قازاقستان ۇلتتىق بانك ءتوراعاسى تيمۋر سۇلەيمەنوۆ 29 قاراشادا وتكەن بريفينگتە 15-29 قاراشا ارالىعىندا - 14 كۇن بويى ينتەرۆەنسيا جۇرگىزگەندەرىن، ونىڭ كولەمى 1 ملرد دوللاردى قۇراعانىن جەتكىزدى. ءقازىر بۇل پروسەسس توقتاتىلعان، ۇلتتىق بانك جاقىن ارادا ۆاليۋتالىق ينتەرۆەنسيالار جۇرگىزۋدى جوسپارلاپ وتىرعان جوق، دەپ حابارلايدى Dalanews.kz

ول ۇلتتىق بانك اقشا ايىرباس باعامىنىڭ دەڭگەيىن ايقىنداۋدى ماقسات ەتپەيتىنىن باسا اتاپ ءوتتى.

"ءبىزدە نارىقتىڭ ءوزى سۇرانىس پەن ۇسىنىستىڭ بالانسى نەگىزىندە دوللاردىڭ باعامى قانداي بولاتىنىن انىقتايدى. ءبىز نارىقتا ويىنشى رەتىندە ارەكەت ەتەمىز،  ۇلتتىق قوردان بولىنگەن ترانسفەرتتەردى ايىرباستايمىز، كەيدە اقشا ساتىپ الامىز. ءبىراق كەز-كەلگەن كۋرس، مەيلى ول 500، 490، 510 تەڭگە بولسىن، ءبىز ونى تارگەتتەمەيمىز. ءبىز ءوز قالاۋىمىزبەن ينتەرۆەنسيا جۇرگىزبەيمىز، نارىقتا اياق-استى دۇربەلەڭ تۋىنداعاندا ونى تىنىشتاندىرۋ ءۇشىن، ياعني قاجەت بولعاندىقتان ارالاسامىز"، - دەدى تيمۋر سۇلەيمەنوۆ.

 سونىمەن قاتار، ول نارىقتا ءبىر اپتادان استام ۋاقىت بويى ەشكىم دوللار ساتپاعانىن، ناتيجەسىندە سىرتقى ەكونوميكالىق قىزمەت سۋبەكتىلەرى ءۇشىن وتىمدىلىككە ۇلكەن سۇرانىس قالىپتاسقانىن اتاپ ءوتتى.

"ءبىز ينتەرۆەنسيالار جۇرگىزدىك. ءقازىر ونى توقتاتتىق جانە قازىرگى ۋاقىتتا كۋرس تازا نارىقتىق فاكتورلاردىڭ اسەرىنەن قالىپتاسۋدا. جوعارىدا اتاپ وتكەنىمدەي، ەگەر كۇرت وزگەرىستەر، سپەكۋلياتيۆتىك ارەكەتتەر، نەگىزسىز ىرگەلى نەمەسە نارىقتىق ءوسۋ فاكتورلارى بولماسا، ءبىز ارالاسپايمىز (ۆاليۋتالىق ينتەرۆەنسيالار جۇرگىزبەيمىز)"، - دەدى تيمۋر سۇلەيمەنوۆ.

ول جۇرگىزىلگەن ۆاليۋتالىق ينتەرۆەنسيا كولەمىن دە اتاپ ءوتتى.

"ۇلتتىق بانك ينتەرۆەنسيانى سوڭعى رەت 2022 جىلدىڭ مامىرىندا، ياعني 2،5 جىل بۇرىن وتكىزگەن. بۇل ينفلياسيانىڭ كۇرت ءوسىمى جانە اقشا باعامىنداعى تۇراقسىزدىققا بايلانىستى بولدى. ونىڭ وبەكتيۆتى سەبەبى بولدى، ۋكرايناداعى سوعىسپەن بايلانىستى. ءبىز ينتەرۆەنسيانى 2024 جىلدىڭ 15-16 قاراشاسىنان باستاپ، كەشەگى كۇنگە دەيىن جۇرگىزدىك: 1 ميلليارد دوللارعا. 15-29 قاراشا ارالىعىندا - 14 كۇن بويى. وعان دەيىن ينتەرۆەنسيا جاسامادىق. بۇل ءبىزدىڭ سوڭعى 2،5 جىلدا جاساعان ينتەرۆەنسيامىز"، - دەپ ءسوزىن تۇيىندەدى ۇلتتىق بانك باسشىسى.

ايتا كەتسەك، ۇلتتىق بانك قور بيرجاسىندا ۆاليۋتالىق ينتەرۆەنسيا جۇرگىزىپ جاتقانىن، الدىمەن ساراپشىلار بولجادى. ال ۇلتتىق بانك مۇنى تەڭگە قۇنسىزدانعاندا كەشە راستادى.