فورۋمنىڭ نەگىزگى ماقساتى: بەلسەندى ازاماتتارىنىڭ باسىن قوسا وتىرىپ، اۋداننىڭ ەكونوميكالىق دامۋ كورسەتكىشتەرى مەن الەۋمەتتىك تۇرمىس-تىرشىلىگىن، اتقارىلىپ جاتقان اۋقىمدى ىستەردى جۇرتشىلىققا تانىستىرىپ، ەل دامۋىنا باعىتتالعان ينۆەستيسيالىق جوبالاردى بىرلەسىپ اتقارۋعا ۇسىنىس جاساپ، تۋعان ولكەمىزدىڭ وسىپ-وركەندەۋىنە كوپشىلىكتى جۇمىلدىرۋ بولاتىن.
فورۋمعا تالعاردان شىققان اتقامىنەر ازاماتتار: ق ر پارلامەنتى سەناتىنىڭ ەكس-دەپۋتاتى، قوعام قايراتكەرى ەرتارعىن استايەۆ، «اتامەكەن» ۇلتتىق كاسىپكەرلەر پالاتاسىنىڭ كوميتەت ءتوراعاسى مۇرات ابەنوۆ، وبلىستىق قوعامدىق كەڭەستىڭ ءتوراعاسى ءاليحان تويبايەۆ، الماتى وبلىسىنىڭ كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى اليمجان توحتاسۋنوۆ، وبلىستىق جانە اۋداندىق ءماسليحات دەپۋتاتتارى ارنايى شاقىرىلىپ، اۋدان اكىمى رايحان سادىقوۆا باستاپ، بارلىق ورىنباسارلارى، قالا، اۋىل اكىمدەرى، اۋدان كاسىپكەرلەرى مەن مەسەناتتار، «نۇر وتان» پارتياسىنىڭ بەلسەندى مۇشەلەرى، كاسىپورىن باسشىلارى قاتىستى. جيىندى اۋدان اكىمىنىڭ ورىنباسارى دارمەنيار قىدىربەك جۇرگىزىپ وتىردى.
– ەلباسى ۇسىنعان جاڭعىرتۋلار قازاقستاندىقتاردى سان عاسىرلىق تاريح پەن مادەنيەتتەگى، ۇلتتىق سانا-سەزىم مەن ءبىلىم سالاسىنداعى رۋحاني رەفورماعا باستايدى. وسى تۇستا ەلباسى الدىمىزعا تاياۋ جىلدارداعى ورىندايتىن مىندەتتەردى جۇكتەپ، ءبىرشاما ناقتى جوبالاردى جۇزەگە اسىرۋ قاجەتتىگىن تاپسىردى. سونىڭ ءبىرى، «تۋعان جەر» باعدارلاماسىن ەنگىزۋ ارقىلى ءپاتريوتيزمنىڭ جارقىن ۇلگىسىن، ناقتى ناتيجەمەن كورسەتۋ. بۇل – مادەنيەتتى وركەندەتۋ مەن ولكەتانۋ، ەلدى مەكەندەردى اباتتاندىرۋ، ءتۋريزمدى دامىتۋ جانە تاعى باسقا دا شارالاردى قامتيتىن اۋقىمدى جوبا، – دەپ ءسوزىن باستاعان دامەنيار العاتبەك ۇلى جيىلعان قاۋىمدى فورۋم قوناقتارىمەن تانىستىردى.
سودان كەيىن ساحنا تورىنە قويىلعان لەد ەكران ارقىلى اۋدان تۋرالى «تۋعان جەر» اتتى قىسقا مەتراجدى دەرەكتى فيلم ۇسىنىلدى. جيىلعان قاۋىم الدىندا العاشقى ءسوز كەزەگىن اۋدان اكىمى رايحان سادىقوۆا الدى.
– ينۆەستيسيالىق احۋالدى جاقسارتۋدىڭ جانە تىكەلەي ينۆەستيسيالاردى تارتۋدىڭ ماڭىزدىلىعى تۋرالى ەلباسىمىز نۇرسۇلتان ءابىش ۇلى نازاربايەۆ ءاردايىم ايتىپ كەلەدى. ءوزىنىڭ قازاقستان حالقىنا جولداۋىندا مەملەكەت باسشىسى جاڭا جاھاندىق ناقتى احۋالدا جاڭا ينۆەستيسيالىق ساياسات قابىلداۋدىڭ ماڭىزدىلىعى تۋرالى تاعى اتاپ ءوتتى. تالعار جەرى ينۆەستيسيا تارتۋ مەن ءوزارا ءتيىمدى سەرىكتەستىكتەر قۇرۋعا قولايلى ايماق. ەلىمىزدە جۇرگىزىلىپ جاتقان ەكونوميكالىق رەفورمالار اۋدانىمىزدىڭ ەكونوميكالىق سەكتورلارىنىڭ تۇبەگەيلى وركەندەۋىنە سەپتىگىن تيگىزىپ كەلەدى. اسىرەسە، يندۋستريالدى-يننوۆاسيالىق دامۋ باعدارلاماسى ونەركاسىپ ءوندىرىسىن دامىتۋعا زور مۇمكىندىك بەردى. وسى باعدارلاما اياسىندا اۋدانىمىزدا «اميران» بالالارعا ارنالعان ءسۇت تاعامدارىن وندىرەتىن زاۋىت پەن ءسۇت – تاۋارلى فەرماسى ، «بايسەركە-اگرو» ەت وڭدەيتىن كەشەنى مەن ءسۇت وڭدەيىن زاۋىتى، «يۋسكو» كوپسالالى لوگيستيكالىق كەشەنى، «سۇلتان» دارىلىك زاتتار شىعارىتىن زاۋىتى، «ەتولون گيردوكورم» بالىقتارعا ارنالعان ازىقتار وندىرەتىن زاۋىتى، «لەسنايا سكازكا» تاۋلى دەمالىس ورىنى اشىلىپ، «گلازمان» تىگىن ءوندىرىسى جاڭارتۋدان ءوتتى،- دەگەن اۋدان اكىمى وسى اتالعان جوبالاردى جۇزەگە اسىرۋ ءۇشىن اۋدانىمىزعا 20،6 ملرد. تەڭگە ينۆەستيسيا تارتىلىپ، 300-دەن اسا جۇمىس ورىندارى اشىلعانىن تىلگە تيەك ەتتى.
