حالقىم ءسۇيدىم مەن سەنى،
ەركەلەتتىڭ سەن مەنى
ماحاتما گاندي
ادامزاتتىڭ اناسى – قاسيەتتى قارا جەر مەن تىرەۋسىز، كيەلى اسپان جاراتقان، كوك كۇمبەزدەي توڭكەرىلگەن زەڭگىر كوككە اي مەن كۇن ورناتىپ، ونى التىن شەگە – سامالاداي سامساعان سانسىز جۇلدىزدارمەن بەكىتكەن قۇزىرەتى شەكسىز، مەيىرىمى مول، شاپاعاتى زور اللا تاعالانىڭ حالقىمىزعا سىيلاعان باعا جەتپەس ەكى باقىتى بار، ءبىرى – قاننان دا قىمبات، جاننان دا ءتاتتى تاۋەلسىزدىك، ەكىنشىسى – تاۋەلسىزدىك تۋىن بەرىك ۇستاپ، تاقىر جەرگە تاۋ تۇرعىزعانداي، ءشول دالانى گۇل قالاعا اينالدىرعانداي اسقان ەرلىكپەن، الداعىنى كورىپ، الىستى بولجاعان كورەگەندىكپەن مەملەكەت قۇرعان، ونىڭ كەرەگەسىن كەڭەيتىپ، شاڭىراعىن شايقالتپاي ۇستاپ تۇرعان، ۇلت باعىنا تۋعان تۇلعا نۇرسۇلتان ءابىش ۇلى نازاربايەۆ!
بۇل جايداق ءسوز، جالاڭ ماداق ەمەس، وعان ول ءزارۋ دە ەمەس. ۇلت ءۇشىن تۋعان تۇلعانىڭ قادىر-قاسيەتىن بالا دا، دانا دا بىلەدى، سىرت كوز سىنشىلار دا، الەمدىك دەڭگەيدەگى ايدىك ساياساتكەرلەر دە نۇرسۇلتاننىڭ كەمەل ويلى كەمەڭگەرلىگىن تالاي مارتە ءسۇيسىنىپ، قاداپ، قايتالاپ ايتۋمەن كەلەدى. ەلباسىمىز جايلى الەمگە ايان پاراساتتى پايىمداۋلاردى قايتالاپ، وقىرمان ۋاقىتىن الماي-اق قويالىق.
دەموكريتتىڭ سوزىمەن ايتساق: «مەملەكەت باسقارۋ – ونەر اتاۋلىنىڭ تورەسى». «ونەر اتاۋلىنىڭ تورەسىندە» توبە بي بولىپ وتىرعان نۇرسۇلتان تالاي قيىن كەزەڭ، قىستالاڭ شاقتا قيىن ىستەردىڭ قيسىنىن كەلتىرىپ، وتپەلى كەزەڭنىڭ وزىندە دە ەلدى ورگە سۇيرەپ كەلەدى. وعان دالەل بولار ميلليون مىسالدىڭ بىرەر مىسالى مىناۋ: ۇلتتىڭ كوسەمى احمەت بايتۇرسىنوۆ: «الاشقا اتى شىققان ادامدار! كوسەمدىكتەرىڭدى اداسپاي ءتۇزۋ ىستەڭدەر! سەندەر اداسساڭدار – ارتتارىڭنان الاش اداسادى: ارتتارىڭنان ەرگەندەردىڭ وبال-ساۋابىنا سىزدەر قالاسىزدار»، دەپ جازدى.
