تۋريزم جانە سپورت ءمينيسترى ەربول مىرزابوسىنوۆ الماتىداعى جۇگىرۋ مارافونى كەزىندە بولعان جايتقا قاتىستى پىكىر ءبىلدىردى، دەپ حابارلايدى Dalanews.kz.
مينيستر الماتىدا وتكەن جارتىلاي مارافون كەزىندە ەكى قاتىسۋشىنىڭ قازا تابۋى – اۋىر ءارى ەرەكشە نازار اۋدارۋدى قاجەت ەتەتىن جاعداي ەكەنىن اتاپ ءوتتى.
"قازىرگى ۋاقىتتا وقيعا بويىنشا تولىققاندى تەكسەرىس جۇرگىزىلىپ جاتىر. قاتىسۋشىلاردىڭ دەنساۋلىق جاعدايى، جارىستى ۇيىمداستىرۋ ءتارتىبى، مەديسينالىق قامتاماسىز ەتۋ دەڭگەيى مەن قاۋىپسىزدىك رەگلامەنتى جان-جاقتى ساراپتالادى. جەرگىلىكتى اتقارۋشى ورگاندار وتكىزەتىن مۇنداي شارالارعا تالاپتى كۇشەيتەمىز. بۇقارالىق سپورت ءقاۋىپسىز ءارى كاسىبي دەڭگەيدە ۇيىمداستىرىلۋى ءتيىس. تۋريزم جانە سپورت مينيسترلىگى بۇل باعىتتا ناقتى ۇسىنىستار ازىرلەپ، ءتيىستى قۇرىلىمدارعا جولدايدى. قازا بولعان ازاماتتاردىڭ جاقىندارىنا كوڭىل ايتامىن!"، دەيدى مينيستر.
ايتا كەتەيىك، كۇنى كەشە الماتىداعى جۇگىرۋ مارافونى كەزىندە 21 جانە 84 جاستاعى ەكى ادام قايتىس بولعان ەدى.
