پرەمەر-مينيستر ولجاس بەكتەنوۆ استانا قالاسى كاسىپورىندارىندا مەتاللۋرگيا، جەڭىل جانە قۇرىلىس ونەركاسىبى، اۆتوموبيل جانە تەمىرجول ماشيناسىن جاساۋ سالالارىنىڭ دامۋىمەن تانىستى. پرەزيدەنتتىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا ايتىلعان ەكونوميكانى ءارتاراپتاندىرۋ جانە باسىم سالالارداعى ينۆەستيسيالىق جوبالاردى ىسكە اسىرۋ جونىندەگى تاپسىرمالارىنىڭ ورىندالۋى تەكسەرىلدى، دەپ حابارلايدى Dalanews.kz.
يندۋستريالىق پارك اۋماعىندا پرەمەر-مينيسترگە استانانىڭ الەۋمەتتىك-ەكونوميكالىق دامۋى تۋرالى باياندالدى. قالا اكىمىنىڭ ورىنباسارى ەۆگەنيي گلوتوۆ ءبىرىنشى جارتىجىلدىقتىڭ قورىتىندىسى بويىنشا استانانىڭ ءجوو كولەمى 5،5 ترلن تەڭگەگە جەتىپ، وتكەن جىلعى كورسەتكىشتەن 7%-عا اسىپ تۇسكەنىن حابارلادى. جالپى وڭىرلىك ءونىم قۇرىلىمىندا شاعىن جانە ورتا بيزنەستىڭ ۇلەسى 72%-دى قۇرايدى. بيىلعى 10 ايدا استاناعا شامامەن 1،3 ترلن تەڭگە ينۆەستيسيا تارتىلدى، بۇل رەتتە ونەركاسىپتىك ءوندىرىس كولەمى 2023 جىلمەن سالىستىرعاندا شامامەن 7%-عا ءوستى.
پرەمەر-مينيستر 7،5 مىڭ شارشى مەتر اۋماقتا ورنالاسقان «Digital System Service» ج ش س زاۋىتىنىڭ وندىرىستىك سەحتارىن ارالاپ كوردى. تەلەكوممۋنيكاسيا جابدىقتارىن، ونىڭ ىشىندە مودەمدەردى، كوممۋتاتورلاردى، باعدارلاۋىشتاردى، تەلەفون اپپاراتتارى مەن ۇيدە، كەڭسەدە جانە ونەركاسىپتىك پايدالانۋعا ارنالعان ستانسالاردى شىعارۋ جولعا قويىلعان. زاۋىتتا باعدارلامالىق جاساقتامانى ازىرلەۋدەن باستاپ دايىن ءونىمدى جيناۋعا جانە وراۋعا دەيىن ءوندىرىستىڭ تولىق سيكلى جۇزەگە اسىرىلادى. پرەمەر-مينيسترگە جاڭعىرتۋدان كەيىن كاسىپورىننىڭ قۋاتى جىلىنا 720 مىڭ بىرلىككە دەيىن وسكەنى، ونىڭ كولەمىن 805 مىڭ قۇرىلعىعا دەيىن ۇلعايتۋ مۇمكىندىگى تۋرالى باياندالدى. 2005 جىلى اشىلعان ساتتەن باستاپ زاۋىتتى دامىتۋعا سالىنعان ينۆەستيسيالاردىڭ جالپى سوماسى شامامەن $4،5 ملن-دى قۇرادى. بۇگىنگى تاڭدا ءوندىرىس 100 قىزمەتكەردى تۇراقتى جۇمىسپەن قامتاماسىز ەتەدى.
ولجاس بەكتەنوۆ يمپورتقا تاۋەلدىلىكتى ازايتۋ جانە جوعارى تەحنولوگيالىق ءونىمنىڭ ەكسپورتىن ۇلعايتۋ ماقساتىندا جاعداي جاساۋ ءۇشىن مۇنداي وندىرىستەردىڭ ماڭىزىن اتاپ ءوتتى. قازىرگى ۋاقىتتا Digital System Service تاۋارلار جەلىسى قازاقستان نارىعىندا كەڭىنەن ۇسىنىلعان. كومپانيانىڭ دامۋ جوسپارىندا شەتەلدىك نارىققا شىعۋ قاراستىرىلعان، ونىڭ ىشىندە وزبەكستان، ازەربايجان، قىرعىزستان، رەسەي، اراب ەلدەرى بار.
امەريكالىق Wabtec كومپانياسىنىڭ ينۆەستيسيالىق جوباسى ارقىلى ولجاس بەكتەنوۆ تەمىرجول ماشيناسىن جاساۋ سالاسىنىڭ دامۋىمەن تانىستى. «لوكوموتيۆ قۇراستىرۋ زاۋىتى» ماگيسترالدىق تەپلوۆوزداردى قۇراستىرۋ كاسىپورنى جىلىنا 120 بىرلىككە دەيىن شىعارادى. ءوندىرىس باستالعاننان بەرى بارلىعى 611 لوكوموتيۆ جينالدى. كومپانيا پرەزيدەنتى مارات تىلەۋبايەۆ پرەمەر-مينيسترگە زاۋىتتا بارلىق نەگىزگى قۇراستىرۋ توراپتارى يگەرىلگەنىن، لوكاليزاسيا دەڭگەيى بۇگىندە 75%-عا جەتكەنىن باياندادى. جوباعا سالىنعان ينۆەستيسيالاردىڭ جالپى سوماسى – 30 ملرد تەڭگە. كاسىپورىندا 742 جۇمىس ورنى اشىلدى.