سونىمەن قاتار، سوڭعى ەكى جىلدا ينۆەتيسيا تارتۋ ساياساتىنىڭ ارقاسىندا اۋدانىمىزدا «ارتپرايم قازاقستان» رەزينا پليتالار شىعاراتىن زاۋىت، «كەرۋەن پليۋس» پلاستيكالىق زاتتار شىعاراتىن زاۋىت،«تالحيز فۋد» كونسەرۆىلەنگەن جۇگەرى وندىرەتىن سەح، « جەتىسۋ ستروي سەرۆيس» جىلىبلوك وندىرەتىن سەحى ىسكە قوسىلعانىن دا جەتكىزدى. بۇل جوبالارعا 2،5 ملرد. تەڭگە ينۆەستيسيا تارتىلىپ، 372 ادام جۇمىسپەن قامتىلعانىن دا ايتقان اۋدان باسشىسى وڭىردەگى ءوندىرىس پەن كاسىپكەرلىك سالاسىنداعى باسقا دا جەتىستىكتەر مەن جاڭا اشىلىپ جاتقان جۇمىس ورىندارى تۋرالى ءسوز قوزعاپ، بۇل كۇنگى فورۋم اياسىندا بولاتىن كەزدەسۋلەر مەن ديالوگتار بولاشاقتاعى ءوزارا ءتيىمدى جانە جان جاقتى ىنتىماقتاستىقتى دامىتۋعا، اۋدان ەكونوميكاسىنىڭ بارلىق سالالارىندا ينۆەستيسيالىق الەۋەتتى ءتيىمدى قولدانۋعا مۇمكىندىك بەرەتىنىنە سەنىم ارتتى.
سودان كەيىن كەزەكپەن ءسوز العان قوعام قايراتكەرى ە. استايەۆ، «اتامەكەن» ۇلتتىق كاسىپكەرلەر پالاتاسىنىڭ كوميتەت ءتوراعاسى م. ابەنوۆ، الماتى وبلىسىنىڭ كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى ا. توحتاسۋنوۆتار ەلباسىنىڭ ماقالاسىندا ايتىلعان باعدارلامالاردى جۇزەگە اسىرۋ مەن ونىڭ ەل بولاشاعىن باياندى ەتۋگە قوسار ۇلەسى تۋرالى ءسوز قوزعاپ، تۋعان جەرىمىزدى كوركەيتۋ، ونىڭ ەكونوميكاسىن دامىتىپ، ءال-اۋقاتىن جاقسارتۋ بارشامىزدىڭ بورىشىمىز ەكەنىن العا تارتسا، «كەرۋەن پليۋس» ءجشس-نىڭ اتقاۋشى ديرەكتورى ا.كاتاشيەۆ، «حوۆا سەنترال ازيا لتد» ءجشس-نىڭ ديرەكتورى ع.امانبايەۆ، «سينتەز كز» ءجشس-نىڭ ديرەكتورى ي.رىبين، «كازليفت» مەكەمەسىنىڭ ديرەكتورى ا.سكريپين، «جۇلدىز» ءجشس-نىڭ ءتوراعاسى ج. دجەكەنوۆ، «اگرومەليوستروي» ءجشس-نىڭ باسشىسى ب.بايبولوۆتار وزدەرى باسقارىپ وتىرعان كاسىپورىنداردىڭ تىنىس-تىرشىلىگى تۋرالى ءسوز قوزعادى.
بۇل كۇنگى فورۋم بارىسىندا اۋدانىمىزعا ينۆەستيسيا تارتۋ ماقساتىندا كەلگەن ءبىرقاتار ازاماتتارمەن قۇنى 42 ملرد. تەڭگە بولاتىن ەكى جاقتى بەرنەشە مەموراندۋمعا قول قويىلدى. «تۋعان جەر» باعدارلاماسى اياسىندا قۇنى 100 ملن. تەڭگە بولاتىن كولەمى 485 شارشى مەترلىك سپورت زالىن تۇرعىزىپ، اۋىل اكىمشىلىگىنىڭ يگىلىگىنە تاپسىرۋدى ۇيعارعان بەساعاشتىق جەكە كاسىپكەر ق. مەيىربەكوۆپەن دە ەكى جاقتى مەموراندۋمعا قول قويدى. وسىنداي باسقوسۋلاردىڭ قاشاندا ەل يگىلىگى ءۇشىن بەرەرى مول بولماق.
