tek onyń bir túrik telearnasynda sóilegen sózinen úzindiler keltiremiz.
Lindsei Lohan, Gollivýd aktrisasy: «Shtattardaǵy sońǵy on jylda meniń ómirimde ártúrli dramaly oqiǵalar oryn aldy. Maǵan qazir Londonda turatyn Saýd Arabiialyq jaqyn dostarym árqashan qoldaý kórsetetin. Olar maǵan Qurannyń bir danasyn syiǵa tartty. Men ony oqyp, úirene bastadym ári ózimmen birge Niý-Iorkke alyp keldim. Bul kitap maǵan úilesilimdilik pen rýhani maǵynasy mol, múlde ózge dúnieniń esigin ashty. Bul — shynaiy men edim.
Paparatstsi meni qolymdaǵy Quranmen fotoǵa túsirip alǵan, Qurandy ustaǵanym úshin ǵana meni qoǵam sógip, meni qaralap kórsetýge tyrysty. Ózimdi Niý-Iorkten Londonǵa ketip qana baqytty sezine bastadym. Óz Otanymda qalý men úshin qiyn boldy. Osynyń bári — Qurandy oqyp, bilgim keletindigimnen týǵan óz tilegim edi. Meni fotoǵa túsirip júrgenderinen habarym joq bolatyn, bul baspa úshin jasalmaǵan edi. Osy oqiǵa kóptegen adamdardyń únemi osyndai jaǵdailarǵa tap bolatyndyǵyn túsinýge kómektesti. Mysaly úshin, nelikten hijab kigen áielge ózgeshe túrde qaraidy, ózim de osyndai jaǵdaidy bastan ótkerdim.
Álgi bir áieldiń (bul jerde lagerden qashqan bosqyn áiel sóz bolyp otyr – red.eskertpesi) Túrkiiada meniń basyma oramal taqqanyn ózime bir erekshe abyroi kórdim. Óitkeni men ol úshin beitanys adam bolsam da, ol maǵan óz mádenietiniń bir bóligi bolýyma ruqsat etti. Men oǵan: "Maǵan sizdiń oramalyńyzdyń túsi unaidy», - dep edim, ol óz oramalyn maǵan syiǵa tartty. Múmkin onyń bar-joǵy eki-aq oramaly bolǵan shyǵar, biraq bireýin ol maǵan syilady. Sol kezde men ózime bylai aittym: meni múlde bilmei turyp, bul áiel ózine sondai qymbat nársesin maǵan syiǵa tartqandyqtan, men bul oramaldy sheshpeimin. Biraq BAQ, qashanda solai, bárin burmalap kórsetti, ne úshin oramaldy taqqanym eshkimniń qaperine de kirip shyqpady, báriniń oiy shýly taqyryptarda ǵana boldy, munyń bári ótkende Quranmen bolǵan jaǵdaidai bolyp shyqty.
Bilesiz be, meniń jasym qazir 30-da, óz ómirimdi durys arnaǵa salýym kerektigin jete túsinemin. Kún ótken saiyn óz ómirimniń qalai ótip jatqanyn baqylaǵym keledi...»
Lindsi Lohannyń Islamdy qabyldady degen habarlamalar áleýmettik jelilerde oń kózqarasqa da ie boldy. Feisbýk qoldanýshylardyń biri bylai atap ótken eken: «Bul ol úshin jaqsy... Ol tynyshtyqqa keneledi». Basqa bir qoldanýshy Kreig Makdonald bylaisha túsinik bergen: «Eger Islam oǵan salaýatty ómir saltyn tabýǵa ári saqtap qalýǵa kómektesse, onda bul rasynda ǵajaiyp bir oqiǵa bolmaq».
Óz kezegimizde, biz de aktrisaǵa arnalǵan igi tilekterge qosylamyz. Lindsi Lohannyń ómirinde talai shyrqaýlar men quldilaýlar bolǵan, biraq bul qyzdyń aqiqat týraly oilanýy bizdi qýantpai qoimaidy. Alla Taǵala oǵan jáne basqa da aqiqatty izdeýshilerge, aqiqatty taýyp, Jaratýshynyń razylyǵynda bolýǵa násip etsin dep tileimiz... Ámin!
Derekkóz: muftyat.kz
