Aqtóbeni taza qalaǵa ainaldyrý qolǵa alyndy
Aqtóbe qalasynyń ákimi Iliias Ispanov jańadan salynǵan qoqys alańyn kórip, jaýapty mekeme basshylaryna qoqystardy tógý, jinaý, qoqys konteinerlerin qoiýǵa qatysty jumystardy jaýapkershilikpen atqarýdy tapsyrdy.
Atalǵan alańǵa qyzmet kórsetetin «Aqtóbe Taza qala» JShS-nyń direktory Jasulanbek Seiitovtiń aitýynsha, atalǵan qoqys alańyna 600 myń teńge qarjy jumsalǵan.
Seriktestik zamanaýi úlgidegi qoqys alańdaryn búginde «Iýnis Siti» turǵyn úi kesheninde, 11,12-shaǵyn aýdandarda salyp jatyr.
– Qoqystardy jeke-jeke jinaý bul óte tiimdi. Al eýrokonteinerlerdiń ereksheligi, olar dóńgelegi bolǵandyqtan tez qozǵalady, sol sebepti, arnaiy mashinalar qoqystardy tez tógip, tez jinaidy. Búgingi kúni bizdiń seriktestik kóp qabatty turǵyn úiler ornalasqan aýdandarda qoqystardy kún saiyn, al jeke sektorlarda aptasyna eki ret jinaidy, –deidi ol.
Qala boiynsha turmystyq qaldyqtardy syrtqa shyǵarýmen eki mekeme – «Aqtóbe Taza qala» jáne «Aqjol LTD» seriktestikteri ainalysady.
– Bul qoqys alańy eýrostandartqa sáikes keledi. Eýrokonteiner shyny, qaǵaz, plastik, ómirge qaýip ákeletin zattardy bólek jinaýǵa arnalǵan. Aldaǵy ýaqytta qoqys shyǵaratyn mekemeler ár turǵynmen, ásirese qaǵaz, plastikti kóp shyǵaratyn saýda oryndary ókilderimen jumys jasap, qoqysty bólek jinaý máselesimen jeke kelisimshartqa turady. Qazir halyqqa qoqysty bólip jinaý tártibin engizýge qatysty túsindirý jumystaryn júrgizip jatyrmyz. Jaqynda oblystyq máslihatta qala aýmaǵy men eldi mekenderdi abattandyrýǵa qatysty komissiia otyrysynda osyǵan bailanysty erejelerge ózgerister engizýge usynys berdik. Komissiia birinshi oqylymda bizdiń usynysymyzdy qoldady, endi sessiiada qabyldanyp jatsa, osy baǵyttaǵy jumystar Zańǵa sáikes júrgiziledi. Qazir biz sol normaǵa daiyndyq jasap jatyrmyz. Zań kúshine engen soń, biz osy júieni engizemiz,– deidi qala ákimi.
Onyń aitýynsha, qala boiynsha alańdardy salýǵa biýdjetten qarjy bólinbeidi, tek eýrokonteinerler ǵana satylyp alynady. Qalǵan jumystardy jaýapty mekemeler jasaidy.
– Aldaǵy ýaqytta qala boiynsha barlyq aýdanda osyndai arnaiy qoqys alańdaryn salýdy josparlap otyrmyz. Derekterge súiensek, búginge deiin qoqys konteinerlerin qoiýǵa arnalǵan 537 oryn anyqtaldy. Endigi maqsat – sanitarlyq jaǵdailardy eskere otyryp, turǵyndardy qoqystardy jeke-jeke jinaýǵa úiretý, – deidi I.Ispanov.
