وتاندىق كينويندۋسترياعا ولجا سالعان تۋىندىنى بەلگىلى كاسكادەر، رەجيسسەر ءارى اكتەر عالىمبەك قاراتۇرىك تۇسىرگەن، دەپ حابارلايدى Ertenmedia.kz.
شىعىس ەۋروپاداعى ەڭ تانىمال بايقاۋدا 200-دەن استام شىعارما ب ا ق سىناعان. ءۇش ايدان استام ىرىكتەۋ جۇرگىزىلگەن فەستيۆالدە “تۇتىلعان جارىق” ەڭ ۇزدىك قىسقا مەتراجدى فيلم دەپ تانىلدى. تۋىندىنىڭ رەجيسسەرى عالىمبەك قاراتۇرىكتىڭ ايتۋىنشا، سەنارييى شىنايى وقيعاعا نەگىزدەلگەن.
فيلمدە باس كەيىپكەردى كاسكادەر ەدىل سىماعۇلوۆ ويناسا، قوسالقى رولدەردى كاسىبي اكتەرلەر سومداعان.
تۋىندى كۇندىز كوزى كورمەيتىن، تۇندە عانا كورەتىنبارىمتاشىنىڭ بالاسى تۋرالى. ونىڭ ۇلى دا تۋرا ءوزى سياقتى بولىپ دۇنيەگە كەلىپ، اكەسىنىڭ جولىن قۋادى. كوزى دە تۇندە عانا كورەدى. اقىرىندا اكەسىمەن بىرگە وپات بولادى. كوزدىڭ بۇل اۋرۋى عىلىمدا «احروماتوپسيا» دەپ اتالادى. Cوعان بايلانىستى ءفيلمنىڭ اتاۋى “تۇتىلعان جارىق” دەپ قويىلعان.
– بۇل ءفيلمنىڭ نەگىزگى ايتار ويى نە جاساساڭ – سول الدىڭنان شىعادى. بۇل دۇنيەدە جاقسىلىق جاساعان ادامنىڭ ءومىرىنىڭ سوڭى جاقسىلىقپەن، جاماندىق جاساعان ادامنىڭ ءومىرىنىڭ سوڭى جاماندىقپەن اياقتالاتىنى كورسەتىلەدى. تابيعات قۇبىلىستارىمەن بايلانىستى دا حالىقتىق فيلوسوفيالىق دەتالدار كورىنىس تابادى. مىسال ءۇشىن كۇننىڭ تۇتىلۋى، جالعىز قۇستىڭ جارىققا قاراي ۇشىپ بارا جاتۋى دەگەن سياقتى كورىنىستەر بار، – دەيدى عالىمبەك قاراتۇرىك.
سونداي-اق، ول قازاق كينويندۋسترياسى ءۇشىن بىرنەشە ىرگەلى جوبالاردى قولعا الىپ جاتقانىن، جاقىندا جاريالايتىنىن دا ايتتى.
