اكتوبە وبلىسى ىرعىز اۋدانىنىڭ جەر قاتىناستارى ءبولىمىنىڭ باسشىسى مەدەت بەردالين پارا الۋ فاكتىسى بويىنشا 8،6 ملن تەڭگە ايىپپۇلعا كەسىلدى، دەپ حابارالايدى Dalanews.kz.

"HALYQSTAN" تەلەگرام ارناسىنىڭ مالىمەتىنشە، قىركۇيەك ايىندا بەردالين نۇرين اۋىلدىق وكرۋگىنىڭ قوسالقى جەر قورىنان ءبىر اي مەرزىمگە ءشوپ دايىنداۋ ماقساتىندا جەر ۋچاسكەسىن بولۋگە كومەكتەسۋ ءۇشىن شارۋا نۇردوس ەركىنعالييەۆتەن 300 مىڭ تەڭگە العان.

فەرمەر اۋدان اكىمدىگىنە رەسمي وتىنىشپەن كەلگەن، الايدا اڭگىمە بارىسىندا شەنەۋنىكتىڭ پارا الۋ نيەتى تۋىنداعان. ول “ماسەلەنى شەشۋ” ءۇشىن اقشا سۇراعان، ال كەيىن تولەنگەن سوما بەرداليننىڭ ايەلى ارقىلى الىنعان. اقشا بەرىلگەننەن كەيىن بەردالين ۇستالدى.

سوتتا شەنەۋنىك ايىپتاردى مويىندادى، ءىس قاراۋ جەڭىلدەتىلگەن تارتىپتە جۇرگىزىلدى. سوڭىندا سوت بەردالينگە پارانىڭ 30 ەسەلەنگەن مولشەرىندە ايىپپۇل سالدى. ۇستالعان ۋاقىت ەسەپكە الىنعاننان كەيىن 346 مىڭ تەڭگە شەگەرىلىپ، ايىپپۇل 8،6 ملن تەڭگەگە قىسقارتىلدى.

سونىمەن قاتار سوت بەردالينگە مەملەكەتتىك ورگاندار مەن كۆازيمەملەكەتتىك سەكتورداعى لاۋازىمداردى ءومىر بويىنا يەلەنۋگە تىيىم سالدى. پارا سوماسى مەملەكەت كىرىسىنە تاركىلەندى.