جۋرناليستەر الدىمەن قالاشىق اۋماعىن ارالاپ، كۇردەلى جوندەۋدەن وتكىزىلگەن وقۋ عيماراتتارى مەن جاتاقحانالاردا بولىپ، مادەني-الەۋمەتتىك نىسانداردىڭ جۇمىسىمەن تانىستى.
كەزدەسۋ بارىسىندا ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت قانسەيىت ۇلى جۋرناليستەر قاۋىمىنا وقۋ ورنىنىڭ دامۋ باعدارلاماسى، كامپۋستى جاڭعىرتۋ جوسپارى جانە اتقارىلعان جۇمىستار تۋرالى بايانداپ، جۋرناليستەردىڭ سۇراقتارىنا جاۋاپ بەردى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ تاريحى تەرەڭدە، قالىپتاسقان ءداستۇرى بار، جەتىستىگى مول ەلىمىزدەگى كوشباسشى جوعارى وقۋ ورنى. ءقازىر ۋنيۆەرسيتەت قۇرامىندا 16 فاكۋلتەت، 68 كافەدرا، 8 عىلىمي-زەرتتەۋ ينستيتۋتى جانە 29 عىلىمي ورتالىق جۇمىس ىستەيدى. سونىمەن بىرگە مەديسينالىق دياگنوستيكالىق ورتالىق، ءو.جولداسبەكوۆ اتىنداعى ستۋدەنتتەر سارايى، «كەرەمەت» ستۋدەنتتەرگە قىزمەت كورسەتۋ ورتالىعى، ىستىقكولدە سپورتتىق-ساۋىقتىرۋ لاگەرى جۇمىس ىستەيدى. 140-قا جۋىق عىلىمي جانە وقۋ-زەرتتەۋ زەرتحاناسى ىسكە قوسىلعان.
ۋنيۆەرسيتەت باسشىسى ءوز سوزىندە جوعارى وقۋ ورنىندا وقىتۋشىلاردى ماتەريالدىق جاعىنان ىنتالاندىرۋعا ەرەكشە كوڭىل بولىنەتىنىنە توقتالدى. ماسەلەن، بيىل جالاقى ەكى رەت كوتەرىلدى. ءبىرىنشى رەت اقپاندا 20 پايىزعا وسسە، ەكىنشى رەت ءبىلىم جانە عىلىم مينيسترلىگىنىڭ نۇسقاۋىنا سايكەس، 1 قىركۇيەكتەن باستاپ بەلگىلەندى. ءقازىر ءمۇعالىمنىڭ ەڭ تومەنگى جالاقىسى – 285 مىڭ، اعا وقىتۋشىعا – 312 مىڭ، – قاۋىمداستىرىلعان پروفەسسورعا – 389 مىڭ، پروفەسسورعا 500 مىڭ تەڭگە كولەمىندە بەلگىلەندى.
قازۇۋ-دا 650-دەن استام ءبىلىم بەرۋ باعدارلامالارى جۇمىس ىستەيدى. بيىل ەڭ وزەكتى ءارى پەرسپەكتيۆالىق باعىتتار بويىنشا 100-دەن استام جاڭا وقۋ باعدارلاماسى ىسكە قوسىلدى. ولاردىڭ قاتارىندا نيەۆرولوگيا، كيبەرفيزيكا، بيولوگيالىق ينجەنەريا، روبوتتىق جۇيەلەر، جاراتىلىستانۋ مەن ينجەنەرلىك-تەحنيكالىق باعىتتاعى تابيعي جانە تەحنولوگيالىق تاۋەكەلدەر ەندى. الەۋمەتتىك-گۋمانيتارلىق باعىتقا: مەملەكەتتىك باسقارۋ جانە قوعامدىق قاۋىپسىزدىك، سيفرلىق ەكونوميكا، كرەاتيۆتى يندۋستريالار، مەديا-كوممۋنيكاسيا، اقىلدى قالا ەكونوميكاسى سياقتى ماماندىقتار بار.
بۇگىنگى كۇنى جوعارى وقۋ ورنىنىڭ ينفراقۇرىلىمىن مودەرنيزاسيالاۋ جۇمىسى وتە قارقىندى ءجۇرىپ جاتىر. بيىل 7 وقۋ عيماراتىندا كوسمەتيكالىق جوندەۋ جۇرگىزىلدى، 3 وقۋ عيماراتىندا كۇردەلى جوندەۋ جۇمىستارى اياقتالۋدا. 14 جاتاقحانا جوندەۋدەن ءوتىپ، ستۋدەنتتەرگە قازىرگى زامانعا ساي جاعداي جاسالدى. كامپۋستىڭ اۋماعى اباتتاندىرىلىپ جاتىر.
ۋنيۆەرسيتەت رەكتورى ءبىلىم بەرۋ مەن عىلىمنىڭ وزىق ينفراقۇرىلىمىن زامان تالابىنا ساي دامىتۋدا ءالى دە اۋقىمدى جۇمىستار اتقارىلاتىنىن ايتتى. جاتاقحانالار ەسكىرگەن، كوپشىلىگىندە پايدالانۋعا بەرىلگەننەن كەيىن كۇردەلى جوندەۋ جۇرگىزىلمەگەن. كوممۋنيكاسيا جۇيەسى اپاتتىق جاعدايدا. 15 مىڭعا جۋىق ستۋدەنت جاتاقحاناعا مۇقتاج. سوڭعى ستۋدەنتتىك جاتاقحانا 1991 جىلى سالىنىپ، پايدالانۋعا بەرىلگەن. وقۋ عيماراتتارى توزعان. ينجەنەرلىك جەلىلەر مەن كوممۋنيكاسيانىڭ جاعدايى سىن كوتەرمەيدى. جاڭا عيماراتتار مەن جاتاقحانالار قاجەت.
وسىعان بايلانىستى كامپۋستى دامىتۋدىڭ 2025 جىلعا دەيىنگى جۇمىس جوسپارى جاسالدى. ءبىلىم جانە عىلىم مينيسترلىگىنىڭ قارجى ورتالىعىمەن بىرلەسە جاتاقحانالار سالۋعا ينۆەستورلار تارتۋ بويىنشا جۇمىس جۇرگىزىلىپ جاتىر. سونداي-اق ءقازىر بيۋدجەتكە تۇسەتىن جۇكتەمەنى ازايتاتىن شەتەلدىك ينۆەستيسيالاردى تارتۋدىڭ ءتۇرلى تەتىكتەرى قاراستىرىلۋدا.
بيىل ۋنيۆەرسيتەت ۇجىمى 600-دەن استام اعاش وتىرعىزدى، ەلباسى ساياباعى، اعاشتار اللەياسى اشىلدى.
ءال-فارابي اتىنداعى قازۇۋ باسپا ءسوز قىزمەتى.