نۇرسۇلتان نازاربايەۆ كوسەمدىكتى «اداسپاي، ءتۇزۋ ىستەپ» كەلەدى. بۇعان داعدارىستار كەزىندە قابىلداعان شۇعىل شەشىمدەرى، تەڭگەنى دەر كەزىندە ومىرگە اكەلۋى، استانانى ارقاعا كوشىرىپ، قىسقا مەرزىمدە سىمباتى بولەك سۇلۋ قالا سالۋى، ءبىرىن-بىرى قايتالامايتىن جىل سايىنعى حالىققا جولداۋى، سەمەي پوليگونىن جاپقان ەرلىگى، ەلدى داعدارىستان دامۋعا جەتكىزگەن ەرەن ەڭبەگى، بىرىككەن ۇلتتار ۇيىمىنىڭ مارتەبەلى مىنبەسىنەن ءسوز ۇزاتىپ، ادامزات تاعدىرى جايلى تولىمدى وي تولعاۋى، قازاقستاننىڭ ەقىۇ-عا ءتوراعا بولىپ، تومەننەن تورگە وزىپ قانا قويماي، 2010 جىلى جەلتوقسان ايىنىڭ ەكىنشى جۇلدىزىندا تۇنگى ساعات ون ەكىدە 56 ەلدىڭ كوسەمدەرىن مامىلەگە كەلتىرىپ، استانا دەكلاراسياسىن قابىلداۋى، قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋى، حالىقتىڭ لاتىنعا كوشۋى، «بولاشاققا باعدار: رۋحاني جاڭعىرۋ» اتتى تەڭىزدەي تەرەڭ ويلى، حالىقتى كەمەل كەلەشەككە باستايتىن اسقان اۋقىمدى، اسا ماڭىزدى ماقالانىڭ جازىلىپ، وندا ايتىلعان ويلاردىڭ جۇزەگە اسا باستاۋى ايقىن ايعاق.
ەلباسى اتىنان قىمبات اسىل سوزدەردى شەتەلدەردە عانا ەمەس، ءوز ەلىمىزدە دە ايتىپ ءجۇر. ول سوزدەرىنىڭ ءبارى – حالىققا جول كورسەتىپ، باعىت بەرىپ تۇرعان باعدارشام، اداستىرماس اق جۇلدىز! وسى تۇستا ومار ھايامنىڭ ايتقان:
مەيلى، ول بولسىن ارتىق جاراتىلعان،
مەيلى، ول دانا دەيىك دارا تۋعان.
سوزىندە تۇرلاۋ بار ما سوعان قارا،
ويتكەنى سوندا جاتىر بار اقىل، ءمان، – دەگەنى ويعا ورالادى. ەڭ باستىسى، ەلباسىنىڭ ءسوزى مەن ءىسىنىڭ اراسىندا ايىرما جوق.
ەلباسىنىڭ سەنىمدى سەرىكتەرىءنىڭ ءبىرى ماحمۇت قاسىمبەكوۆ «ەگەمەن قازاقستاندا» جاريالانعان (26.06.2012 جىل) «پرەزيدەنتتىڭ كونسپەكتىسى» اتتى ماقالاسىندا: «ەڭبەك ادامىنىڭ ءوزىنىڭ تۇرمىس جاعدايىن جاقسارتۋعا مۇددەلىلىگىن ارتتىرۋ پرەزيدەنت كونسپەكتىسىنىڭ باستى ارقاۋى دەۋگە بولادى»، دەپ جازدى. بۇل ءسوزدىڭ شىندىعى ەلباسىنىڭ كۇندەلىكتى قىزمەتىنەن ايقىن كورىنىپ ءجۇر. نۇرسۇلتان نازاربايەۆتىڭ كۇنى-تۇنى ويلايتىنى – حالىقتىڭ قامى. بۇعان ەلباسىنىڭ: «مەندە حالىقتىڭ تاعدىرىنان بوتەن تاعدىر جوق» دەگەن ءسوزى جانە سول ءسوزدىڭ ۇدەسىنەن شىعىپ جۇرگەن ءىسى، حالىق دەپ سوققان جۇرەگى دالەل.
ەكىنشى تولعاۋ. ەلباسى – ەلدىڭ تىرەگى
مەملەكەتتى قۇتقارۋ ءۇشىن ءبىر عانا ۇلى ادام جەتكىلىكتى.
