وبلىس اكىمىنىڭ ورىنباسارى جاقسىلىق ومار ارنايى قاتىسقان جيىنعا 17 نوميناسيا بويىنشا ۇزدىكتەر انىقتالدى. سول ۇزدىكتەردىڭ قاتارىنان جەرلەسىمىز دە تابىلدى. ياعني، «ماديار» شارۋا قوجالىعىنىڭ جەتەكشىسى اۋەلبايەۆ ماديار «ۇزدىك جاس اۋىلشارۋاشىلىعىنىڭ مامانى» نوميناسياسىن جەڭىپ الدى. ەلباسى جولداۋلارىندا ايتىلعان اگرارلىق سەكتوردا ەتتى مال شارۋاشىلىعىن دامىتۋ ءۇشىن 2002 جىلى ىرگەسىن كوتەرگەن شارۋاشىلىق ءىرى قارا مالىنىڭ ەكسپورتتىق الەۋەتىن كوتەرۋدى كوزدەيدى.
ءىستىڭ كوزىن تاۋىپ، مەملەكەتتىك باعدارلاما ارقىلى بەرىلىپ جاتقان نەسيەنىڭ دە ناتيجەسىن كورۋدە. 2014 جىلى اۋىلشارۋاشىلىعىنا قارجىلاي كومەك بەرەتىن «سىباعا» باعدارلاماسى بويىنشا «اگرارلىق نەسيە كورپوراسياسى» اق-نان 48 ملن. تەڭگە نەسيە الىپ، 242 باس سيىر ساتىپ العان. ماڭداي تەرىمەن ءوز نەسىبەسىن تاۋىپ وترعان جاس كاسىپكەر وسىنداي مۇمكىندىك بەرىپ وتىرعان مەملەكەتكە ريزا.
– بۇگىندە 800 باس سيىر، 242 باس جىلقى، 1000 قوي بار شارۋاشىلىقتا 35 ادامدى جۇمىسپەن قامتىپ وتىرمىز. 2015 جىلى بورداقىلاۋ الاڭىنىڭ قۇرىلىسىن اياقتادىق. اتا كاسىبىمىزدى دامىتۋ جولىندا ايانىپ قالماق ەمەسپىز. مال باسىن كوبەيتىپ، ەڭبەكتىڭ جەمىسىن ەسەلەي بەرۋ – ءبىزدىڭ شارۋاشىلىقتىڭ العا قويعان ماقساتى، – دەيدى م.اۋەلبايەۆ.
