اقتوبە قالاسىنىڭ اكىمى ءىلياس يسپانوۆ جاڭادان سالىنعان قوقىس الاڭىن كورىپ، جاۋاپتى مەكەمە باسشىلارىنا قوقىستاردى توگۋ، جيناۋ، قوقىس كونتەينەرلەرىن قويۋعا قاتىستى جۇمىستاردى جاۋاپكەرشىلىكپەن اتقارۋدى تاپسىردى.
اتالعان الاڭعا قىزمەت كورسەتەتىن «اقتوبە تازا قالا» جشس-نىڭ ديرەكتورى جاسۇلانبەك سەيىتوۆتىڭ ايتۋىنشا، اتالعان قوقىس الاڭىنا 600 مىڭ تەڭگە قارجى جۇمسالعان.
سەرىكتەستىك زاماناۋي ۇلگىدەگى قوقىس الاڭدارىن بۇگىندە «يۋنيس سيتي» تۇرعىن ءۇي كەشەنىندە، 11،12-شاعىن اۋدانداردا سالىپ جاتىر.
– قوقىستاردى جەكە-جەكە جيناۋ بۇل وتە ءتيىمدى. ال ەۋروكونتەينەرلەردىڭ ەرەكشەلىگى، ولار دوڭگەلەگى بولعاندىقتان تەز قوزعالادى، سول سەبەپتى، ارنايى ماشينالار قوقىستاردى تەز توگىپ، تەز جينايدى. بۇگىنگى كۇنى ءبىزدىڭ سەرىكتەستىك كوپ قاباتتى تۇرعىن ۇيلەر ورنالاسقان اۋدانداردا قوقىستاردى كۇن سايىن، ال جەكە سەكتورلاردا اپتاسىنا ەكى رەت جينايدى، –دەيدى ول.
قالا بويىنشا تۇرمىستىق قالدىقتاردى سىرتقا شىعارۋمەن ەكى مەكەمە – «اقتوبە تازا قالا» جانە «اقجول لتد» سەرىكتەستىكتەرى اينالىسادى.
– بۇل قوقىس الاڭى ەۋروستاندارتقا سايكەس كەلەدى. ەۋروكونتەينەر شىنى، قاعاز، پلاستيك، ومىرگە ءقاۋىپ اكەلەتىن زاتتاردى بولەك جيناۋعا ارنالعان. الداعى ۋاقىتتا قوقىس شىعاراتىن مەكەمەلەر ءار تۇرعىنمەن، اسىرەسە قاعاز، پلاستيكتى كوپ شىعاراتىن ساۋدا ورىندارى وكىلدەرىمەن جۇمىس جاساپ، قوقىستى بولەك جيناۋ ماسەلەسىمەن جەكە كەلىسىمشارتقا تۇرادى. ءقازىر حالىققا قوقىستى ءبولىپ جيناۋ ءتارتىبىن ەنگىزۋگە قاتىستى ءتۇسىندىرۋ جۇمىستارىن جۇرگىزىپ جاتىرمىز. جاقىندا وبلىستىق ءماسليحاتتا قالا اۋماعى مەن ەلدى مەكەندەردى اباتتاندىرۋعا قاتىستى كوميسسيا وتىرىسىندا وسىعان بايلانىستى ەرەجەلەرگە وزگەرىستەر ەنگىزۋگە ۇسىنىس بەردىك. كوميسسيا ءبىرىنشى وقىلىمدا ءبىزدىڭ ۇسىنىسىمىزدى قولدادى، ەندى سەسسيادا قابىلدانىپ جاتسا، وسى باعىتتاعى جۇمىستار زاڭعا سايكەس جۇرگىزىلەدى. ءقازىر ءبىز سول نورماعا دايىندىق جاساپ جاتىرمىز. زاڭ كۇشىنە ەنگەن سوڭ، ءبىز وسى جۇيەنى ەنگىزەمىز،– دەيدى قالا اكىمى.
ونىڭ ايتۋىنشا، قالا بويىنشا الاڭداردى سالۋعا بيۋدجەتتەن قارجى بولىنبەيدى، تەك ەۋروكونتەينەرلەر عانا ساتىلىپ الىنادى. قالعان جۇمىستاردى جاۋاپتى مەكەمەلەر جاسايدى.
– الداعى ۋاقىتتا قالا بويىنشا بارلىق اۋداندا وسىنداي ارنايى قوقىس الاڭدارىن سالۋدى جوسپارلاپ وتىرمىز. دەرەكتەرگە سۇيەنسەك، بۇگىنگە دەيىن قوقىس كونتەينەرلەرىن قويۋعا ارنالعان 537 ورىن انىقتالدى. ەندىگى ماقسات – سانيتارلىق جاعدايلاردى ەسكەرە وتىرىپ، تۇرعىنداردى قوقىستاردى جەكە-جەكە جيناۋعا ۇيرەتۋ، – دەيدى ءى.يسپانوۆ.