ماري فرانسۋا ۆولتەر
تاريح-انا ۇزاق تولعاتىپ، سيرەك تۋاتىن ۇلى ادام الماستاي اسىل، التىنداي از، قۇس سۇتىندەي قات. ۇلى ادامنىڭ ومىرگە كەلۋى – تاريحي وقيعا.
ۇلىنىڭ اتى – ۇلى! ونىڭ ارمانى دا اسىل، باقىتى دا ۇلى. ۇلى ادام ءوزىنىڭ ەمەس، ۇلتىنىڭ، ەلىنىڭ جايىن ويلايدى. «ەلدىڭ بۇگىنى مەن ەرتەڭى تۋرالى وي اركەز، قايدا جۇرسەم دە ءبىر ساتتە تىنىش تاپتىرمايدى» دەپ جازدى ەلباسى «ۇلى دالا ۇلاعاتتارى» اتتى كىتابىندا.
ومىردە كوپتى كورىپ، كوكىرەگىنە كوپ وي تۇيگەن اقىلمان اعا بايكەن ءاشىموۆ انا ءبىر جىلى 90-نان اسقان جاسىندا ەل گازەتى «ەگەمەن قازاقستاندا» جاريالانعان «ازاماتتىڭ اماندىعىن تىلەيىك، اعايىن» اتتى سۇحباتىندا بىلاي دەپ تولىمدى وي تولعاپتى:
«نۇرسۇلتان ءابىش ۇلىنىڭ ماگنيتكادا گورنوۆوي بولا ءجۇرىپ، وتتىڭ ورتاسىندا شىنىعىپ، شىنىققانى بەلگىلى. ەلباسىمىز سونىمەن بىرگە سان ءتۇرلى ادامداردىڭ، سان ءتۇرلى ۇلتتاردىڭ باسى توعىسقان جەردە جۇمىس ىستەۋ ارقىلى دا ەرەكشە شىنىقتى. شىعىس پەن باتىستىڭ دۇنيەتانىمىن قاتار سەزىنىپ تاعى شىنىقتى. ەكى قوعام، ەكى جۇيە ونى زاماننىڭ كورىگىنە سالىپ تاعى شىنىقتىردى. وسىنىڭ ارقاسىندا ءبىز ءقازىر بۇكىل الەم بىلەتىن، الىس تا، جاقىن دا مويىندايتىن، ساناساتىن، سىيلايتىن باسشىعا يە بولىپ وتىرمىز».
بۇدان بۇرىن دا «ەل امان بولسىن، ەل باعىنا تۋعان ەر امان بولسىن»، دەپ («ەگەمەن قازاقستاندا») اعالىق اق تىلەگىن ايتقان بايكەن اعانىڭ نۇرسۇلتان جايلى سوزدەرى الشى تۇسەر اسىققا قۇيىلعان قورعاسىنداي كوڭىلگە قونا كەتەدى.
ءوزىن ويلاعان – قۇلقىننىڭ ق ۇلى، حالقىن ويلاعان – ۇلى!
تاۋەلسىزدىكتى الۋدان ونى ساقتاپ تۇرۋ الدەنەشە ەسە قيىن. ازاتتىق حالىققا قانشالىقتى قۋانىش، باقىت سىيلاسا سونشالىقتى قيىنشىلىق تا الىپ كەلەدى. باياعىدان بەرى قالىپتاسقان بايىرعى مەملەكەتتەردىڭ دە پروبلەمالارى از ەمەس. ال ەندى عانا ازاتتىق العان تاۋەلسىز جاس مەملەكەتتى قۇرۋ، ونىڭ كۇرمەۋى قاتتى كۇردەلى تۇيىندەرىن شەشۋ – قيىننىڭ قيىنى. ەلباسى ەل ومىرىندەگى نەبىر قيىن تۇيىندەردى وزىنە ءتان اسقان اقىل-پاراساتپەن تارقاتىپ كەلەدى. ءبىر عانا مىسال، تاۋەلسىزدىكتىڭ العاشقى جىلدارىندا حالىق ەڭبەكاقى، جاردەماقى الا الماي قاراعاندى شاحتەرلەرى ميتينگىگە شىققان قيىن كەز، قىسىلتاياڭ شاقتا ەلباسى كەيبىرەۋلەر سياقتى جىلى كابينەتتە وتىرماي، حالىقتىڭ قالىڭ ورتاسىنا باردى. شاحتەرلەرگە وتىرىك ايتقان جوق، قيىندىقتى بىرگە ەڭسەردى.