پرەمەر-مينيستر تەمىر جول ماشيناسىن جاساۋدى دامىتۋعا، جاڭا وندىرىستىك جانە سەرۆيستىك وبەكتىلەردى قۇرۋعا ينۆەستيسيالاردىڭ ءوسۋىنىڭ وڭ ۇردىستەرىن اتاپ ءوتتى. مۇنداي جوبالاردى ىسكە اسىرۋ مەملەكەت باسشىسىنىڭ العا قويعان مىندەتىنە سايكەس قازاقستاننىڭ كولىك-لوگيستيكالىق حاب رەتىندە قالىپتاسۋىنا ىقپال ەتەدى.
ولجاس بەكتەنوۆ «Ashina KZ» ج ش س تىگىن فابريكاسىندا جەڭىل ونەركاسىپتىڭ دامۋىمەن تانىستى. كاسىپورىننىڭ جىلدىق قۋاتى – 24 مىڭ بىرلىك ءونىم. جوبانىڭ قۇنى 1،4 ملرد تەڭگەنى قۇرايدى، 60 جۇمىس ورنى اشىلدى.
سونداي-اق جۇمىس ساپارى بارىسىندا ولجاس بەكتەنوۆ «تاۋ-كەن التىن» ج ش س اففيناج زاۋىتىندا بولدى. كاسىپورىن جوعارى ساپانى قامتاماسىز ەتە وتىرىپ، التىن مەن باسقا دا باعالى مەتالداردى قوسپالاردان تازارتۋمەن اينالىسادى. زاۋىت تمد-دا تەڭدەسى جوق وزىق اففيناج تەحنولوگيالارى بويىنشا جۇمىس ىستەيدى، بۇل الەمدىك ستاندارتتارعا سايكەس كەلەتىن ونىمدەردى شىعارۋعا مۇمكىندىك بەرەدى. كاسىپورىن ىسكە قوسىلعان ساتتەن باستاپ بارلىعى 336،7 توننا تازارتىلعان التىن جانە 64،2 توننا كۇمىس ءوندىرىلدى، جىلدىق قۋاتى 25 توننا التىن مەن 50 توننا كۇمىسكە جەتەدى. «تاۋ-كەن التىن» ج ش س ديرەكتورى اينۇر ايدارحانوۆ زاۋىت ەنەرگيا تۇتىنۋ، سۋ مەن جىلۋ شىعىنىن ازايتا وتىرىپ، ESG-قاعيداتتارىن بەلسەندى ەنگىزگەنىن، سونداي-اق كاتاليزاتورلار مەن قالدىقتاردى قايتا وڭدەۋدى دامىتىپ جاتقانىن ايتتى. بۇل شيكىزات بازاسىن كەڭەيتۋگە ءارى نارىقتاعى ۇستانىمدى نىعايتۋعا مۇمكىندىك بەرەدى.
پرەمەر-مينيستر زاۋىتتىڭ قىزمەتى قازاقستاننىڭ باعالى مەتالداردىڭ الەمدىك نارىعىنداعى ۇستانىمىن نىعايتۋعا ىقپال ەتەتىنىنە توقتالدى. جالپى، مۇنداي وندىرىستىك جوبالار ەل ەكونوميكاسىن ءارتاراپتاندىرۋ جونىندەگى ستراتەگيانى ىسكە اسىرۋدا شەشۋشى ءرول اتقارادى.
«مەملەكەت باسشىسى ەلىمىزدىڭ ونەركاسىپتىك الەۋەتىن تولىق اشۋ مىندەتىن قويدى. بىزدە بۇل ءۇشىن بارلىق مۇمكىندىكتەر مەن قاجەتتى قۇرالدار بار. قولايلى جاعدايلارى بار وسىنداي يندۋستريالىق پاركتەر ونەركاسىپ سەكتورىنىڭ دامۋىنا ىقپال ەتەدى. بۇگىنگى تاڭدا قازاقستاندا ءارتۇرلى سالالىق باعىتتاعى 14 ارنايى ەكونوميكالىق ايماق جانە 20-دان استام يندۋستريالىق ايماق جۇمىس ىستەيدى. ءبىز بۇل تاجىريبەنى جالعاستىرامىز ءارى كەڭەيتەمىز. ءبىزدىڭ مىندەتىمىز – جوعارى دەڭگەيدە قايتا وڭدەۋدى دامىتۋ، وتاندىق شيكىزاتتى ءتيىمدى پايدالانۋ جانە قايتا وڭدەۋ، سونداي-اق ءىرى كاسىپورىنداردىڭ اينالاسىندا ساباقتاس وندىرىستەردى قالىپتاستىرۋ. يمپورتقا تاۋەلدىلىكتى تومەندەتىپ قانا قويماي، قوسىلعان قۇنى ايتارلىقتاي جوعارى ونىمدەردىڭ ەكسپورتىن ارتتىرۋ ءۇشىن جاڭا مۇمكىندىكتەر جاساۋ ماڭىزدى»، — دەپ اتاپ ءوتتى ولجاس بەكتەنوۆ.