تاۋەلسىزدىكتىڭ 26 جىلىندا جەتكەن تابىستارىمىزعا الەم تاڭعالدى. تاريح ءۇشىن قاس-قاعىم عانا ۋاقىتتا عاسىر جۇگىن ارقالاپ، الەمدىك قوعامداستىقتان ويىپ تۇرىپ ءوز ورنىن العان قازاقستان بۇگىنگى بيىگىنە وپ-وڭاي جەتكەن جوق. كوش باستاعان كوسەمى كەمەڭگەر، ەلى ەڭبەككەر بولعاندىقتان ءبىر بيىكتەن سوڭ ءبىر بيىككە ەنتىكپەي ەركىن كوتەرىءلىپ، اڭىزدى اقيقاتقا اينالدىرىپ كەلەدى.
بىر-بىرىنە وق اتقان، باقىتىن سودان جوعالتقان اعايىن حالىق ءازىربايجان مەن ارمياندارعا، ورىس پەن ۋكراينعا، رەسەي مەن تۇركياعا، ارا اعايىن بولىپ، بايانسىز، باقسىز سيرياعا دا اراشا ءتۇسىپ، باقىتقا بارار باعىتتى كورسەتىپ تۇر.
وڭىرلىك قانا ەمەس، ومىرلىك شيەلەنىستەردى دە شەشۋگە باتىل قادام جاساپ، وڭ ناتيجەلەرگە جەتىپ كەلە جاتقان قازاقستان ءوزىنىڭ كەمەل ويلى، كەڭ تىنىستى كەمەڭگەر كوسەمى نۇرسۇلتان نازاربايەۆتىڭ باستاۋىمەن «نۇرلى جولمەن» ارشىندى ادىمداپ، «ماڭگىلىك ەلگە» بەتتەپ بارادى.
تاريحتىڭ داۋىلى مەن جاۋىنىندا، ءورتى مەن دەرتىندە، سەلى مەن سەرگەلدەڭىندە تاپقانىنان جوعالتقانى كوپ قازاق حالقى ءدال بۇگىنگىدەي باقىتتى بولعان ەمەس. قوي ۇستىنە بوزتورعاي جۇمىرتقالاعان وسى ءداۋىر – نازاربايەۆ ءداۋىرى – داريعا داۋرەن، كوڭىل شات، باقىتتى شاق!
سودان دا بۇقار جىراۋ ايتقان: «قايعىسىز ۇيقى ۇيىقتاتقان، حانىم-اي!» دەيتىن اتالى، باتالى ءسوزدى سان قايتالاپ، سانسىز العىس ايتامىز، ۇلت باعىنا تۋعان تۇلعا – نۇرسۇلتان نازاربايەۆقا!
اللا تاعالا مەيىرىمى ءتۇسىپ تەرەڭ اقىل، تەگەۋرىندى كۇش، قايرات، پاراسات پاتشاسى دەۋگە لايىق پايىم بەرگەن نۇرەكەڭ جايلى كەزەكتى اقجارما سەزىمدەرىمدى اق قاعازعا اق قاناتتى پەرىشتە كوڭىلمەن قوندىرعان وسى ءبىر ساۋلەلى ساتتە مەنىڭ ويىما ادامزاتتىڭ ايتماتوۆى اتانعان شىڭعىس تورەقۇلۇلىنىڭ: «نۇرسۇلتان نازاربايەۆ – حالىقتىڭ باعى» دەگەن ءسوزى ورالدى.
ءۇشىنشى تولعاۋ. جۇدەسە ەل دەپ جۇدەدى
ەڭ الدىمەن ەل قامى،
سونان كەيىن قالعانى.
قادىر ءمىرزا-الى
ۇلت باعىنا تۋعان تۇلعا نۇرسۇلتان ءابىش ۇلى نازاربايەۆ جايلى ويلاعاندا مەنىڭ ەسىمە ۇلى ستراتەگ شىڭعىس حاننىڭ قاراقورىمنىڭ كۇرەڭ قىزىل ءمارمار تاسىنا قاشاپ جازىلعان:
التىن دەنەم قالعىسا دا،
ارداقتى ەلىم سولماسىن.
ءبۇتىن دەنەم قاجىسا دا،
بۇكىل ەلىم توزباسىن.
ابزال ەلىم داڭقى ارتسىن.
بۇكىل دەنەم قينالسا، قينالسىن –
بۇكىل ەلىم توپتانسىن! –
دەگەن سوزىمەن ۇزەڭگىلەسە ەلباسىنىڭ «مەن ءۇشىن ەلىمدى دامىعان مەملەكەتتەردىڭ ساپىنا تۇرعىزىپ، ساناتىنا قوسۋدان ۇلكەن ماقسات جوق... بۇل جولدا ايانىپ، جاسقانىپ قالعان جەرىم جوق، مەنىڭ باقىتىم – حالقىمنىڭ باقىتى. مەنىڭ جەڭىسىم – جۇرتىمنىڭ جەڭىسى. مەنىڭ تاپقانىم – ەلىمنىڭ قازىناسى. ەلدىڭ بۇگىنى مەن ەرتەڭى تۋرالى وي اركەز قايدا جۇرسەم دە ءبىر ساتكە دە تىنشۋ تاپتىرمايدى» («ۇلى دالا ۇلاعاتتارى» كىتابىنان) دەگەن ىشتەن شىققان ءىشتى ءسوز، جان سىرى ويعا ورالادى.
عاسىر مەن عارىشتى قاتار يگەرىپ كەلە جاتقان تاۋەلسىز قازاقستاننىڭ باستى ماقساتى ەلباسى سوزىمەن ايتساق: «2050» مەملەكەتتىك ستراتەگياسىن جۇزەگە اسىرۋدان تولىق كورىنەتىن بولادى. وسى عاسىردىڭ ورتاسىنا قاراي ءبىز قازاقستاننىڭ الەمدەگى اسا دامىعان 30 مەملەكەتىنىڭ قاتارىنا كىرۋدى مەجەلەپ وتىرمىز. بۇل – ۇلت جوسپارى، قازاقستاندىق ارمان».
ونسىز دا كۇردەلى ءومىر نارىقتىڭ نار كوتەرمەس جۇگىن ارتىپ، ءارتۇرلى كەدەرگى، قيىنشىلىقتار بۇرىنعىدان دا كوبەيگەن سىن ساعاتتاردا ەلدىڭ جايىن كوپ ويلاعان ەلباسى شۇعىل، سىندارلى شەشىمدەر قابىلداپ، سىننان سۇرىنبەي ءوتتى. ءبىر عانا مىسال، ءانابىر جىلى پارلامەنتتى تاراتىپ، جاۋاپكەرشىلىكتى ءوزى العان تۇستا ەكى جۇزگە جۋىق جارلىققا قول قويىپ، ەلدى تۇيىقتان الىپ شىقتى ەلباسى.
شاكارىم قاجى:
مەن جەتەلەپ ولەمىن،
ورگە قاراي قازاقتى،
دەسە، نۇرسۇلتان: «ءوز ەلىڭە پايدالى بولۋ، ءوز وتانىڭنىڭ تاعدىرى ءۇشىن جاۋاپتى بولۋ – ءاربىر ساياساتكەردىڭ، ءاربىر ۇلت پەرزەنتىنىڭ بورىشى مەن پارىزى» دەيدى. («ۇلى دالا ۇلاعاتتارى» كىتابىنان). سول بورىش پەن پارىزدى وتەۋ ءۇشىن ەلباسىنىڭ قانشا ءتۇندى ۇيقىسىز، قانشا كۇندى كۇلكىسىز وتكىزگەنى ءبىر اللاعا عانا ايان.
مەملەكەت باسقارۋ – اردىڭ ءىسى. اردىڭ جۇگى ناردىڭ جۇگىنەن دە اۋىر. وسى تۇستا ماحمۇت قاسىمبەكوۆتىڭ: «ەلباسىنىڭ يىعىنا تۇسەتىن جاۋاپكەرشىلىك جۇگىن سونى كۇندەلىكتى كوتەرىپ جۇرگەن ءوزى بولماسا بىلايعى جۇرت ناقتى شامالاي بەرمەۋىمىز ابدەن مۇمكىن»، دەگەن ءسوزى ويعا ورالىپ تۇر. پارلامەنت قابىلداعان ساياسي، تاريحي قۇجات – قازاقستان رەسپۋبليكاسى تاۋەلسىزدىگىنىڭ 25 جىلدىعى دەكلاراسياسىندا پرەزيدەنت نۇرسۇلتان نازاربايەۆتىڭ كورەگەندىگى مەن جاسامپازدىعىنا جوعارى باعا بەرىلدى. ءبىز سول جوعارى باعانى قۋانا قۇپتاپ، ەلباسىنى «تۇڭعىش پرەزيدەنت كۇنى» مەرەكەسىمەن قۋانا قۇتتىقتايمىز!
«قازاقتى اۆتونوميا قىلساق، قاراوتكەل (قازىرگى استانا قالاسى) – الاشتىڭ ورتاسى، سوندا ۋنيۆەرسيتەت سالىپ، قازاقتىڭ ۇل-قىزىن وقىتساق، «قوزى كورپەش – باياندى» شىعارعان، شوقان، اباي، احمەت، ءمىرجاقىپتى تاپقان قازاقتىڭ كىم ەكەنىن ەۋروپا سوندا بىلەر ەدى-اۋ»، دەپ جازىپتى ءاليحان بوكەيحانوۆ «گريگوريي نيكولايەۆيچ پوتانين» اتتى ماقالاسىندا.
ءتورتىنشى تولعاۋ. حالىقتىڭ ارمان، تىلەگى
ءوز پايداڭا ويلاما، ەل پايداسىن ويلا،
ءوز پايداڭ سونىڭ ىشىندە.
ءجۇسىپ بالاساعۇن
قالامداس، تاعدىرلاس اعا، دوس، وزبەكستان رەسپۋبليكاسى مەملەكەتتىك سىيلىعىنىڭ ەكى مارتە لاۋرەاتى، قازاقستان پرەزيدەنتىنىڭ «بەيبىتشىلىك، رۋحانيات سىيلىعىنىڭ يەگەرى، 88 جاستاعى ابىز ناسىر يۋلداش ۇلى فازىلوۆ ايتقان: «قازاقستانعا كەلسەم ەرتەگىلەر ەلىندە جۇرگەندەي بولامىن» دەگەن ءسوزى قالام ۇشىنا ورالىپ تۇر. بۇل – ىشتەن شىققان ءىشتى ءسوز! قازاقستان ەرىنە – ەلى، ەلىنە ەرى ساي – تاۋەلسىز مەملەكەت. تاريح ءۇشىن قاس-قاعىم ءسات، نەبارى 26 جىلدا ۇشقىر قيال عانا جەتەتىن اسۋلاردان اسىپ، عاسىر جۇگىن ارقالاۋدىڭ سىرى نەدە، قۇپياسى قايسى؟ وعان از سوزبەن جاۋاپ بەرسەك، ەر مەن ەلدىڭ تاريحي ۇلى جەڭىسى – ەلباسىنىڭ كورەگەندىگى مەن ەلدىڭ كول-كوسىر ەڭبەك جەمىسى دەر ەدىك. ال وعان قۋات بەرگەن التىن دىڭگەك – بىرلىك! ىنتىماق!
نۇرسۇلتاننىڭ مۇراتى – حالىق، سودان دا ونىڭ ايى جارىق. اللا تاعالا «ۇيقى بەرىپ، قايعى العان» ەلباسىنا دا، ەلىمىزدى دە ماڭدايىنان ءسۇيىپ تۇر. سول باقىتتى باعالاي بىلەيىك. باقىت باعالاعاننىڭ باسىنان كەتپەيدى. ءابۋ ءالى يبن سينا سوزىمەن ايتساق: «ءوز باقىتىن باعالاي بىلمەگەن ادام باقىتسىزدىققا ۇشىرايدى». ەل باقىتىنىڭ باس باعبانى – نۇرسۇلتان نازاربايەۆ!
وسى تۇستا حالىق جازۋشىسى ءازىلحان نۇرشايىقوۆتىڭ 2011 جىلى اقپان ايىنىڭ جەتىنشى جۇلدىزىندا جازعان امانات حاتى قالام ۇشىنا ورالىپ تۇر: «جوق، ءسىز قارتايعان جوقسىز، نۇرەكە! ءسىز مەنەن 20 جاستاي كىشىسىز. ءسىزدىڭ 85-كە، ءتىپتى 90-عا دەيىن ەلدى ەركىن باسقارۋعا اقىل، پاراسات، كۇش، قۋات، قايرات، قابىلەتىڭىز، جىگەرىڭىز جەتەدى. قايتالاپ ايتامىن: مەن سىزدەن وسى الداعى سايلاۋدا پرەزيدەنتتىككە كانديدات بولىپ ءتۇسۋىڭىزدى وتىنەمىن. مەنىڭ بۇل ءوتىنىشىمدى وسى زيالىلاردىڭ ءبارى، ءتىپتى بۇكىل حالىق قولدايدى دەپ سەنەمىن». ءالى ەش جەردە جاريالانباعان ءارى قىسقا، ءارى نۇسقا سول ءسوز ابىز اعا، اڭىز ادامنىڭ سوڭىندا ۋاقىتشا قالىپ تۇرعان بىزدەرگە ايتقان اماناتى ءتارىزدى كورىنەدى دە تۇرادى. حالىق جازۋشىسى وسى تاريحي سوزىمەن حالىقتىڭ ارمان، تىلەگىن دە جەتكىزدى. ول تىلەك بايكەن ءاشىموۆ ايتقان: «ەل تىزگىنى ەلباسىنىڭ قولىندا ۇزاق بولسا ەكەن» دەگەن تىلەك. كورنەكتى مەملەكەت قايراتكەرى بايكەن ءاشىموۆتىڭ تىلەگىن قۋاتتاي وتىرىپ ءوز سوزىممەن:
تۋعان ەرسىز حالقىمىزدىڭ باعىنا،
قۇت، بەرەكە داري بەرسىن تاعىڭا.
ەلىمىزدى باقىتقا ءوزىڭ باستاي بەر،
جەڭىسىڭمەن قۋانتا بەر تاعى دا، –
دەپ تىلەككە تىلەك قوسامىن مەن دە.
ءسىز قايىرىمدىسىز، نۇرەكە! قايىرىمدىلىقتان اسقان قاسيەت جوق. قايىرىمدى جۇرەك قارتايمايدى. قارتتىقتىڭ اۋىلى ءالى الىس. ەلىمىزدى باقىتقا ءوزىڭ باستاي بەر!
بۇل – حالىقتىڭ ارمان تىلەگى!
ءسابيت دوسانوۆ،
جازۋشى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، م.شولوحوۆ اتىنداعى حالىقارالىق سىيلىقتىڭ يەگەرى
الماتى
